Ntchifukwa Wuli Mukhumbika Kujipereka Kwaku Yehova?
“Usiku wunu mungelu waku Chiuta yo nditimusopa . . . wanguma pafupi nani.”—MACHI. 27:23.
1. Kumbi ndi vinthu wuli vo ŵanthu wo akhumba kubatizika atenere kuchita, nanga venivi vingachitiska kuti tijifumbi mafumbu nanga?
“KUMBI mukulapa maubudi nginu kweniso mukujipereka kwaku Yehova ndi kuzomereza kuti Yesu Khristu ndiyu nthowa yo Yehova wataskiya ŵanthu?” Lenili ndimoza mwa mafumbu ngaŵi ngo ŵanthu wo akhumba kubatizika amuka kukumaliya kwa nkhani ya ubatizu. Kweni ntchifukwa wuli Akhristu akhumbika kujipereka kwaku Yehova? Kumbi tiyanduwa wuli asani tajipereka kwaku Chiuta? Nanga ntchifukwa wuli munthu wangatondeka kusopa Chiuta mwakuzomerezeka asani wendajipereki kwaku iyu? Kuti timukiki mafumbu yanga, chakwamba tikhumbika dankha kuziŵa vo kujipereka kung’anamuwa.
2. Kumbi kujipereka kwaku Yehova kung’anamuwanji?
2 Kumbi kujipereka kwaku Chiuta kung’anamuwanji? Wonani mo wakutumika Paulo wangukonkhoske mo vinthu venge pakati paku iyu ndi Chiuta. Pa masu pa ŵanthu anandi wo ŵenga musitima yo yenga kamanavi kubira, wakutumika Paulo wangudana Yehova kuti “Chiuta yo nditimusopa [yo nde waki.]” (Machi. 27:22-24) Akhristu wosi auneneska mbaku Yehova. Kweni ŵanthu anyaki wosi mucharu ichi, ŵe “mu nthazi ya muheni yo.” (1 Yoha. 5:19) Akhristu atamba kuja aku Yehova asani ajipereka mwakwenere kwaku iyu kuziya mu pempheru. Kujipereka kwenuku ndi layizgu lo munthu wachita pakuyija kwambula kuchichizgika. Pavuli paki, iyu wabatizika mumaji.
3. Kumbi ubatizu waku Yesu ungulongonji, nanga Akhristu angamuyezga wuli mazuŵa nganu?
3 Yesu wakutipaska chakuwoniyapu pa nkhani iyi chifukwa iyu wangusankha pakuyija kuchita khumbu laku Chiuta. Yesu wanguwiya mu mtundu wa Ayisirayeli wo wenga wakujipereka kwaku Chiuta. Venivi vinguchitiska kuti nayu waje wakujipereka kwaku Chiuta kutuliya pa unamana waki. Kweni pa nyengu yo wabatizikiyanga, iyu wanguchita vinandi kuluska vo Dangu laku Mozesi lakambanga. Mazu ngaku Chiuta ngalongo kuti wangukamba kuti: “Awonani! Ndaza . . . kuzichita khumbu linu, yimwi Chiuta.” (Ahe. 10:7; Luka 3:21) Mwaviyo, ubatizu waku Yesu ungulongo kuti iyu wajipereka kwaku Chiuta ndipu wachitengi khumbu Laki. Akhristu alondo chakuwoniyapu chaki asani ajipereka kuti abatiziki. Ndipu asani Akhristu abatizika mumaji, alongo pakweru kuti yiwu akujipereka kwaku Chiuta pakuŵija kuziya mu pempheru.
Mo Tiyanduliya Asani Tajipereka Kwaku Chiuta
4. Kumbi ubwezi wa pakati paku Davidi ndi Yonatani utitisambizanji pa nkhani ya kujipereka?
4 Kujipereka kwaku Chiuta ndi nkhani yikulu. Kupambana ukongwa ndi kulayizga waka pamwenga kuchita waka phanganu lelosi. Kweni kumbi tiyanduwa wuli asani tasankha kujipereka kwaku Chiuta? Kuti tivwisi, tiyeni tiyeruzgiyi vo vichitika kuti ŵanthu aje mabwezi nga pamtima. Kuti ubwezi uje wakunozga, weyosi wakhumbika kuchitapu kanthu. Ivi ving’anamuwa kuti weyosi wakhumbika kujivwa kuti we ndi udindu wakumuŵanaŵaniya munyaki kweniso kumuwovya. Bayibolu likonkhoska za ubwezi wapade wa pakati paku Davidi ndi Yonatani. Yiwu angufika mpaka pakuchita phanganu la ubwezi wawu. (Ŵerengani 1 Samuyeli 17:57; 18:1, 3.) Chinanga kuti ubwezi wa mtundu uwu ngwakusoŵa mazuŵa nganu, kweni ŵanthu aja mabwezi nga pamtima asani weyosi wafiska chigaŵa chaki pamwenga kuti udindu waki.—Nthanthi 17:17; 18:24.
