CHIGAŴA 3

Kuguŵa—Asani Te ndi ‘Chifukwa Chakudandawuliya’

“Mzichi munyaki mumpingu widu wangundipusikiya kuti ndamubiya ndalama. Ŵanthu anyaki mumpingu anguyivwa nkhani iyi ndipu angwamba kundinena. Pati pajumpha nyengu, iyu wangundikambiya kuti wakuziŵa kuti ndini cha ndingumubiya. Chinanga kuti wangundipepesa, kweni ndawonanga kuti ndingamugowoke cha chifukwa cha vo vinguchitika.”—Linda.

KUMBI namwi, Akhristu anyinu akukuguŵiskanipu nge mo venge ndi Linda? Nchachitima kuti anyaki aguŵiskika ukongwa ndi vakuchita va Akhristu anyawu mwakuti aleka kuteŵete Chiuta. Kumbi ndivu vakuchitikiyani?

Kumbi Walipu Yo ‘Wangatipatuska ku Chanju Chaku Chiuta’?

Kukamba uneneska, kungaŵa kwakusuzga kugowoke Akhristu anyidu asani atinangiya, chifukwa tiziŵa kuti Akhristu atenere kwanjana. (Yohane 13:34, 35) Asani Mkhristu munyidu watinangiya, tiguŵa ukongwa.—Sumu 55:12.

Bayibolu lilongo kuti nyengu zinyaki Akhristu angachita vinthu vo vingachitiska kuti anyawu aje ndi ‘chifukwa chakudandawuliya.’ (Ŵakolose 3:13) Asani venivi vatichitikiya, tingawona kuti nkhwakusuzga kugowoka. Kumbi pe cho chingatiwovya? Ŵanaŵaniyani fundu zitatu izi za m’Malemba:

Awiskefwi akuchanya aziŵa chechosi cho chichitika. Yehova wawona vosi vo vichitika kusazgapu vinthu vambula urunji vo vititichitikiya kweniso masuzgu ngo tikumana nangu chifukwa cha venivi. (Ŵahebere 4:13) Iyu vitimuŵaŵa asani tisuzgika. (Yesaya 63:9) Ndipu wakhumba cha kuti ‘suzgu pamwenga vinthu vakuguŵiska’ pamwenga chinthu chechosi chinanga wangaŵa mteŵeti waki kuti ‘vitipatuski ku chanju’ chaki. (Ŵaroma 8:35, 38, 39) Mwaviyo, tingazomerezganga cha kuti chinthu chechosi pamwenga munthu weyosi, vitipatuski kwaku Yehova.

Kugowoka kung’anamuwa kuti tizomerezga cha vinthu viheni vo vachitika. Asani tagowoke munthu, ving’anamuwa kuti tizomerezga cha vinthu viheni vo wanguchita pamwenga tiyuyuwa ubudi waki. Kumbukani kuti Yehova wazomerezga cha ubudi wamtundu wewosi ndipu wagowoka pijapija asani pe chifukwa chakuchitiya viyo. (Sumu 103:12, 13; Habakuku 1:13) Yehova watitichiska kuti tigowokiyengi anyidu chifukwa wakhumba kuti tichitengi vinthu nge mo iyu wachitiya. Iyu ‘wasunga cha vifukwa kwamuyaya.’—Sumu 103:9; Mateyu 6:14.

Tiyanduwa asani tigowoke anyidu. Kumbi tiyanduwa wuli? Ŵanaŵaniyani chakuyeruzgiyapu ichi. Tiyeruzgiyi kuti mwakoleze mwa wo nguzitu ukongwa cha. Mungasuzgika cha kukoleze mwa waviyo kwa kanyengu kamanavi. Kweni nchinthu wuli chingachitika asani mungawukoleze kwa nyengu yitali? Kumbi pangajumpha maminiti pamwenga ora limoza mwechendawutayi pasi? Kukamba uneneska, chinanga kuti uzitu wa mwa wo ungasintha cha, kweni asani mwawukoleze kwa nyengu yitali mungawona kuti wayamba kuzita ukongwa. Pavuli paki, janja linu lingazilirika. Venivi viyanana ŵaka ndi kuleka kugowoka. Asani tisunga chifukwa kwa nyengu yitali chinanga kangaŵa kachifukwa kamana, titijipweteka ŵaka taŵeni. Mwaviyo, mphakuvwika kuti Yehova watitichiska kuti tigowokiyengi anyidu ndipu tiyanduwa asani tigowoka.—Nthanthi 11:17.

Mzichi we ku Nyumba ya Ufumu, waguŵa ndipu walereska mzichi munyaki mwakukwiya — Tiyanduwa asani tigowoke anyidu

“Ndinguvwa nge Kuti Yehova Wakambiya Ini”

Nchinthu wuli cho chinguwovya Linda kuti wagowoke Mkhristu munyaki? Iyu wangulunguruka Malemba ngo ngakonkhoska vifukwa vo titenere kogowoke anyidu. (Sumu 130:3, 4) Linda wangugowoka wati waziŵa kuti asani tigowoke anyidu, Yehova nayu watitigowoke. (Ŵaefesu 4:32–5:2) Pakukonkhoska mo wanguyanduliya ndi malemba ngenanga, iyu wangukamba kuti: “Ndinguvwa nge kuti Yehova wakambiya ini.”

Pavuli paki, Linda wasunganga cha vifukwa. Iyu wangumugowoke muzichi yo wangumuguŵiska ndipu sonu atanjana ukongwa. Linda walutirizga kuteŵete Yehova. Ziŵani kuti Yehova wakhumbisiska kukuwovyani kuti namwi muchiti venivi.