Ateŵeti Akovya Agwira Ntchitu Zakukhumbika

WAKUTUMIKA Paulo wangulembe mpingu wa ku Filipi kuti: “Ini Paulo nde limoza ndi Timote nge akapolu aku Khristu Yesu. Ndilembe akupaturika wosi akukoliyana ndi Khristu Yesu wo ŵe ku Filipi, limoza ndi akuwonere kweniso ateŵeti akovya.” (Afi. 1:1) Wonani kuti Paulo wangutawuzga ateŵeti akovya. Ivi vilongo kuti abali ŵenaŵa agwiranga ntchitu zakukhumbika pakovya ŵara mu mpingu mu nyengu yakali. Ivi ndivu vichitika so mazuŵa nganu. Ateŵeti akovya agwira ntchitu zo zitovya ŵara ndipuso zo zitovya kuti vinthu viyendengi umampha mu mpingu.

² Kumbi mutiŵaziŵa ateŵeti akovya mu mpingu winu? Kumbi mutiziziŵa ntchitu zo agwira zo zitikuwovyani kweniso zitovya mpingu wosi? Yehova wawonga chifukwa chakujipereka kwa abali ŵenaŵa. Paulo wangulemba kuti: “Anthulumi wo ateŵete mu nthowa yamampha, aja ndi mbiri yamampha ndipuso atuŵa ndi wanangwa wakulongoro va chivwanu cho ŵe nachu mwaku Khristu Yesu.”—1 Timo. 3:13.

FUNDU ZA M’MALEMBA ZO ATEŴETI AKOVYA ATENERE KUFISKA

³ Ateŵeti akovya atenere kuja ndi mijalidu yamampha yachikhristu, akugomezgeka ndipuso atenere kugwira ntchitu zawu mwakwenere. Ivi ndivu Paulo wangulembe Timote wachikonkhoska fundu zo ateŵeti akovya atenere kufiska. Iyu wangulemba kuti: “Ateŵeti akovya nawu so aje akuchita vinthu mwaura, apaŵipaŵi cha, akumwa vinyu munandi cha, akusaniya phindu mwakubiya ŵanthu cha, kweni akukolesa chisisi chakupaturika cha chivwanu. Achitengi venivi ŵe ndi njuŵi yamampha. Ndipuso ŵenaŵa ayeseki dankha kuti aziŵiki asani mbakukwana, pavuli paki ndipu muŵazomerezi kuti ateŵete nge ateŵeti, pakuti alivi mbiri yiheni. Ateŵeti akovya aje anthulumi a munthukazi yumoza, akulongozga umampha ŵana ŵawu kweniso a munyumba yawu.” (1 Timo. 3:8-10, 12) Kulondo fundu za m’Malemba zenizi, kutovya kuti mpingu unganyozekanga cha chifukwa cha mijalidu ya ŵanthu wo akupaskika maudindu.

⁴ Kwali angaŵa anamana pamwenga arara, ateŵeti akovya apharazga mwaphamphu mwezi wewosi. Nge mo Yesu wachitiyanga, nawu atijipereka pa ntchitu yakupharazga. Chifukwa chakuti apharazga mwaphamphu, alongo kuti nawu akhumba kuti ŵanthu azitaskiki nge mo Yehova wakhumbiya.—Yesa. 9:7.

⁵ Abali wo ateŵete nge ateŵeti akovya, alongo so chakuwoniyapu chamampha pa nkhani ya kuvwala, kujitowesa, vo alongoro, mo awone vinthu ndipuso aja ndi jalidu lamampha. Yiwu achita vinthu mwazeru vo vichitiska kuti ŵanthu aŵatumbikengi. Yiwu awona kuti ubwezi wawu ndi Yehova ndipuso ntchitu zo agwira mu mpingu, vakukhumbika ukongwa.—Tito 2:2, 6-8.

