Elizabeti we Ndi Mwana

Pati pajumpha vyaka 400 kutuliya po anguzenge mpanda wa Yerusalemu, wasembi munyaki zina laki Zekariya pamoza ndi muwolu waki Elizabeti, ajanga kufupi ndi tawuni yeniyi. Kutuliya pa nyengu yo angutoliyana anguja vyaka vinandi kwambula mwana. Zuŵa linyaki Zekariya wawotchanga tinthu takununkhira pa guŵa la sembi lo lenga munyumba yakusopiyamu ndipu kunguza mungelu Gabiriyeli. Zekariya wanguchita mantha kweni Gabiriyeli wanguti: ‘Ungawopanga cha. Ndakupingiya uthenga wamampha wakutuliya kwaku Yehova. Muwolu waku Elizabeti wabalengi mwana munthulumi ndipu zina laki lijengi Yohane. Yehova wasankha Yohane kuti wagwiri ntchitu yapade.’ Zekariya wangufumba kuti: ‘Ndingavigomeza wuli vo ukamba? Ini ndi muwolu wangu ndisi akukota ukongwa tingaja cha ndi mwana.’ Gabiriyeli wangukamba kuti: ‘Chiuta ndiyu wandituma kuti ndikukambiyi uthenga wenuwu. Chifukwa chakuti wandigomeza cha, ulongorongi cha mpaka po mwana wawiya.’

Zekariya wanguja nyengu yitali munyumba yakusopiyamu kuluska mo wachitiyanga kali. Wati watuwa kubwalu, ŵanthu wo alindizanga angumufumba kuti aziŵi vo vinguchitika. Zekariya walongoronga cha ndipu wakambiskananga nawu ndi manja. Ŵanthu wo anguziŵa kuti walonde uthenga kutuliya kwaku Chiuta.

Pati pajumpha nyengu, Elizabeti wanguja ndi nthumbu ndipu wangubala mwana munthulumi nge mo mungelu wangukambiya. Abwezi ŵaki kweniso abali ŵaki anguza kuziwona mwana yo. Yiwu angukondwa ukongwa. Elizabeti wangukamba kuti: ‘Zina laki waŵengi Yohane.’ Yiwu anguti: ‘Mu banja linu mulivi weyosi yo wadanika kuti Yohane. Mumudani zina la awisi lakuti Zekariya.’ Kweni Zekariya wangulemba mazu ngakuti: ‘Zina laki ndi Yohane.’ Zekariya wangwamba so kulongoro nyengu yeniyi. Nkhani iyi yinguwanda mucharu cha Yuda ndipu ŵanthu akambanga kuti: ‘Kumbi mwana mwenuyu asani wazikuwa, wazamuja munthu wa mtundu wuli?’

Pavuli paki, mzimu utuŵa unguza paku Zekariya. Ndipu wangwamba kukamba vo vazamuchitika kunthazi kuti: ‘Yehova wathamikiki. Iyu wangulayizga Abrahamu kuti wazakutitumiziya mtaski, Mesiya yo wazakutiwombo. Yohane wazamuja mchimi ndipu wazamunozga nthowa yaku Mesiya.’

Mariya, mubali waku Elizabeti nayu chingumuchitikiya chinthu chinyaki chapade. Tiyi tiwoni venivi mu mutu wapanthazi.