Yohane Atimukambiya vo Vichitikengi Kunthazi

Pa nyengu yo wakutumika Yohane wenga mujeri pa chirwa cha Patimo, Yesu wangumulongo viwona 16 va vinthu vo vichitikengi munthazi. Viwona venivi vinguvumbuwa mo zina laku Yehova lazamutoweseke, kuza kwa Ufumu waki ndipuso mo khumbu laku Yehova likufiskikiya kuchanya kweniso mo lazamufiskikiya pacharu chapasi.

Mu chiwona chinyaki, Yohane wanguwona Yehova we pampandu waki wachifumu wakukwezeka kuchanya. Ŵara 24 angumuzunguliya ndipu anguvwala vakuvwala vituŵa kweniso visoti vachifumu vagolidi. Ku mpandu wachifumu kwang’animanga ndipuso kwavwikanga kuliya kwa malimphezi. Ŵara 24 ŵenaŵa, agwadiyanga Yehova ndipuso amusopanga. Mu chiwona chinyaki, Yohane wanguwona ŵanthu anandi akutuwa mu mitundu, mafuku kweniso vineneru vosi wo asopanga Yehova. Yesu yo ndi Mwana wa Mbereri, waŵaliskanga ndipu waŵalongoziyanga ku maji ngakupaska umoyu. Pavuli paki, muchiwona chinyaki, Yesu wangwamba kulamuliya nge Fumu kuchanya limoza ndi ŵara 24. Mu chiwona chinyaki so, Yohane wanguwona Yesu wachita nkhondu ndi chinjoka, cho ndi Satana kweniso angelu aheni. Yesu wanguŵatuzaku kuchanya ndipu wanguŵaponya pacharu chapasi.

Pavuli paki, Yohane wanguwona chithuzi chakutowa cha Mwana wa Mbereri limoza ndi a 144,000, wo anguma Paphiri la Zioni. Iyu wanguwona so mungelu wachiphululuka kuzunguliya charu chapasi, wachikambiya ŵanthu kuti awopi Chiuta ndi kumupasa unkhankhu.

Mu chiwona so chinyaki, Yohane wanguwona nkhondu ya Aramagedoni yichichitika. Pa nkhondu iyi, Yesu ndi gulu laki la nkhondu anguthereska Satana ndi charu chaki chiheni. Mu chiwona chakumaliya, Yohane wanguwona kuti vinthu vosi ve umampha kuchanya ndipuso pacharu chapasi. Satana limoza ndi ŵanthu wosi wo amulondonga angutuzgikapu. Wosi wo ŵenga kuchanya ndi wo ŵenga pacharu chapasi, atumbikanga zina laku Yehova ndipu aliwonanga kuti ndakutowa kweniso asopanga iyu pe.