5. Kumbi kapolu wayanduwanga wuli chifukwa chakulutirizga mpaka muyaya kuja ndi abwana waki wo wajanga nayu umampha?
5 Dangu lo Chiuta wangupaska Ayisirayeli lilongo so mo ŵanthu ayanduliyanga ndi layizgu pamwenga phanganu. Mwakuyeruzgiyapu, asani kapolu wakhumba kulutirizga kuja ndi abwana ŵaki wo ajanga nayu umampha, wakhumbikanga kuchita nawu phanganu kuti waŵagwiriyengi ntchitu kwamuyaya. Dangu lakambanga kuti: “Kweni asani kapolu wakana kuluta ndipu wakamba kuti, ‘Nditanja ambuya, muwolu wangu, ndipuso ŵana ŵangu; ndikhumba cha kufwatulika,’ mbwenu mbuyaki waluti nayu pa masu paku Chiuta wauneneska. Pavuli paki wazamuluta nayu pakhomu la nyumba pamwenga pafulemu, ndipu mbuyaki wazamutolo gutu laki ndi chitungu, ndipu wazamuja kapolu waki umoyu waki wosi.”—Eki. 21:5, 6.
6, 7. (a) Kumbi ŵanthu ayanduwa wuli chifukwa chakuchita mapanganu? (b) Nanga venivi vititisambizanji pa nkhani yakuja pa ubwezi ndi Yehova?
6 Ŵanthu wo akutorana akhumbika kusunga mwakugomezgeka ukongwa malayizgu ngo akupanga. Phanganu la nthengwa lipambana ukongwa ndi phanganu la bizinesi, chifukwa munthu watijipereka ku phanganu cha, kweni ku munthu. Ŵanthu wo ajaliya waka limoza nge nthengwa kweni kwambula kuchita phanganu la nthengwa, aja ambula kuvikilirika. Ŵana ŵawu nawu aja ambula kuvikilirika. Kweni wo akutorana mwakulondo marangu, aja akujipereka ndipuso akugomezgeka ku munyawu chifukwa alondo fundu za mu Malemba. Fundu zenizi zitiŵawovya kuti ayesesengi kumalisa mwachanju masuzgu ngo angakumana nangu.—Mate. 19:5, 6; 1 Akori. 13:7, 8; Ahe. 13:4.
7 Mu nyengu yakali, ŵanthu ayanduwanga asani alemberana vo apangana pa nkhani ya bizinesi kweniso ntchitu. (Mate. 20:1, 2, 8) Venivi ndivu vichitika so mazuŵa nganu. Mwakuyeruzgiyapu, tiyanduwa ukongwa asani talemberana vo tapangana ndi munthu munyaki pa nkhani ya bizinesi pamwenga asani tasere waka ntchitu. Sonu asani phanganu litovya pa nkhani ya nthengwa, bizinesi kweniso kuti ŵanthu aje mabwezi, kwe wuli pa nkhani yakuja pa ubwezi ndi Yehova? Tiyeni sonu tiwoni mo ŵanthu ayanduliyanga mu nyengu yakali chifukwa chakujipereka kwaku Yehova Chiuta, kweniso mo kujipereka kwenuku kupambaniyana ndi malayizgu nganyaki ngosi.
Mo Ayisirayeli Anguyanduliya Chifukwa Chakujipereka Kwaku Chiuta
8. Kumbi kujipereka ko Ayisirayeli anguchita kwang’anamuwanganji?
8 Mtundu wosi wa Ayisirayeli ungujipereka kwaku Chiuta ŵati achita phanganu. Yehova wanguŵawunganisa pafupi ndi Phiri la Sinayi, ndipu wanguŵakambiya kuti: “Asani muvwiyengi mazu ngangu pa chinthu chechosi ndipuso asani musungengi phanganu langu, mwazamuja chuma changu chapade kutuliya mu mitundu yosi ya ŵanthu.” Ŵanthu wosi angumukiya pamoza mwakukoliyana kuti: “Vosi vo Yehova wakamba, tichitengi.” (Eki. 19:4-8) Chifukwa chakujipereka kwenuku, Ayisirayeli akhumbikanga kuchita vinandi. Venivi vang’anamuwanga kuti sonu ŵenga aku Yehova ndipu Yehova nayu waŵawonanga nge “chuma . . . chapade.”
