Kumbi Bayibolu Lingandiwovya Wuli?

KUMBI MUNGACHITA WULI?

Ŵanaŵaniyani chakuchitika ichi: David watendesa galimotu kumalu ngachilendu. Vikwangwani vo ve mumusewu vilongo kuti wasele kumalu ko wakhumbanga cha. David waziŵa kuti walanda. Iyu watenere kuti wasele nthowa yawaka.

Kumbi mwatingi muchitengi wuli asani mwenga David?

MUŴANAŴANIYENGEPU DANKHA!

Panyaki mwatingi muchitengi ivi:

1. Kufumba nthowa.

2. Kuwona pamapu pamwenga kugwirisiya ntchitu GPS.

3. Kulutiliza ulendu chifukwa cha kuŵanaŵana kuti kunthazi musaniyengi nthowa yamampha.

Viwoneke limu kuti Sachizu C ndambula kovya.

Sachizu B ndamampha kulusa lakwamba. Chifukwa mapu pamwenga GPS vingakuwovyani pa ulendu winu wosi.

Nge mapu pamwenga GPS, Bayibolu nalu lingakuwovyani

Bayibolu lingakuwovyani

• kulimbana ndi masuzu ngo mungakumana nangu

• kuti mujiziŵi umampha kweniso kuti muje munthu wakwenere

• kuti muziŵi vo mungachita kuti mukondwengi pa umoyu winu

KUMUKA MAFUMBU NGAKUKHUMBIKA UKONGWA PA UMOYU

Kutuliya po tinguziŵiya kulongoro, tifumba mafumbu yanga.

• Ntchifukwa wuli kuchanya kuwoneka bulu?

• Kumbi nyenyezi zikupangika wuli?

Pavuli paki titamba kufumba mafumbu ngakukwasana ndi vinthu vo vichitika m’charu.

• Ntchifukwa wuli vinthu viheni vichitika?

• Ntchifukwa wuli ŵanthu atufwa?

Kwamuka kwa mafumbu ngosi ngo ŵanthu afumba kusanilika m’Bayibolu.

Kweni ŵanthu anandi akamba kuti Bayibolu ndi buku la nthanu. Akamba so kuti ndi buku lakali ndipu ndakusuza kulivwisa. Kweni Bayibolu ndakusuza nadi, pamwenga suzu ndi vo akuvwa vakukwasana ndi Bayibolu? Kumbi ŵanthu akuŵakambiya vinthu vaboza cha?

Mwakuyeruziyapu, ŵanthu akamba kuti Chiuta ndiyu wawusa charu. Kumbi venivi vingaŵa vaunenesa? Mungawona kuti vivulupi vichitika pacharu chosi, ŵanthu akumana ndi masuzu kweniso maulwilwi ngakupambanapambana. Ŵanthu atama kweniso atufwa. Ukavu ndipuso ngozi zachilengedu ve peposi. Kumbi Chiuta yo ngwachanju wangachitisa vinthu vosi ivi?

Kumbi mungayanja kuziŵa kwamuka? Mungazizwa asani mungavwa vo Bayibolu likamba!

Tikayika cha kuti mwawona kuti ulongozi wo usanilika mukabuku yaka ngwakutuliya m’Bayibolu. Akaboni aku Yehova agomeza kuti Bayibolu ndilu le ndi ulongozi wakovya. Ivi veviyo chifukwa “malemba ngosi ngakulembeka mwakulongozeka ndi Chiuta ndipu ngakuyandulisa pakusambiza, kuchenya, kunyolosa vinthu.” (2 Timote 3:16, 17) Mukhumbika kufufuza mwija mubuku lakali lenili. Lingakuwovyani chinanga kuti likulembeka kali!