Paulo Wangutumizika ku Roma

Ulendu wachitatu waku Paulo wakuluta kuchipharazga ungumaliya ku Yerusalemu. We kwenuku angumumanga ndi kumuŵika mujeri. Mu chiwona cho wanguwona ndi usiku, Yesu wangumukambiya kuti: ‘Ulutengi ku Roma ndipu ukapharazgi kweniko.’ Paulo angumutuzgaku ku Yerusalemu ndipu anguluta nayu ku Kayisareya ko wanguja mujeri kwa vyaka viŵi. Pa nyengu yo amumbanga mulandu pa masu paku Fesito yo wenga nduna, Paulo wangukamba kuti: ‘Ndizomerezeni kuti nkhayeruzgiki ndi Kayisara, ku Roma.’ Fesito wangumuka kuti: “Pakuti wapempha kuti uluti kwaku Kayisara, ulutengi nadi kwaku Kayisara.” Paulo angumumanga ndi kumuŵika musitima yo yalutanga ku Roma ndipu abali ŵaŵi, Luka ndi Arisitako, anguluta nayu.

Ŵe panyanja, kungwamba chimphepu chikulu ndipu chinguputa kwa mazuŵa nganandi. Weyosi waŵanaŵananga kuti afwengi. Kweni Paulo wangukamba kuti: ‘Mwaŵanthu, mumalotu mungelu wandikambiya kuti: “Ungawopanga cha Paulo. Wamufika ku Roma ndipu weyosi yo we musitima yeniyi wafwengi cha.” Mwaviyo, lekani kuchita mantha! Tifwengi cha.’

Mphepu yo yinguputa kwa mazuŵa 14. Pavuli paki, angwamba kuwona mtunda. Mtunda wenuwu wenga chirwa cha Melita. Sitima yichiyenda yingufika pasi pa mchenga ndipu yingusweka kweni ŵanthu wosi 276 wo ŵenga mu sitima yo angufwa cha. Anyaki angusambira penipo anyaki angukwera pa vimathabwa va sitima ndipu ayanjamanga mpaka kuchifika ku mtunda. Ŵati afika ku mtunda, ŵanthu a ku Melita anguŵaphwere ndipu anguŵapembe motu kuti awothi.

Pati pajumpha myezi yitatu, asilikali anguto Paulo ndi kukwera nayu sitima yinyaki kuluta ku Roma. Paulo wati wafika, abali anguza kuzimulonde. Iyu wati waŵawona wanguwonga Yehova ndipu wanguchiskika ukongwa. Chinanga kuti Paulo wangumangika, angumuzomereza kuti wajengi munyumba ya lenti ndipu penga msilikali yo wamuwoneriyanga. Iyu wanguja kwenuku kwa vyaka viŵi. Ŵanthu wo azanga kuzimuwona waŵapharazgiyanga vakukwaskana ndi Ufumu waku Chiuta ndipuso waŵasambizanga zaku Yesu. Paulo wangulembe so kalata mipingu ya ku Asia Minor ndi ku Yuda. Yehova wangugwiriskiya ntchitu Paulo kuti wapharazgi uthenga wamampha ku ŵanthu a mitundu yinyaki.