Malu Ngakusopiyapu

ŴANTHU wo asopa Yehova mwauneneska alamulika kuti awunganengi ndi chilatu chakuti alondiyengi ulongozgi ndipuso achiskanengi. (Ahe. 10:23-25) Malu ngakwamba ngo Ayisirayeli wo ŵenga ŵanthu aku Chiuta awungananga, ngadanikanga kuti “chihema, chihema chakukumanaku.” (Eki. 39:32, 40) Pavuli paki, Solomoni mwana waku Davidi wanguzenga nyumba yakusopiyamu kuti athamikiyengemu Chiuta. (1 Mafu. 9:3) Nyumba yakusopiyamu yeniyi yati yabwangandulika mu 607 B.C.E., Ayuda angwamba kuwungana munyumba zo azidananga kuti sinagogi, kuti asopi Chiuta. Pati pajumpha nyengu, anguzenga so nyumba yakusopiyamu ndipu ndimu asopiyanga. Yesu wasambizanga ŵanthu mumasinagogi kweniso munyumba yakusopiyamu. (Luka 4:16; Yoha. 18:20) Iyu wanguchitiska so unganu paphiri.—Mate. 5:1–7:29.

² Yesu wati wafwa, Akhristu angwamba kuwungana munyumba za abali kweniso m’malu nganyaki kuti asambizengi Malemba kweniso kuti achiskanengi ndi Akhristu anyawu. (Machi. 19:8, 9; Aro. 16:3, 5; Ako. 4:15; Fili. 2) Nyengu zinyaki, akhumbikanga kuwungana mwakubisama kuti ŵanthu wo aŵatombozganga aleki kuŵawona. Ateŵeti akugomezgeka aku Chiuta ŵenaŵa, akhumbisiskanga kuwungana m’malu ngakusopiyamu kuti ‘asambizikengi ndi Yehova.’—Yesa. 54:13.

³ Mazuŵa nganu napu maunganu ngachikhristu ngachitikiya munyumba za abali kweniso m’malu nganyaki. Kanandi unganu wakunozgeke upharazgi uchitikiya munyumba za abali. Yiwu awona kuti ndi mwaŵi ukulu ukongwa kupereka nyumba zawu. Akhristu anandi awona kuti ayanduwa chifukwa chakuzomera kuti maunganu ngenanga, ngachitikiyengi munyumba zawu.

NYUMBA YA UFUMU

⁴ Nyumba ya Ufumu, ndi malu ngakujalikiskika ngo Akaboni aku Yehova awunganamu. Kuti aje ndi Nyumba ya Ufumu, agula malu ndipu azengapu yifya pamwenga anozga ŵaka nyumba yo yengapu kali. Kuti aleki kunanga ndalama zinandi ndipuso kuti Nyumba ya Ufumu yigwirengi ntchitu mwakukwana, mipingu yinandi yingagwiriskiya ntchitu Nyumba ya Ufumu yimoza asani mphakwenere. Muvigaŵa vinyaki, awona kuti mbumampha kuchita lendi holu yakuti awunganengemu. Asani azenga Nyumba ya Ufumu yifya pamwenga anozga vinthu vinandi pa Nyumba ya Ufumu yo yengapu kali, akhumbika kuchita mwambu wakuyipatuliya kwaku Yehova. Kweni asani ayinozga vigaŵa vimanavi, akhumbika cha kuchita mwambu wenuwu.

⁵ Nyumba ya Ufumu yitenere cha kuzengeka munthowa yakuti ŵanthu azukumengi nayu. Chinanga kuti m’malu ngakupambanapambana atizizenga mwakuyanana cha, zosi zigwira ntchitu yimoza. (Machi. 17:24) Mwakukoliyana ndi dera, Nyumba za Ufumu zikhumbika kuja malu ngamampha ndipuso ngakukondwesa kuchitiyamu maunganu ngachikhristu.

