Vo Tisambira Pa Chiwona Chaku Ezekiyeli cha Nyumba Yakusopiyamu

Kusopa Kwauneneska Kukwezeka Kweniso Kuvikilirika

Nyumba yakusopiyamu yo Ezekiyeli wanguwona mu chiwona yingukwezeka chifukwa yenga “pachanya pa phiri litali ukongwa” (1). Kumbi isi takukweza kusopa kwauneneska, kung’anamuwa kukuŵika pa malu ngakwamba pa umoyu widu?

Mpanda wa malu ngosi  (2), wo unguzunguliya malu ngakulu ngambula kanthu nga nyumba yakusopiyamu (3), utitikumbuska kuti tingazomerezanga cha kuti chechosi chititimbanyizgi pakusopa Yehova. Asani “vinthu bweka” ndivu vakhumbikanga kuŵikika kutali, ndikuti munthu yo wasopa Yehova mazuŵa nganu wakhumbika cha kuchita jalidu lakufipiska pamwenga jalidu liheni!—Ezeki. 42:20.

Vitumbiku Vamuyaya

Msinji wo wasikanga kutuwa kumalu ngakupaturika nga nyumba yakusopiyamu, ungukuwa ukongwa ndipu waperekanga umoyu kweniso nyata kucharu (4). Vitumbiku venivi vazamukonkhoskeka mu Mutu 19 wa buku lenili.

Fundu Zakuyanana Kwaku Wosi

Mageti ngatalingatali (5) ndipuso mageti ngamukati (9) vititikumbusa kuti Yehova we ndi fundu zapachanya za mijalidu yamampha zo wosi wo akhumba kumusopa mwauneneska atenere kulondo. Wonani kuti mageti ngakubwalu kweniso ngamukati ngayanananga muvigaŵa vosi. Venivi vakuvwika, chifukwa marangu nga urunji ngaku Yehova ngakuyanana kwa ateŵeti ŵaki wosi, mwambula kutoliyaku kanthu udindu wo ŵe nawu pamwenga malu ngo ateŵete.

Chakurya pa Thebulu Laku Yehova

Vipinda vakuryiyamu (8) vititikumbuska kuti mu nyengu yakali ŵanthu aryiyanga limoza sembi zinyaki zo azanga nazu pa nyumba yakusopiyamu. Chifukwa cha venivi, venga nge kuti ŵanthu aturya chakurya limoza ndi Yehova Chiuta. Venivi vakupambana ndi vo vichitika mu nyumba yakusopiyamu yauzimu yo Akhristu asopiyamu mazuŵa nganu, chifukwa “sembi yimoza pe” yikuperekeka kali. (Ahe. 10:12) Chinanga kuti ve viyo, tipereka mbwenu sembi zidu zakuthamika.—Ahe. 13:15.

Fundu zo Zingasintha Cha

Mungazukuma asani mungaziŵa viŵerengeru vo mungelu wasaniyanga wachipima. Kweni viŵerengeru venivi vititisambiza fundu yakukhumbika ukongwa. Visimikiziya kuti khumbu laku Yehova lakuweziyapu kusopa kwauneneska litondekengi cha, nge mo viŵerengeru vo mungelu wasaniyanga wachipima vinguleke kusintha kweniso venge vauneneska. Chinanga kuti Ezekiyeli wangukambapu cha kuti mu chiwona wanguwonamu ŵanthu, kweni wangulemba ulongozgi wanthazi wo Yehova waperekanga kwa asembi, alongozgi kweniso ŵanthu. Ateŵeti wosi aku Chiuta akhumbika kulondo fundu Zaki za urunji.