Pengavi cho Chinguŵalekesa Kupharazga

Pageti la nyumba yakusopiyamu, pajanga munthu munyaki yo watondekanga kwenda. Iyu wapemphesanga zuŵa lelosi. Zuŵa linyaki ndi musana, wanguwona Peturo ndi Yohane achisere munyumba yakusopiyamu. Iyu wangukamba kuti: ‘Ndipaskeniku ndalama.’ Peturo wangumuka kuti: ‘Nde ndi chinthu chinyaki chamampha kuluska ndalama cho ndingakupaska. Muzina laku Yesu, soka ndipu yenda!’ Pavuli paki, Peturo wangumuwovya kuti wasoki ndipu munthu yo wangwamba kwenda! Ŵanthu wo ŵenga penipo angukondwa ukongwa ndi chakuziziswa chenichi ndipu anandi anguvwana.

Kweni asembi ndi Asaduki angukwiya. Yiwu anguko akutumika, anguŵatole kukhoti ndipu anguŵafumba kuti: ‘Ndiyani wakupaskani nthazi zakuchizgiya munthu uyu?’ Peturo wangukamba kuti: ‘Tikulonde nthazi kutuliya kwaku Yesu Khristu, yo imwi mungumubaya.’ Alongozgi a visopa yaŵa angudaniriza kuti: ‘Muleki kukamba zaku Yesu!’ Kweni akutumika angukamba kuti: ‘Titenere kukamba zaku iyu. Tilekengi cha.’

Peturo ndi Yohane ŵati afwatulika ŵaka, anguluta kwa anyawu ndipu anguŵakambiya vo vinguchitika. Yiwu angupemphere limoza ndipu angupempha Yehova kuti: ‘Chondi tiwovyeni kuti tije ambula mantha kuti tilutirizgi kugwira ntchitu yinu.’ Yehova wanguŵapaska mzimu utuŵa ndipu angulutirizga kupharazga kweniso kuchizga ŵanthu. Anandi anguja ndi chivwanu. Asaduki anguchita sanji ukongwa ndipu anguko akutumika ndi kuŵaŵika mujeri. Kweni ndi usiku, Yehova wangutuma mungelu yo wangujula makhomu nga jeri ndipu wangukambiya akutumika wo kuti: ‘Weriyani kunyumba yakusopiyamu ndipu mukasambizi kweniko.’

Ndi mulenji, ŵanthu angukambiya Mphara Yikulu ya Milandu ya alongozgi achisopa kuti: ‘Jeri leche lakujala kweni anthulumi wo munguŵamanga atuwamu! Yiwu ŵe munyumba yakusopiyamu, asambiza ŵanthu!’ Akutumika anguwamanga so ndipu anguza nawu ku Mphara Yikulu ya Milandu. Wasembi mura wangukamba kuti: ‘Ndingukulamulani kuti mungakambanga cha zaku Yesu!’ Kweni Peturo wangumuka kuti: “Titenere kuvwiya Chiuta nge wakulamuliya kuluska ŵanthu.”

Alongozgi a visopa angukwiya ukongwa ndipu akhumbanga kubaya akutumika. Mufarisi munyaki zina laki Gamaliyeli wanguma ndi kukamba kuti: ‘Muphwere! Panyaki Chiuta we ndi ŵanthu yaŵa. Kumbi mukhumba kulimbana ndi Chiuta?’ Yiwu angumuvwiya. Akutumika ŵati aŵakwechuwa ndi nthonga, anguŵalamula so kuti aleki kupharazga ndipu anguŵakambiya kuti akengi. Yiwu anguleka cha kupharazga uthenga wamampha chifukwa cha vinthu venivi. Akutumika apharazganga mwambula mantha munyumba yakusopiyamu kweniso kunyumba ndi nyumba.