Wangubaya Muvurwa Waki Chifukwa Chakukwiya

Adamu ndi Heva ŵati adikiskika mumunda wa Edeni, ŵenga ndi ŵana anandi. Mwana wawu wakwamba Kayini wenga mulimi ndipu wachiŵi Abelu, wenga muliska wa viŵetu.

Zuŵa linyaki Kayini ndi Abelu aperekanga sembi kwaku Yehova. Kumbi sembi ntchinthu wuli? Sembi ndi mphasu yakuzirwa. Yehova wangukondwa ndi sembi yo Abelu wangupereka kweni wangukondwa cha ndi sembi yaku Kayini. Ivi vinguchitiska kuti Kayini wakwiyi ukongwa. Yehova wangutcheŵeska Kayini kuti kukwiya kungamuchitisa kuti wachiti chinthu chiheni. Kweni Kayini wanguvwiya cha.

Kayini wangukambiya Abelu kuti: ‘Tiyi tiluti kumunda.’ Pa nyengu iyi ŵenga ŵija ndipu Kayini wanguyukiya muvurwa waki ndi kumubaya. Kumbi Yehova watingi wachitengi wuli? Iyu wangulanga Kayini mwakumukambiya kuti wakaje kwakuyija, kutali ndi banja laki. Kayini wanguzomerezeka so cha kuwere ko kwajanga apapi ŵaki.

Kumbi isi tingasambiranjipu pa vo vinguchitika? Tingayamba kukwiya chifukwa chakuti vinthu vichitika mu nthowa yo isi tikhumba cha. Asani tiwona kuti tilutirizga kukwiya pamwenga anyidu atitcheŵeska kuti tayamba kukwiya, tikhumbika kusintha mwaliŵi techendachiti vinthu viheni.

Chifukwa chakuti Abelu wayanjanga Yehova kweniso wachitanga vinthu vamampha, Yehova wazakumuluwa cha. Iyu wazakumuyuska kuti wazije ndi umoyu pa nyengu yo wazamusintha charu kuja paradayisu.