⁶ Akaboni aku Yehova, aphwere ndi kunozga Nyumba za Ufumu zo awunganamu kweniso ndiwu apereka ndalama zo zitovya pa antchitu zenizi. Mu Nyumba za Ufumu zenizi, atendeska mbali ya mpasku cha pamwenga kupempha ndalama ku ŵanthu. Mu Nyumba ya Ufumu muja kabokosi kuti ŵanthu wo awungana, aponyengemu ndalama zakulipiriya vinthu vakupambanapambana pa Nyumba ya Ufumu. Yiwu achichizgika cha kweni achita viyo kutuliya pasi pa mtima.—2 Akori. 9:7.

⁷ Ŵanthu wosi mu mpingu awona kuti mbudindu wawu kupereka ndalama zakovye pa Nyumba ya Ufumu ndipuso kujipereka kugwiraku ntchitu yakuyitowesa ndi kuyinozga. Mura pamwenga mteŵeti wakovya ndiyu kanandi wapaskika udindu wakunozga ndondomeku ya ntchitu yeniyi. Kanandi timagulu ta uteŵeti nditu tigwira ntchitu yakutowesa mwakulongozgeka ndi wakuwonere kagulu pamwenga yo watimuwovya. Nyumba ya Ufumu yikhumbika kuja yakutowa mukati ndi kubwalu chifukwa yimiya Yehova ndi gulu laki.

⁸ Asani mu Nyumba ya Ufumu yimoza muwungana mipingu yinandi, ŵara a mipingu yo, ajalikiska Komiti Yakuwonere Nyumba ya Ufumu. Komiti yeniyi, yiphwere nkhani zosi zakukwaskana ndi nyumba yeniyi ndipuso malu ngo yazengekapu. Mawupu nga ŵara, ngasankha mubali yumoza kuti wateŵetiyengi nge wakukumaniska komiti yeniyi. Komiti iyi, yiwonere ntchitu yakutowesa, yiwonesesa kuti nyumba yo yinozgeka kweniso vinthu vakugwiriya ntchitu vilipu ndipu yigwira ntchitu yeniyi mwakulongozgeka ndi mawupu nga ŵara. Kuti venivi vichitiki, mipingu yosi yikhumbika kuchita vinthu mwakukoliyana.

⁹ Asani mipingu yinandi yigwiriskiya ntchitu Nyumba ya Ufumu yimoza, yikhumbika kusinthana nyengu yakuchitiya maunganu. Pakupanga ndondomeku yeniyi, ŵara akhumbika kuŵanaŵaniyana kweniso kukambiskana mwachanju. (Afi. 2:2-4; 1 Petu. 3:8) Palivi mpingu wo utenere kusankha vinthu m’malu mwa mipingu yinyaki. Asani wakuwonere dera watende mpingu umoza, mipingu yinyaki yikhumbika kusintha nyengu ya maunganu sabata yeniyo asani mphakwenere.

¹⁰ Mu Nyumba ya Ufumu mungakambikiya nkhani ya nthengwa ndipuso ya maliru asani Komiti ya Uteŵeti ya Mpingu, yazomereza. Ŵara a mu Komiti yeniyi, atenere kuŵanaŵaniya mwakuphwere pa vo apempheka ndipu amuka mwakugwiriskiya ntchitu ulongozgi wo ofesi ya nthambi yikupereka.

¹¹ Wo azomerezeka kugwiriskiya ntchitu Nyumba ya Ufumu pa nkhani zenizi, atenere kuchita vinthu mwakulongo kuti mbakhristu auneneska. Pa Nyumba ya Ufumu pakhumbika cha kuchitiyapu vinthu vo vingaguŵiska abali pamwenga vo vinganyozesa zina laku Yehova ndipuso mpingu. (Afi. 2:14, 15) Ofesi ya nthambi ndiyu yingazomereza kuti Nyumba ya Ufumu yigwiriskikiyi ntchitu mu nthowa zinyaki, nge kuchitiyamu Sukulu ya Uteŵeti wa Ufumu pamwenga Sukulu ya Uteŵeti wa Upayiniya.