⁶ Abali ŵenaŵa ‘ayeseka dankha kuti aziŵiki asani mbakukwana.’ Chinanga mphanyengu yo ŵechendasankhiki kuja ateŵeti akovya, atenere kulongo kuti mbakujipereka ndi mtima wosi. Yiwu adanjizga vinthu va Ufumu pa umoyu wawu ndipuso mbakunozgeka kupaskika maudindu ngengosi. Kukamba uneneska, yiwu ntchakuwoniyapu chamampha ku ŵanthu anyaki mu mpingu.—1 Timo. 3:10.

NTCHITU ZO AGWIRA

⁷ Ateŵeti akovya agwira ntchitu zakupambanapambana zo zitovya abali ndi azichi mu mpingu. Venivi vitovya kuti ŵara aŵi ndi nyengu yakukwana yakusambiza ndi kuchita maulendu nga uliska. Asani wupu wa ŵara upereka ntchitu kwa ateŵeti akovya, uŵanaŵaniya malusu ngo mubali weyosi we nangu kweniso vo vikhumbika pa mpingu.

⁸ Wonani ntchitu zinyaki zo ateŵeti akovya agwira: Mteŵeti wakovya yumoza wangapaskika ntchitu yakuphwere mabuku. Venivi vitovya kuti tisaniyengi mabuku ngo tingagwiriskiya ntchitu pakutija kweniso mu uteŵeti. Anyaki apaskika ntchitu yakuphwere ndalama za mpingu pamwenga kusunga makadi nga vigaŵa va mpingu vakupharazgaku. Ateŵeti akovya anyaki apereke mayikulofoni, aphwere vipangizu vakukweze mazu, alonde alendu pa maunganu ndipuso atovya ŵara mu nthowa zinyaki. Paja ntchitu zinandi pakuphwere Nyumba ya Ufumu kuti yiwonekengi yakutowa. Mwaviyo, kanandi ateŵeti akovya apempheka kuti awovyi pa ntchitu zenizi.

⁹ Mu mipingu yinyaki, mteŵeti wakovya weyosi wangapaskika ntchitu yaki. Penipo mu mipingu yinyaki, mteŵeti wakovya yumoza wangapaskika ntchitu zinandi. Nyengu zinyaki, ateŵeti akovya anandi angapaskika ntchitu yimoza. Asani palivi ateŵeti akovya akukwana, wupu wa ŵara ungasankha abali anyaki akubatizika a jalidu lamampha kuti agwirengi ntchitu zenizi. Ivi vingaŵawovya kuziŵa vo azamuchita asani azija ateŵeti akovya. Asani palivi abali, muzichi wachakuwoniyapu chamampha wangapempheka kuti wawovyi pa ntchitu zinyaki chinanga kuti wangasankhika cha kuja mteŵeti wakovya. Munthu yo ntchakuwoniyapu chamampha, ndi munthu yo ŵanthu anyaki angatoliyaku mijalidu yaki ndipuso vo wachita pakuteŵete Chiuta. Iyu wakhumbika kuti wasanirikengi pa maunganu, wapharazgengi, wajengi ndi nkharu yamampha mubanja, wasankhengi vakukondwesa vamampha, wavwalengi ndi kujitowesa mwakwenere kweniso wachitengi vinthu vinyaki vamampha vo ŵanthu angatoliyaku.

¹⁰ Mu mipingu yo mwe ŵara amana, mteŵeti wakovya wakwenere wangapempheka kuti wakambiskani ndi ŵanthu wo akhumba kubatizika mafumbu ngakukwaskana ndi fundu zo tigomezga. Mafumbu yanga ngasanirika pa Fundu Zakukumaliya, “Chigaŵa 1: Vo Akhristu Agomezga.” Chifukwa chakuti “Chigaŵa 2: Vo Akhristu Atenere Kuchita,” chikwaska nkhani zachisisi, mura ndiyu wangakambiskana ndi munthu chigaŵa chenichi.