9. Kumbi Ayisirayeli anguyanduwa wuli chifukwa chakujipereka kwaku Chiuta?
9 Ayisirayeli anguyanduwa chifukwa chakujipereka kwaku Yehova. Iyu wachitanga nawu vinthu mwakugomezgeka ndipu waŵaphweriyanga nge mo mpapi wachitiya. Chiuta wangukambiya Ayisirayeli kuti: “Kumbi munthukazi wangaluwa mwana waki wakonkha pamwenga kuleka kuchitiya lisungu mwana yo wakutuwa mumoyu mwaki? Chinanga kuti anthukazi ŵenaŵa angaluwa, ini ndingakuluwa cha.” (Yesa. 49:15) Yehova wanguŵapaska Dangu kuti liŵalongozgengi, achimi kuti aŵachiskengi ndipuso angelu kuti aŵavikiliyengi. Yo wakulembaku buku la Masalimo, wakulemba kuti: “[Yehova] wakambiya Yakobe mazu ngaki, kweniso wakambiya Isirayeli marangu ngaki ndi vyeruzgu vaki. Iyu wakuchitapu cha venivi ndi mitundu yinyaki.” (Salimo 147:19, 20; ŵerengani Masalimo 34:7, 19; 48:14.) Mazuŵa nganu, Yehova waŵaphweriyengi so ŵanthu wo atijipereka kwaku iyu nge mo wachitiyanga ndi mtundu wa Ayisirayeli wo ungujipereka kwaku iyu.
Ntchifukwa Wuli Tikhumbika Kujipereka Kwaku Chiuta?
10, 11. Kumbi taŵanthu tibalikiya mu banja laku Chiuta? Konkhoskani.
10 Po ŵanthu anyaki aŵanaŵaniya nkhani yakuti ajipereki kwaku Chiuta ndi kubatizika, angajifumba kuti, ‘Kumbi vingachitika cha kuti ndimusopengi waka Chiuta kwambula kujipereka kwaku iyu?’ Tiwona chifukwa cho tikhumbikiya kuchita venivi asani tiŵanaŵaniya mo vinthu viliri sonu panu pakati paku isi ndi Chiuta. Kumbukani kuti chifukwa cha ubudi waku Adamu, tosi tibalikiya kubwalu kwa banja laku Chiuta. (Aro. 3:23; 5:12) Mwaviyo, asani tikhumba kusere mu banja laku Chiuta, tikhumbika dankha kujipereka kwaku iyu. Tiyeni tiwoni chifukwa cho tikambiya viyo.
11 Taŵanthu tosi, palivi yo awisi angafiska kumupaska umoyu wakufikapu nge wo Adamu wenga nawu pakwamba. (1 Timo. 6:19) Isi tikubalikiya kubwalu kwa banja laku Chiuta, chifukwa Adamu ndi Heva ŵati abuda, taŵanthu tingutuzgikaku ku Mlengi widu yo Mbawusefwi achanju. (Yeruzgiyani ndi Dotoronome 32:5.) Kutuliya pa nyengu yeniyi, mtundu wa ŵanthu wekutali ndi banja la muchilengedu chosi laku Chiuta.
12. (a) Kumbi vingachitika wuli kuti ŵanthu akubuda aje mu banja laku Chiuta? (b) Kumbi ndi vinthu wuli vo tikhumbika kuchita techendabatiziki?
12 Chinanga kuti veviyo, weyosi pakuyija wangapempha Chiuta kuti wamuzomerezi kuja mu banja la ateŵeti ŵaki.a Pakuti isi te akubuda, kumbi venivi vingachitika nadi? Wakutumika Paulo wakulemba kuti: “Pa nyengu yo tenga arwani ŵaki . . . tinguyanjanisika kwaku Chiuta chifukwa cha nyifwa ya Mwana waki.” (Aro. 5:10) Asani tibatizika, tipempha Chiuta kuti watipaski njuŵi yamampha kuti tije akuzomerezeka ndi iyu. (1 Petu. 3:21) Kweni techendabatiziki, pe vinthu vinyaki vo tikhumbika kuchita. Tikhumbika kumuziŵa dankha Chiuta, kumugomezga, kulapa kweniso kusintha mijalidu yidu. (Yoha. 17:3; Machi. 3:19; Ahe. 11:6) Kwaja so ntchinthu chinyaki cho tikhumbika kuchita techendazomerezeki mu banja laku Chiuta? Kumbi ntchinthu wuli?
