Koneliyasi Walonde Mzimu Wakupaturika

Ku Kayisareya kwenga msilikali munyaki wa Aroma zina laki Koneliyasi ndipu wachitanga vinthu vamampha. Chinanga kuti wenga Myuda cha, Ayuda amutumbikanga. Iyu wawovyanga akavu. Koneliyasi wagomezganga Yehova ndipu wapempheranga nyengu zosi. Zuŵa linyaki mungelu wanguwoneke kwaku Koneliyasi ndi kumukambiya kuti: ‘Chiuta wavwa mapempheru ngaku. Mwaviyo, tumiza anthulumi ku tawuni ya Yopa ko kwe Peturo ndipu akamudani kuti wazi kwaku yiwi.’ Nyengu yeniyo, Koneliyasi wangutuma anthulumi atatu kuti aluti ku Yopa. Tawuni iyi yenga pa mtunda wa makilomita 50 chakumwera.

Peturo we ku Yopa, wanguwona chiwona. Iyu wanguwona nyama zo Ayuda azomerezekanga cha kurya ndipu wanguvwa mazu ngakumukambiya kuti waryi. Peturo wangukana ndipu wangukamba kuti: ‘Ndechendaryepu nyama zakufipiskika pa umoyu wangu.’ Pavuli paki, wanguvwa mazu ngakuti: ‘Ungakambanga cha kuti nyama izi zakufipiskika. Chiuta wazitowesa.’ Angumukambiya so kuti: ‘Pa khomu pe ŵanthu atatu. Uluti nawu.’ Peturo wanguluta pa khomu ndipu wangufumba anthulumi wo chifukwa cho anguziya. Yiwu angumuka kuti: ‘Tatumika ndi Koneliyasi, msilikali wa Aroma. Muluti kunyumba kwaki ku Kayisareya.’ Peturo wangupempha ŵanthu wo kuti agoni kunyumba kwaki. Mawa laki, wanguluta nawu ku Kayisareya limoza ndi abali anyaki a ku Yopa.

Koneliyasi wati wawona Peturo, wangugwada. Kweni Peturo wangukamba kuti: ‘Soka! Nani nde munthu nge yiwi. Chiuta wandikambiya kuti ndizi ku nyumba kwaku chinanga kuti Ayuda asere cha munyumba za ŵanthu amitundu yinyaki. Sonu ndikambiyi chifukwa cho wandidaniya.’

Koneliyasi wangukambiya Peturo kuti: ‘Mazuŵa nganayi ngo ngajumpha, ndapempheranga kwaku Chiuta ndipu mungelu wangundikambiya kuti ndikudani. Chondi, tisambizi mazu ngaku Yehova.’ Peturo wangukamba kuti: ‘Ndaziŵa kuti Chiuta walivi sankhu. Iyu walonde weyosi yo wakhumba kumusopa.’ Peturo wanguŵasambiza vinthu vinandi vakukwaskana ndi Yesu. Pavuli paki, mzimu wakupatulika unguza paku Koneliyasi ndi wosi wo wenga nawu ndipu wosi angubatizika.