¹² Nyengu zosi abali ndi azichi akhumbika kuchita vinthu mwaulemu pamalu ngakuwunganapu. Yiwu atenere kuvwala ndi kujitowesa mwaulemu kweniso kuja ndi nkharu yamampha vo vingalongo kuti atumbika maunganu. (Waku. 5:1; 1 Timo. 2:9, 10) Asani tivwiya ulongozgi wo tipaskika pa nkhani yeniyi, tilongo kuti tiwonga maunganu ngachikhristu.

¹³ Pa nyengu ya maunganu, pakhumbika cha kuŵa chechosi chakutimbanyizga. Mwaviyo, ŵana atenere kuja pamoza ndi apapi ŵawu. Apapi wo ŵe ndi ŵana anamana, atenere kuchiskika kuti aje pamalu ngo angaleka kutimbanyizga anyawu asani akhumba kutuwa kubwalu kuti akachenyi ŵana ŵawu pamwenga kuŵawovya mu nthowa zinyaki.

¹⁴ Abali akwenere, aŵikika kuti alondiyengi alendu pa maunganu ku Nyumba ya Ufumu. Yiwu atenere kuja masu, afwatukiyengi ŵanthu ndipuso achitengi vinthu mwazeru. Udindu wawu nkhutawuzga alendu ndi kuŵalonde kuti afwatuki, kovya wo aswera kuti asaniyi pakuja, kulemba nambala ya ŵanthu wo afika pa maunganu ndipuso kuwonesesa kuti mu Nyumba ya Ufumu mufunda pamwenga muzizira umampha. Asani mphakwenere, yiwu atenere kukumbuska apapi kuti awonesesengi kuti ŵana ŵawu achimbizgana cha maunganu ngechendayambi pamwenga asani ngamala ndipuso aseŵe papulatifomu cha. Abali ŵenaŵa angapempha mpapi yo we ndi mwana wakusuzga kuti waluti nayu kubwalu ndi chilatu chakuti ŵanthu anyaki aleki kutimbanyizgika ndipu atenere kuchita venivi mwachanju ndipuso mwazeru. Ntchitu yo abali wo alonde alendu agwira, yitovya kuti weyosi wakondwengi ndi maunganu. Vingaŵa umampha kuti ŵara ndi ateŵeti akovya ndiwu aje akulonde alendu.

KUZENGA NYUMBA ZA UFUMU

¹⁵ Mu nyengu ya akutumika, Akhristu anyaki ŵenga ndi vinthu vinandi vakuliŵavu kuluska anyawu. Mwaviyo, wakutumika Paulo wangulemba kuti: “Ndikhumba kuti vinandi vo mwe navu pasonu panu viwovyi pa kupeleŵere kwawu, kuti vinandi vo ŵe navu viwovyi so pa kupeleŵere kwinu, ndi chilatu chakuti paŵi kuyanana.” (2 Akori. 8:14) Mazuŵa nganu so, patuŵa “kuyanana.” Ndalama zo mipingu yipereka pacharu chosi, ziŵikika pamoza kuti ziwovyi pa kuzenga ndi kunozga Nyumba za Ufumu. Gulu laku Yehova ndipuso mipingu yo yiyanduwa ndi chovyu chenichi, yiwonga ukongwa chifukwa cha ndalama zo abali ndi azichi pacharu chosi apereka.

¹⁶ Mwakukoliyana ndi mo chigaŵa cho chiliri, ofesi ya nthambi ndiyu yisankha mipingu yo yingawungana mu Nyumba ya Ufumu yimoza. Nthambi ndiyu so yisankha malu ngakuzengapu kweniso nyengu yo angazenga Nyumba za Ufumu pamwenga kunozga zo zilipu kali muchigaŵa chaki. Asani kwachitika ngozi zachilengedu, yitovya kuti Nyumba za Ufumu zo zanangika zinozgeki ndipu nyengu zinyaki yinozga so nyumba za abali ndi azichi.

