Munthulumi ndi Munthukazi Akwamba wo Chiuta Wangupanga

Yehova wangunozga munda muchigaŵa cho chadanikanga kuti Edeni. Mumunda uwu mwenga maluŵa, vimiti ndipuso vinyama. Pavuli paki Chiuta wangupanga munthu wakwamba Adamu kutuliya ku dongu ndipu wanguphutiya mvuchi wa umoyu mumphunu mwaki. Kumbi uziŵa cho chinguchitika? Munthu yo wanguja wamoyu! Yehova wangukambiya Adamu kuti wawoneriyengi munda wo kweniso wadani mazina nyama zosi.

Yehova wangupaska Adamu dangu lakukhumbika ukongwa. Iyu wangukambiya Adamu kuti: ‘Ungarya vipasu va muchimiti chechosi cha mumunda kupatuwaku va muchimiti chimoza pe chapade. Asani uryengi chipasu cha muchimiti chenichi, ufwengi.’

Pavuli paki, Yehova wanguti: ‘Adamu ndimupangiyengi wakumuwovya.’ Mwaviyo, Chiuta wangugonesa Adamu tulu tikulu ndipu wanguto mbaŵala yaki yakurwandi ndi kumupangiya munthukazi. Zina laki wenga Heva. Adamu ndi Heva ndiwu ŵenga banja lakwamba. Kumbi Adamu wanguvwa wuli wati wawona muwolu waki mwenuyu? Iyu wangukondwa ukongwa ndipu wanguti: ‘Awonani vo Yehova wapanga ndi mbaŵala yangu! Iyu wenge ini.’

Yehova wangukambiya Adamu ndi Heva kuti abali ŵana, azazi charu chapasi. Iyu wakhumbanga kuti agwirengi ntchitu mwakukondwa ndi kupanga charu chosi kuja paradayisu nge mo munda wa Edeni wenge. Kweni vo Chiuta wakhumbanga ndivu vinguchitika cha. Chifukwa wuli? Tisambirengi vinandi mu mutu unyaki.