¹¹ Asani pe chifukwa chamampha, wupu wa ŵara ungawona kuti nyengu zinyaki nkhwamampha kusintha ntchitu yo mteŵeti wakovya munyaki wagwiranga ndi kupaska munyaki. Kweni vija umampha asani abali agwira ntchitu yimoza kwa nyengu yitaliku kuti ayiziŵiriyi ndipuso ayiziŵi umampha.

¹² Mwakukoliyana ndi mo vinthu viliri pa mpingu, ateŵeti akovya anyaki wo ‘ŵanthu wosi awona kuti aluta panthazi,’ angapaskika maudindu nganyaki. (1 Timo. 4:15) Asani pa mpingu pe ŵara amana, mteŵeti wakovya wangateŵete nge wakovya wakuwonere kagulu ka uteŵeti. Ndipu nyengu zinyaki wangateŵete nge mteŵeti wa kagulu kweni wateŵete mwakulongozgeka ndi ŵara. Ateŵeti akovya angapaskika nkhani zinyaki mu Unganu wa Umoyu Wachikhristu Ndipuso Uteŵeti, angachitiska Sambiru la Bayibolu la Mpingu asani mphakukhumbika kuchita viyo ndipuso angakamba nkhani zachisanisani. Yiwu angapaskika so ntchitu zinyaki asani pakhumbika chovyu chinyaki ndipuso asani afiska vo vikhumbika pa udindu wo. (1 Petu. 4:10) Ateŵeti akovya akhumbika kujipereka ndi mtima wosi pakovya ŵara.

¹³ Chinanga kuti ntchitu ya ateŵeti akovya yipambana ndi ya ŵara, yiwu nawu achita uteŵeti wakupaturika kwaku Chiuta ndipu ntchitu yawu njakukhumbika chifukwa yitovya kuti vinthu viyendengi umampha pa mpingu. Mukuluta kwa nyengu, asani ateŵeti akovya agwira umampha ntchitu zawu ndipuso asani aja akwenere kuteŵete nge aliska kweniso asambizi, angasankhika kuja ŵara.

¹⁴ Asani ndimwi mubali wachinyamata pamwenga mwabatizika ŵaka sonu, kumbi mutesesa kuti muje mteŵeti wakovya? (1 Timo. 3:1) Chifukwa chakuti ŵanthu anandi atuza mugulu laku Yehova chaka chechosi, pakhumbika abali akwenere kuti aphweriyengi maudindu mu mpingu. Mungalongo kuti mukhumba kuja mteŵeti wakovya asani mutesesa kuja ndi mtima wakukhumba kovya ŵanthu mu mpingu. Nthowa yimoza yo mungachitiya ivi, nkhuŵanaŵaniya vo Yesu wachitanga. (Mate. 20:28; Yoha. 4:6, 7; 13:4, 5) Asani mwayamba kusaniya likondwa chifukwa chakupaska, mukhumbisiskengi kuteŵete anyinu. (Machi. 20:35) Mwaviyo, lutirizgani kujipereka pakovya anyinu, pakunozga Nyumba ya Ufumu pamwenga kujipereka kukamba nkhani pa Unganu wa Umoyu Wachikhristu Ndipuso Uteŵeti asani yo wangupaskika waja. Kuti muje akwenere kuteŵete nge mteŵeti wakovya, mukhumbika so kuja ndi mijalidu yamampha mwakusambira Bayibolu mwakujalikiskika. (Sali. 1:1, 2; Aga. 5:22, 23) Mukhumbika so kulongo kuti mwe akugomezgeka asani mwapaskika ntchitu mu mpingu.—1 Akori. 4:2.

¹⁵ Ateŵeti akovya asankhika mwakugwiriskiya ntchitu mzimu wakupaturika kuti vinthu viyendengi umampha mu mpingu. Abali ndi azichi mu mpingu angalongo kuwonga chifukwa chakujipereka kwa ateŵeti akovya asani akoliyana nawu achigwira ntchitu zawu. Asani mpingu uchita venivi ulongongi kuti uwonga Yehova chifukwa chakupereka ateŵeti akovya, wo atovya kuti vinthu viyendengi umampha mu mpingu.—Aga. 6:10.