Yehova Wangupaska Nthazi Samusoni

Ayisirayeli anandi angwamba so kusopa angoza. Mwaviyo, Yehova wanguzomereza kuti Afilisiti alamuliyengi charu chawu. Kweni penga Ayisirayeli anyaki wo ayanjanga Yehova ndipu yumoza waki wenga Manowa. Iyu ndi muwolu waki ŵengavi mwana. Zuŵa linyaki Yehova wangutuma mungelu kuti waluti ku muwolu waku Manowa. Mungelu yo wangumukambiya kuti: ‘Wazamuja ndi mwana munthulumi. Iyu wazamutaska Ayisirayeli kwa Afilisiti. Mwana yo wazamuja Munaziri.’ Kumbi uziŵa kuti Anaziri ŵenga ayani? Ŵenga ateŵeti apade aku Yehova. Anaziri azomerezekanga cha kusenga sisi lawu.

Pati pajumpha nyengu, Manowa ndi muwolu waki angubala mwana munthulumi ndipu angumudana kuti Samusoni. Wati wakuwa, Yehova wangumupaska nthazi. Samusoni wangubaya nkharamu ndi manja. Nyengu yinyaki, wangubaya Afilisiti 30. Afilisiti ŵenaŵa amutinkhanga ndipu apenjanga nthowa yakuti amubayiyi. Zuŵa linyaki Samusoni wanguluta ku Gaza ndipu wangugona kweniko. Ndi usiku, ŵanthu anguluta pageti la tawuni iyi ndipu angumulindiza kuti amubayi ndi mulenji. Kweni pakati pa usiku, Samusoni wanguyuka ndi kuluta pageti ndipu wangulijinthuwa. Iyu wangulipinga paphewa mpaka wanguchifika nalu pachanya pa phiri lo lenga kufupi ndi Heburoni.

Pavuli paki, Afilisiti anguluta kwaku Delila yo wenga chibwezi chaku Samusoni ndipu angumukambiya kuti: ‘Tikupaskengi ndalama za siliva masawuzandi nganandi asani ungaziŵa vo vichitisa Samusoni kuti waje ndi nthazi zinandi viyo. Tikhumba kumuko ndi kumuŵika mujeri.’ Delila wanguzomera chifukwa chakuti wakhumbanga ndalama. Pakwamba Samusoni wangukana kumukambiya vo vamuchitisanga kuti wajengi ndi nthazi. Kweni Delila wangumuchichiza mpaka wangumusumuliya chisisi chaki. Samusoni wangumukambiya kuti, ‘Sisi langu likusengekapu cha chifukwa nde Munaziri. Asani angandisenga sisi, nthazi zangu zimalengi.’ Samusoni wangunanga ukongwa kukambiya Delila, asi viyo?

Delila wanguluta kuchikambiya Afilisiti nyengu yeniyo kuti: ‘Ndachiziŵa chisisi chaki.’ Iyu wanguchitisa kuti Samusoni wagoni tulu pachipakatu chaki ndipu wangukambiya munthu munyaki kuti wamusengi sisi. Delila wangudaniriza kuti: ‘Samusoni Afilisiti ŵaza!’ Samusoni wati wayuka, wanguwona kuti nthazi zaki zamala. Afilisti angumuko, angumutolo masu ndipu angumuŵika mujeri.

Zuŵa linyaki, Afilisiti masawuzandi nganandi anguwungana munyumba yo asopiyangamu chiuta wawu Dagoni ndipu adanirizanga kuti: ‘Chiuta widu watipaska Samusoni! Kamutoni! Wazitisekesepu.’ Yiwu angumuŵika pakati pa vipilala viŵi ndipu angwamba kumunyoza. Samusoni wangudaniriza kuti: ‘Yehova, chondi ndipaskeni nthazi kamoza pe.’ Kufika pa nyengu iyi, sisi laku Samusoni lingukuwa so. Iyu wangututuza vipilala va nyumba yo ndi nthazi zaki zosi. Nyumba yo yinguwa ndipu ŵanthu wosi wo ŵenga mwenimo angufwa. Samusoni nayu wangufwa.