CHIGAŴA 5
Weriyani kwa ‘Muliska Kweniso Yo Wawonere Maumoyu Nginu’
Kumbi vo vakonkhoskeka mukabuku yaka viyanana ndi vo vichitika pa umoyu winu? Asani ndi viyo, mwe mwija cha. Ateŵeti anandi akugomezgeka aku Chiuta, a mu nyengu yakali kweniso a mazuŵa nganu, nawu akukumanapu ndi masuzgu nge ngo mukumana nangu ndipu akumalana nangu. Yiwu anguwovyeka ndi Yehova ndipu namwi so wangakuwovyani.
Mutenere kuziŵa kuti Yehova wakuwovyeningi kuti muwere kwaku iyu
MUTENERE kuziŵa kuti Yehova wangakuwovyani kuti muwere kwaku iyu, muleki kusuzgika maŵanaŵanu, kuguŵa ndipuso kuti muje ndi njuŵi yamampha yo yikuwovyeningi kuleka kujimba mulandu. Pavuli paki, muchiskikengi kwamba so kuteŵete Yehova limoza ndi ateŵeti anyinu. Asani mwayamba so kuteŵete Yehova, muŵengi nge Akhristu a mu nyengu ya akutumika wo Petro wanguŵalembe kuti: ‘Mwenga nge mbereri zakulanda, kweni sonu mwawere kwa muliska kweniso yo wawonere maumoyu nginu.’—1 Petro 2:25.
Mungachita umampha ukongwa kuwere kwaku Yehova. Chifukwa wuli? Chifukwa mukondwesengi mtima waki. (Nthanthi 27:11) Nge mo muziŵiya, vo tichita vitimukwaska Yehova. Iyu watitichichizga cha kuti timuyanjengi ndipuso kuti timuteŵetiyengi. (Marangu 30:19, 20) Wakusanda Bayibolu munyaki wangukamba kuti: “Palivi munthu yo wangajula mtima winu. Mwaŵeni ndimwi mutenere kuwujula.” Tingajula mtima widu asani tasankha kuteŵete Yehova ndi mtima wosi chifukwa chakuti titimuyanja. Asani tachita viyo, iyu wakondwa ukongwa ndipu tilongo kuti te akugomezgeka. Kukamba uneneska, palivi chinthu cho chiyanana ndi likondwa lo tisaniya chifukwa chakuteŵete Yehova.—Machitidu 20:35; Chivumbuzi 4:11.
Asani mwayamba so kuteŵete Chiuta, muziŵengi vinandi vakukwaskana ndi iyu ndipu mujengi nayu paubwezi wakukho. (Mateyu 5:3) Mu nthowa wuli? Ŵanthu anandi atijifumba kuti: ‘Nchifukwa wuli te ndi umoyu?’ Yiwu akhumbisiska kuziŵa chilatu cha umoyu. Ivi ve viyo, chifukwa chakuti Yehova wakutilenga ndi mtima wakukhumba kuziŵa vakukwaskana ndi iyu. Iyu wakutilenga kuti timuteŵetiyengi mwalikondwa. Palivi chinthu chinyaki chakukondwesa kuluska kuteŵete Yehova chifukwa chakuti titimuyanja.—Sumu 63:1-5.
Ziŵani kuti Yehova wakhumba kuti muwere kwaku iyu. Kumbi mungasimikizga wuli kuti fundu iyi njauneneska? Ŵanaŵaniyani ivi: Kabuku yaka kakulembeka pavuli pakuromba kwaku Yehova. Ndipu mura pamwenga Mkhristu munyinu ndiyu watenere kuti wakukupaskani kabuku yaka. Pavuli pakuŵerenga vo ve m’kabuku yaka, mutenere kuti mwakwaskika. Wenuwu mbukaboni wakuti Yehova wechendakuluweni ndipu watikuguziyani kwaku iyu.—Yohane 6:44.
Tichiskika kuziŵa kuti Yehova watiŵaluwa cha ateŵeti ŵaki wo akulanda. Venivi ndivu vinguchitikiya mzichi munyaki zina laki Donna. Iyu wangukamba kuti: “Ndinguleka uneneska kamanakamana, kweni nyengu zinandi ndasanirikanga kuti ndilunguruka lemba la Sumu 139:23, 24 lo lititi: ‘Ndifufuzeni, imwi Chiuta, ndipu ziŵani mtima wangu. Ndisandeni, ndipu ziŵani maŵanaŵanu ngangu ngo ngatinditimbanyizga. Wonani asani mwaku ini mwe chechosi chiheni, ndipu ndilongozgeni mu nthowa yamuyaya.’ Ndinguziŵa kuti nde wa charu cha ndipu ndenga wakwenere cha kuja wa charu kweni ndikhumbika kuja mugulu laku Yehova. Ndinguwamu kuti Yehova wangundileka cha, m’malu mwaki ndakhumbikanga kuyesesa kuti ndiwere kwaku iyu. Sonu ndikondwa ukongwa chifukwa ndikuwere kwaku Yehova!”
“Ndinguwamu kuti Yehova wangundileka cha, m’malu mwaki ndakhumbikanga kuyesesa kuti ndiwere kwaku iyu”
Titikulombiyani kuti namwi musaniyi so ‘likondwa lo Yehova wapereka.’ (Nehemiya 8:10) Mukondwengi ukongwa asani mwawere kwaku Yehova.