13. Ntchifukwa wuli mphakuvwika kuti asani munthu wapenja kuja mu banja laku Chiuta wakhumbika kujipereka dankha kwaku Chiuta mwakumulayizga mu pempheru?
13 Kuti munthu waje pa ubwezi ndi Chiuta ndi kusere mu banja la ateŵeti ŵaki wo atimusopa, wakhumbika dankha kumulayizga pamwenga kuti kuchita nayu phanganu. Kuti muvwisi chifukwa chaki, tiyeruzgiyi kuti ada anyaki amuchitiya lisungu mwana mulanda ndipu apenja kumuto kuti wakaje mu banja lawu. Ada wo aziŵika kuti ŵe ndi mbiri yamampha. Kweni ŵechendamuto, yiwu akhumba kuti waŵalayizgi dankha chinthu chinyaki. Sonu Ada wo akamba kuti, “Ndechendakuto kuti uje mwana wangu, ndikhumba kuziŵa asani undiwonengi nge Awusu ndipu undiyanjengi ndipuso kunditumbika.” Pavuli paki awerezgapu so kuti asani iyu wangalayizga venivi, mbwenu amutongi kuti wakaje mu banja lawu. Kumbi kuchita venivi nkhunanga? Mwakuyanana waka, Yehova wazomereza ŵanthu ŵija wo ajipereka kwaku iyu kuti aje mu banja laki mwakumulayizga mu pempheru. Bayibolu likamba kuti: “Mupereki maliŵavu nginu [mujipereki] nge sembi yamoyu, yakupaturika kweniso yakuzomerezeka kwaku Chiuta.”—Aro. 12:1.
Asani Munthu Wajipereka Walongo kuti we ndi Chanju ndi Chivwanu
14. Ntchifukwa wuli tingakamba kuti munthu walongo kuti watanja Chiuta asani wajipereka kwaku iyu?
14 Asani munthu wajipereka kwaku Yehova, walongo kuti watimuyanja kutuliya pasi pa mtima. Tingakamba kuti layizgu la kujipereka kwaku Chiuta, liyananaku ndi layizgu la nthengwa. Munthulumi wachikhristu walongo kuti watanja muwolu waki mwakumulayizga kuti wazamukuŵa wakugomezgeka kwaku iyu kwali vinthu vingazisuzga wuli. Iyu walayizga venivi kuti vimalepu waka cha, kweni mtima waki wosi utuŵa pa muwolu waki. Munthulumi wachikhristu waziŵa kuti vingachitika cha kuja ndi muwolu waki kwambula kulayizga venivi. Mwakuyanana waka, vingachitika cha kuti nasi tije mu banja laku Yehova ndi kukondwa ndi vitumbiku vakupambanapambana kwambula kulayizga dankha kuti tajipereka kwaku iyu. Mwaviyo, titijepereka kwaku Chiuta chifukwa chakuti tikhumbisiska kuja ŵanthu ŵaki chinanga kuti te akubuda ndipu te akusimikiza kuti tijengi akugomezgeka kwaku iyu kwali vinthu visuzgi wuli.—Mate. 22:37.
15. Ntchifukwa wuli tingakamba kuti munthu walongo kuti we ndi chivwanu asani wajipereka kwaku Chiuta?
15 Asani tajipereka kwaku Chiuta tilongo so kuti te ndi chivwanu. Ntchifukwa wuli tikamba viyo? Chifukwa cha chivwanu, tisimikiza kuti kuja pa ubwezi ndi Chiuta ntchinthu chamampha ukongwa. (Salimo 73:28) Tiziŵa kuti ntchipusu cha kwenda ndi Chiuta chifukwa tija pakati pa “mugonezi ukhuluku kweniso wakunyongoroka,” kweni ndi chivwanu tigomezga layizgu laku Chiuta lakuti watiwovyengi. (Afi. 2:15; 4:13) Ndipuso chinanga kuti te akubuda ndipu tinangisa vinthu, tisimikiza mtima kuti Yehova wachitengi nasi vinthu mwalisungu. (Ŵerengani Salimo 103:13, 14; Aroma 7:21-25.) Chifukwa cha chivwanu, tisimikiza kuti Yehova wazakutipaska mphotu asani tilutirizga kuja akugomezgeka.—Yobu 27:5.
