Kapolu Yo Wanguvwiya Chiuta

Yosefi wenga yumoza mwa ŵana akukumaliya aku Yakobe. Aku ŵaki awonanga kuti awisewu ayanjanga ukongwa Yosefi kuluska yiwu. Kumbi uwona kuti yiwu avwanga wuli? Angwamba kumuchitiya sanji. Pavuli paki, Yosefi wangulota malotu ngo wenga wechendalotepu. Wati wakambiya aku ŵaki malotu yanga, yiwu aŵanaŵananga kuti malotu ngo ngang’anamuwanga kuti zuŵa linyaki azakumugwadiya. Mwaviyo, angumutinkha ukongwa kuluska kali!

Zuŵa linyaki aku ŵaki aku Yosefi, anguluta kuchiliska mbereri pafupi ndi tawuni ya Sekemu. Pati pajumpha nyengu, Yakobe wangutuma Yosefi kuti wakawoni aku ŵaki. Yiwu ŵati amuwona wachiza, angwamba kukambisana kuti: ‘Wakulota yo watuza ko. Tiyeni timubayi!’ Angumuko ndikumuponya muzenji litali. Yuda yo wenga yumoza wa aku ŵaki wangukamba kuti: ‘Kumubaya cha! Timugulisi ŵaka kuti wakaje kapolu.’ Mwaviyo, Yosefi angumugulisa ndi ndalama 20 za siliva kwa amalonda a ku Midiyani wo alutanga ku Ijipiti.

Pavuli paki, aku ŵaki anguto mukhanju waku Yosefi ndi kuwubiza mundopa za mbuzi ndipu anguluta nawu kwa awisewu. Yiwu angukamba kuti: ‘Kumbi mukhanju uwu ngwa mwana winu cha?’ Yakobe waŵanaŵananga kuti Yosefi wabayika ndi nyama ya mudondu. Iyu wanguliya ukongwa ndipu wakananga kupembuzgika.

Yosefi angumugulisa kuti waje kapolu ku Ijipiti kwaku Potifara yo wenga ndi udindu. Kweni Yehova wavikiliyanga Yosefi. Potifara wanguwona kuti Yosefi wagwiranga umampha ntchitu ndipu wangumugomeza. Pati pajumpha nyengu yimanavi angumusankha kuti wawoneriyengi vinthu vosi vo wenga navu.

Muwolu waku Potifara wanguwona kuti Yosefi wenga wakutowa kweniso wanthazi. Zuŵa lelosi wakambiyanga Yosefi kuti wagonani nayu. Kumbi Yosefi wanguchitanji? Iyu wangukana ndipu wangukamba kuti: ‘Awa! Kuchita venivi nkhunanga. Abwana ŵangu atindigomeza ndipu yimwi ndimwi awolu ŵawu. Asani ndingagonana namwi, ndinangiyengi Chiuta!’

Zuŵa linyaki muwolu waku Potifara wanguchichizga Yosefi kuti wagonani nayu. Mwaviyo, wangumubwaka ndi kuguza chakuvwala chaki kweni Yosefi wanguthaŵa. Potifara wati waza panyumba, muwolu waki wangumukambiya boza. Iyu wangukamba kuti Yosefi wakhumbanga kumukolere. Potifara wangukwiya ukongwa ndipu wangumuŵika mujeri kweni Yehova wangumuluwa cha Yosefi.