Chikhristu Chifika Muvyaru Vinandi

Akutumika anguvwiya dangu laku Yesu lakuti apharazgi uthenga wamampha pacharu chosi chapasi. Mu 47 C.E., abali a ku Antiyoke angutuma Paulo ndi Baranaba kuti akapharazgi. Apharazgi a phamphu ŵenaŵa anguchipharazga ku Asia Minor muchigaŵa cha Debe, Lusitara ndi Lukawoniya.

Paulo ndi Baranaba apharazgiyanga weyosi, wakukhupuka, mukavu, mwana pamwenga wakukota. Ŵanthu anandi anguzomera kusambira uneneska wakukwaskana ndi Khristu. Paulo ndi Baranaba ŵati apharazgiya Sejiyo Paulosi, yo wenga nduna ya ku Kupuro, munthu munyaki yo wachitanga vamasenga wakhumbanga kuŵakaniza. Paulo wangukambiya wamasenga kuti: ‘Yehova wakulangengi.’ Nyengu yeniyo, wamasenga yo wanguleka kuwona. Sejiyo Paulosi wati wawona venivi, wanguja wakusambira.

Paulo ndi Baranaba apharazganga kwekosi, ku nyumba ndi nyumba, mumisika, mumisewu ndipuso mumasinagoge. Yiwu ŵati achizga munthu wakupunduka ku Lusitara, ŵanthu wo anguwona venivi awonanga kuti yiwu mbachiuta ndipu akhumbanga kuŵasopa. Kweni Paulo ndi Baranaba anguŵakaniza ndipu angukamba kuti: ‘Musopengi Chiuta pe! Isi te ŵanthu.’ Pavuli paki, kunguza Ayuda anyaki ndipu anguchitisa kuti chigulu cho chiyukiyi Paulo. Ŵanthu ŵenaŵa, angumuponya mya, angumuguziya kubwalu kwa tawuni ndipu angumuleka kweniko chifukwa aŵanaŵananga kuti wafwa. Chinanga kuti anguchita venivi, Paulo wenga weche wamoyu! Abali anguza mwaliŵi kuzimutaska ndipu anguluta nayu so mutawuni. Pavuli paki, Paulo wanguwere ku Antiyoke.

Mu 49 C.E., Paulo wanguluta so kuchipharazga. Wati wawe kuchiwona abali ku Asia Minor, wanguluta kuchipharazga uthenga wamampha ku vigaŵa vakutali va ku Europe. Iyu wanguluta ku Filipi, ku Atesalonika, ku Atene ndi ku vigaŵa vinyaki. Pati pajumpha nyengu, wanguchipharazga ku Efeso kosi ndipu pavuli paki wanguwere ku Antiyoke. Sila, Luka ndipuso Timote yo wenga wachinyamata, anguluta limoza ndi Paulo pa ulendu wenuwu. Yiwu angujalikiska mipingu ndi kuyiwovya kuti yije yakukho. Paulo wanguja ku Korinto kwa chaka ndi hafu kuti wachiski abali. Iyu wapharazganga, wasambizanga kweniso kulemba makalata ngakuluta ku mipingu yinandi. Paulo wagwiranga so ntchitu yakupanga mahema. Pavuli paki, wanguwere ku Antiyoke.

Mu chaka cha 52 C.E., Paulo wangwambiya ku Asia Minor pa ulendu waki wachitatu. Iyu wanguchifika mpaka kunkhondi kwa Filipi ndipu pavuli paki, wanguluta ku Korinto. Paulo wangujaku vyaka vinandi ku Efeso ndipu wasambizanga, wachizganga ŵanthu ndi kovya mpingu. Zuŵa lelosi, wakambanga nkhani muholu ya sukulu. Ŵanthu anandi avwisiyanga ndipu angusintha mijalidu yawu. Paulo wati wapharazga uthenga wamampha muvyaru vinandi, pakumaliya wanguluta ku Yerusalemu.