Tikondwa Ukongwa Asani Tajipereka Kwaku Chiuta
16, 17. Ntchifukwa wuli munthu wakondwa asani wajipereka kwaku Yehova?
16 Yesu wakukamba fundu yauneneska yakuti: “Kupaska kuchitiska kuti munthu wakondwengi ukongwa kuluska kulonde.” (Machi. 20:35) Mwaviyo, asani munthu wajipereka kwaku Yehova, wakondwa ukongwa chifukwa watuŵa kuti wamupaska umoyu waki wosi Chiuta. Yesu wakondwanga ukongwa wachichita uteŵeti waki panu pacharu chapasi, chifukwa chakuti wenga wakupaska. Nyengu zinyaki, iyu watondekanga ndi kurya viyo kweniso kupumuwa ndi chilatu chakuti wawovyi ŵanthu kuti asaniyi nthowa ya ku umoyu. (Yoha. 4:34) Yesu wakondwanga ukongwa kuchita vinthu vo vakondwesanga mtima waku Yehova. Iyu wangukamba kuti: “Nyengu zosi ndichita vinthu vakumukondwesa.”—Yoha. 8:29; Nthanthi 27:11.
17 Yesu wakukambiya Akhristu vo angachita kuti akondwengi kweniso akhorwengi ndi umoyu. Iyu wanguti: “Asani munthu wapenja kundilondo, wajikani yija.” (Mate. 16:24) Kuchita venivi kutitiwovya kuti tije pa ubwezi ndi Yehova. Kumbi walipu munthu munyaki yo wangatiphwere mwachanju ukongwa kuluska Yehova Chiuta?
18. Ntchifukwa wuli munthu wakondwa ukongwa asani wajipereka kwaku Yehova kweniso asani walutirizga kuja wakugomezgeka kuluska kujipereka ku munthu pamwenga ku chinthu chinyaki chechosi?
18 Tikondwa ukongwa asani tajipereka kwaku Yehova kweniso asani tilutirizga kuja akugomezgeka kuluska kujipereka ku munthu pamwenga ku chinthu chinyaki chechosi. Mwakuyeruzgiyapu, ŵanthu anyaki atijipereka ndi umoyu wawu wosi kuti asaniyi chuma, kweni akondwa cha ndipuso akhorwa cha. Kweni ŵanthu wo atijipereka kwaku Yehova asaniya likondwa lamuyaya. (Mate. 6:24) Yiwu akondwa chifukwa aziŵa kuti “agwira ntchitu limoza ndi Chiuta,” chinanga kuti atijipereka kuti agwiri ntchitu cha, kweni kuti alongo kuwonga. (1 Akori. 3:9) Chiuta wawonga ukongwa asani munthu wajipereka kwaku iyu. Yehova wazakuŵaweze ku unyamata ŵanthu ŵaki wosi akugomezgeka kuti azikondwi ndi vitumbiku vaki mpaka muyaya.—Yobu 33:25; Ŵerengani Aheberi 6:10.
19. Kumbi munthu yo wajipereka kwaku Yehova wasaniya mwaŵi wuli?
19 Asani mwajipereka kwaku Yehova, muja nayu pa ubwezi wakukho. Bayibolu likamba kuti: “Ndereni kufupi ndi Chiuta, ndipu nayu wanderengi kufupi ndi yimwi.” (Yako. 4:8; Salimo 25:14) Mu nkhani yakulondopu, tiwonengi vifukwa vo vititisimikiziya kuti asani munthu wajipereka kwaku Yehova ndikuti wasankha chinthu chakwenere.
[Mazu ngamumphata]
a “Mbereri zinyaki” zaku Yesu zazamuja ŵana aku Chiuta pavuli pa vyaka 1,000. Kweni chifukwa chakuti akujipereka kwaku Chiuta, angamudana kuti ‘Ada,’ ndipu asere mu banja la ŵanthu wo asopa Yehova.—Yoha. 10:16; Yesa. 64:8; Mate. 6:9; Chivu. 20:5.
Kumbi Mungamuka Wuli?
• Kumbi kujipereka kwaku Chiuta kung’anamuwanji?
• Kumbi tiyanduwa wuli asani tajipereka kwaku Chiuta?
• Ntchifukwa wuli Akhristu akhumbika kujipereka kwaku Chiuta?
[Chithuzi]
Tikondwa ukongwa asani tajipereka kwaku Yehova kweniso asani tilutirizga kuja akugomezgeka