Kumbi Kusopa Kung’anamuwanji?

Kusopa kung’anamuwa “kuchita vinthu vakutumbika Chiuta pamwenga kumuyanja.” Mu Bayibolu, mazu ngo ngakufwatulikiya kuti “kusopa,” ngangang’anamuwa kupereka ulemu ukulu pamwenga kujithereska ku chinthu chamoyu. (Mate. 28:9) Mazu ngenanga ngangang’anamuwa so kusopa Chiuta wauneneska pamwenga ngoza. (Yoha. 4:23, 24) Nkhani yosi ndiyu yilongo vo mazu ngakuti “kusopa” ngang’anamuwa.

Titenere kujipereka kwaku Yehova pe yo ndi Mlengi kweniso Fumu ya Chilengedu Chosi. (Chivu. 4:10, 11) Tisopa Yehova mwa kumupaska ulemu chifukwa ndiyu Fumu ya chilengedu chosi kweniso kutumbika zina laki. (Sumu 86:9; Mate. 6:9, 10) Fundu zikuluzikulu ziŵi zenizi, kung’anamuwa ulamuliru waku Yehova wa chilengedu chosi kweniso zina laki, ndizu zikonkhoskeka ukongwa mubuku la Ezekiyeli. Mubuku la Ezekiyeli, mazu ngakuti “Yehova, Ambuya Fumu Yikulu” ngasanirika maulendu ngakukwana 217 ndipu mazu ngakuti “azamuziŵa [mwazamuziŵa] kuti ini ndini Yehova,” kweniso nganyaki ngakuyanana nangu ngasanirika maulendu ngakujumpha 60.—Ezeki. 2:4; 6:7.

Tiŵanaŵana ŵaka cha kuti tisopa, kweni vakuchita vidu ndivu vilongo. (Yako. 2:26) Asani tajipereka kwaku Yehova tilayizga kuti ndi umoyu widu wosi, timuvwiyengi nge Fumu yidu kweniso kuti titumbikengi ukongwa zina laki. Kumbukani kuti Yesu wachimuka pa nyengu yo wayesekanga kachitatu, wangulongo kuti kusopa kukoliyana ndi “uteŵeti wakupaturika.” (Mate. 4:10) Nge ŵanthu wo asopa Yehova, tikondwa kumuteŵete.a (Doto. 10:12) Titimuchitiya uteŵeti wakupaturika Chiuta widu asani tichita vinthu vo vikoliyana ukongwa ndi kusopa kweniso vo vikhumba kuti munthu wajipereki. Kumbi vinthu venivi ndi nivi?

Uteŵeti wakupaturika uchitika munthowa zakupambanapambana, ndipu ntchitu zosi zenizi Yehova watiziwona kuti zakuzirwa. Tichita uteŵeti wakupaturika asani tipharazga, tisanirika pa maunganu ku Nyumba ya Ufumu ndi kumukapu, tiphwere kweniso kuzenga malu ngidu ngakusopiyapu. Tichita so uteŵeti wakupaturika asani tichita kusopa kwa pabanja, titovya Akhristu anyidu wo akumana ndi masoka ngachilengedu, titijipereka kugwiraku ntchitu pa maunganu ngachigaŵa kweniso asani titeŵete pa Beteli. (Ahe. 13:16; Yako. 1:27) Asani mumtima mwidu ndi mumaŵanaŵanu ngidu tiwona kuti kusopa kwauneneska ntchinthu chakukhumbika ukongwa, tichita “uteŵeti wakupaturika msana ndi usiku.” Tikondwa ukongwa kuteŵete Yehova Chiuta widu!—Chivu. 7:15.