¹⁷ Ofesi ya Nthambi yigwiriskiya ntchitu abali ndi azichi akujipereka kuti aguli malu, apangi mapulanu nga Nyumba za Ufumu, atongi makalata ku boma, azengengi kweniso anozgengi Nyumba za Ufumu. Chifukwa chakuti mumadera nganandi mulivi Nyumba za Ufumu, pakhumbika abali ndi azichi anandi kuti ajipereki pa ntchitu yakuzenga. Apharazgi akubatizika akwenere ndipuso wo akhumba kugwiraku ntchitu yeniyi, achiskika kulemba fomu ndi kuyipereka ku Komiti ya Uteŵeti ya Mpingu wawu. Apharazgi ambula kubatizika nawu angawovya kuzenga pamwenga kunozga Nyumba ya Ufumu yo awunganamu.

MALU NGAKUCHITIYAPU MAUNGANU

¹⁸ Akhristu a mu nyengu ya akutumika kanandi awungananga amanavi. Kweni nyengu zinyaki, awungananga “ŵanthu anandi.” (Machi. 11:26) Mwakuyanana ŵaka, ŵanthu aku Yehova mazuŵa nganu, awungana anandi pa maunganu ngadera ndipuso ngachigaŵa. Kanandi apanga lendi malu kuti achitiyepu unganu ndipu muvigaŵa vo kulivi malu ngakwenere, agula malu kuti asopiyengepu ngo atingadana kuti, Malu Ngakuchitiyapu Maunganu.

¹⁹ Nyengu zinyaki, agula nyumba, atiyinozga ndipu atiyigwiriskiya ntchitu nge Malu Ngakuchitiyapu Maunganu. Kanandi, agula malu ndipu azengapu Malu Ngakuchitiyapu Maunganu. Malu yanga ngapambana ukulu waki mwakukoliyana ndi dera. Ofesi ya nthambi yisankha kuti yiguli nyumba pamwenga malu asani yaŵerengese unandi wa ndalama zo zikhumbikengi kweniso unandi wa ŵanthu wo awunganengepu.

²⁰ Ofesi ya nthambi yisankha abali kuti awoneriyengi Malu Ngakuchitiyapu Maunganu kweniso ntchitu yakunozga malu ngenanga. Madera ngapempheka kuti ngatowesengi malu ngenanga nyengu zosi kweniso anozga vinthu vinyaki vo vingachitiska ngozi. Abali ndi azichi akhumbika kujipereka kuti agwiri ntchitu yeniyi. Mwaviyo, mipingu yichiskika kuti yigwirengeku ntchitu yeniyi ndi mtima wosi.—Sali. 110:3; Mala. 1:10.

²¹ Nyengu zinyaki, Malu Ngakuchitiyapu Maunganu ngangagwiriskikiya so ntchitu pa vakuchitika vinyaki nge masukulu ngakusambiza Bayibolu ndipuso maunganu nga akuwonere madera. Nge mo yiliri Nyumba ya Ufumu, malu ngenanga nangu ndi malu ngakupaturika ngakusopiyapu Chiuta. Asani tiwungana pa Malu Ngakuchitiyapu Maunganu, titenere kuvwala, kujitowesa kweniso kuchita vinthu mwaulemu nge mo tichitiya asani te pa maunganu mu Nyumba ya Ufumu.

²² Ŵanthu anandi akhumukiya mugulu laku Chiuta kukumaliya kwa mazuŵa ngakumaliya nganu. Ivi vilongo kuti Yehova watititumbika. (Yesa. 60:8, 10, 11, 22) Mwaviyo, tikhumbika kulutirizga kuphwere malu ngidu ngakusopiyamu kuti ngajengi ngakukondwesa. Asani tichitengi viyo, tilongongi kuti tiwonga kuti malu ngenanga ngatitiwovya kuchiskana ndi Akhristu anyidu, po zuŵa laku Yehova liŵandika.