Fumu Yakwamba ya Ayisirayeli

Yehova wangusankha akweruzga kuti alongozgengi Ayisirayeli kweni yiwu apenjanga fumu. Ayisirayeli angukambiya Samuyeli kuti: ‘Mitundu yosi yo te nayu pafupi ye ndi mafumu. Nasi tikhumba fumu.’ Samuyeli wanguwona kuti vo angukamba venga vamampha cha. Mwaviyo, wangukambiya Yehova nkhani yeniyi. Yehova wangukambiya Samuyeli kuti: ‘Ŵanthu wo akana yiwi cha kweni akana ini. Akambiyi kuti angaja ndi fumu, kweni fumu yo yazamukhumba vinandi kwaku yiwu.’ Chinanga kuti venga viyo, ŵanthu wo anguti: ‘Palivi suzgu. Tipenja fumu isi!’

Yehova wangukambiya Samuyeli kuti munthu munyaki zina laki Sauli, ndiyu wajengi fumu yakwamba. Sauli wati waluta kuchikumana ndi Samuyeli ku Rama, Samuyeli wangumusankha kuja fumu mwakumupunguliya mafuta pamutu.

Pavuli paki, Samuyeli wangudana Ayisirayeli wosi kuti waŵalongo fumu yasonu. Kweni Sauli pengavi. Kumbi waziŵa ko wenga? Iyu wangubisama mukati mu vinthu. Ŵati amusaniya, anguza nayu ko kwenga Ayisirayeli ndipu angumumika pakati pawu. Sauli wenga mutali kuluska weyosi ndipu wenga wakutowa ukongwa. Samuyeli wangukamba kuti: ‘Wonani yo Yehova wasankha.’ Ŵanthu angudaniriza kuti: ‘Fumu yije ndi umoyu utali!’

Pakwamba, Fumu Sauli yamuvwiyanga Samuyeli ndipu yachitanga vo Yehova wakhumbanga. Kweni mukuluta kwa nyengu yingusintha. Mwakuyeruzgiyapu, fumu yazomerezekanga cha kupereka sembi. Pa nyengu yinyaki, Samuyeli wangukambiya Sauli kuti wamulindizi kweni Samuyeli wanguswera ukongwa. Mwaviyo, Sauli wanguŵanaŵana kuti wapereki sembi. Kumbi Samuyeli wanguchita wuli? Iyu wangukambiya Sauli kuti: ‘Wananga kuleka kuvwiya Yehova.’ Kumbi Sauli wangusambirapu kanthu pa vo wangunangisa?

Ulendu unyaki pa nyengu yo Sauli wanguluta kuchichita nkhondu ndi Aamaleki, Samuyeli wangumukambiya kuti wakabayi weyosi. Sauli wanguyibaya cha Fumu Agagi. Yehova wangukambiya Samuyeli kuti: ‘Sauli wandisiya ndipu wandivwiya cha.’ Samuyeli wangudandawula ukongwa ndipu wangukambiya Sauli kuti: ‘Chifukwa chakuti waleka kuvwiya Yehova, iyu wasankhengi fumu yinyaki.’ Samuyeli wati wang’anamuka kuti walutengi, Sauli wanguko chakuvwala chaki ndipu chingukeluka mumphepeti. Venivi vati vachitika Samuyeli wangukambiya Sauli kuti: ‘Yehova wakulonda ufumu.’ Yehova watingi waperekengi ufumu wo ku munthu munyaki yo watingi wamuyanjengi ndi kumuvwiya.