Yosiya Wayanjanga Marangu Ngaku Chiuta

Yosiya wangwamba kulamuliya Yuda we ndi vyaka 8. Munyengu yeniyi, ŵanthu achitanga vinthu vamizimu ndipuso kusopa angoza. Pa nyengu yo Yosiya wenga ndi vyaka 16, wanguyesesa kusambira mo wangasope Yehova mu nthowa yakwenere. Po wenga ndi vyaka 20, wangwamba kuphwanya angoza ndi maguŵa nga sembi mucharu chosi cha Yuda. Pa nyengu yo Yosiya wenga ndi vyaka 26, wanguŵanaŵana kuti nyumba yaku Yehova yinozgeki.

Wasembi mura Hilikiya wangusaniya mpukutu wa Marangu ngaku Yehova munyumba yakusopiyamu. Panyaki mpukutu wenuwu wenga wo wangulemba Mozesi. Shafani yo wenga mulembi wa fumu wangupereka mpukutu wo kwaku Yosiya. Pavuli paki, Shafani wangwamba kuŵerenga Marangu ngo mwakukweza. Pa nyengu yo Yosiya wavwiskiyanga, wanguziŵa kuti ŵanthu anguleka kuvwiya Yehova kwa vyaka vinandi. Fumu Yosiya yingukambiya Hilikiya kuti: ‘Yehova wakwiya nasi ukongwa. Luta ukakambiskani nayu. Yehova wamukamba vakuti tichiti.’ Yehova wangumuka kuporote mwa mchimi munthukazi Hulida kuti: ‘Ayuda andileka. Yiwu azamulangika pa nyengu yo Yosiya wazituwapu pa ufumu chifukwa wangujiyuyuwa.’

Fumu Yosiya yati yavwa mazu yanga, yinguluta ku nyumba yakusopiyamu ndipu yingudana ŵanthu a ku Yuda. Pavuli paki, yinguŵerenga Marangu ngaku Yehova mwakukweza ku mtundu wosi. Yosiya ndi ŵanthu wosi, angulayizga kuti avwiyengi Yehova ndi mtima wawu wosi.

Ayuda anguja vyaka vinandi kwambula kuchita mwambu wa Pasika. Yosiya wati waŵerenga mu Marangu kuti akhumbikanga kuchita Pasika chaka chechosi, wangukambiya mtundu wenuwu kuti: ‘Tichitengi Pasika kwaku Yehova.’ Yosiya wangunozga kuti wapereki sembi zinandi kweniso kuti panyumba yakusopiyamu paŵi ŵanthu akumba sumu. Ayisirayeli anguchita Pasika. Pavuli paki anguchita Phwandu la viŵandi vambula chakutupisa kwa mazuŵa 7. Pengavi Pasika waviyo yo wanguchitikapu kutuliya mu mazuŵa ngaku Samuyeli. Yosiya wangungayanja ndi mtima wosi Marangu ngaku Chiuta. Kumbi utanja kusambira zaku Yehova?