4 Kumbi Tingakambanji mu Pempheru?

ANANDI akamba kuti pa mapempheru ngosi ngachikhristu, pempheru lakuwoniyapu laku Yesu, lo liziŵika so kuti Pempheru la Ambuya pamwenga la Awusefwi a Kuchanya, ndilu liwerezekawerezeka ukongwa ndi ŵanthu. Kaya fundu iyi njauneneska pamwenga cha, kweni uneneska ngwakuti ŵanthu anandi atilivwisa cha pempheru ili. Ŵanthu mamiliyoni akuliloŵeza pamtima, ndipu atilikamba zuŵa lelosi. Kweni Yesu wakhumbanga venivi cha wachikamba pempheru ili. Kumbi tiziŵa wuli?

Yesu wechendakambi pempheru ili, wanguti: “Pakupemphera ungawerezangawerezanga ŵaka cha.” (Mateyu 6:7) Kumbi muwona kuti Yesu watingi wakambengi dankha mazu ngenanga asani wakhumbanga kuti ŵanthu aziloŵezengi vo wakambengi ndipuso kuti azivikambengi mwakuwerezawereza? Awa! Kweni yapa Yesu watilongonga waka vo tingakamba mu pempheru ndipuso vo tikhumbika kuvizumbuwa kukwamba asani tipemphera. Tiyeni tikambiskani vo iyu wangukamba. Pempheru lenili lisanirika pa Mateyu 6:9-13.

“Awusefwi akuchanya, zina linu litoweseki.”

Yapa Yesu wangukumbuska akusambira ŵaki wosi kuti akhumbika kupemphera kwa Awisi, a Yehova. Kweni kumbi ntchifukwa wuli zina laku Chiuta ndakukhumbika ukongwa? Nanga ntchifukwa wuli likhumbika kutoweseka pamwenga kuti kupaturika?

Ŵanthu akwamba kali ukongwa kukamba vinthu vaboza vakukwaskana ndi zina lakupaturika laku Chiuta. Satana yo ndi murwani waku Chiuta wakamba kuti Yehova ngwaboza, kweniso walamuliya mwankhaza ndipu ngwakwenere cha kulamuliya vinthu vo wakulenga Mweneku. (Genezesi 3:1-6) Ŵanthu anandi akoliyana ndi Satana ndipu asambiza kuti Chiuta ngwankhaza, watitiŵanaŵaniya cha kweniso akana kuti Iyu ndi Mlengi. Anyaki ayukiya zina laki chayilu lakuti Yehova chifukwa atilituzgamu mu Mabayibolu ndipuso akaniza ŵanthu kuligwiriskiya ntchitu.

Bayibolu lilongo kuti Chiuta wazamumalisa vinthu vosi vambula urunji venivi. (Ezekiyeli 39:7) Kuchita venivi kwazamuwovya kuti iyu wakupaskeni vosi vo mukhumbika kweniso kuti wamalisi masuzgu nginu. Munthowa wuli? Mazu ngo Yesu wangukamba pavuli paki mu pempheru laki, ngamuka fumbu lenili.

“Ufumu winu uzi.”

Mazuŵa nganu alongozgi a visopa asambiza vinthu vakupambanapambana pa nkhani ya Ufumu waku Chiuta. Kweni ŵanthu wo amuvwisiyanga Yesu wachikamba pempheru ili, aziŵanga kuti achimi aku Chiuta angukambiya limu kuti Mesiya yo ndi Mtaski wakusankhika ndi Chiuta, wazamulamuliya mu Ufumu wo wazamusintha charu. (Yesaya 9:6, 7; Daniyeli 2:44) Ufumu uwu wazamutowesa zina laku Chiuta mwakuvumbuwa maboza ngaku Satana ndi kumulonda mazaza ngaki kweniso kumalisa ntchitu zaki. Ufumu waku Chiuta wazamumalisa nkhondu, matenda, nja kweniso nyifwa. (Masalimo 46:9; 72:12-16; Yesaya 25:8; 33:24) Asani mupemphera kuti ufumu waku Chiuta uzi, ndikuti mupempha kuti malayizgu ngosi ngenanga ngafiskiki.

“Khumbu linu lichitiki panu pasi, nge kuchanya.”

Mazu yanga ngo Yesu wangukamba, ngalongore limu kuti mwambula kukayika khumbu laku Chiuta lichitikengi panu pasi nge kuchanya ko kuja Chiuta. Palivi cho chikutondekeska khumbu laku Chiuta kuchitika kuchanya; kwenuku Mwana waku Chiuta wanguchita nkhondu ndi Satana kweniso angelu wo ŵenga kuchigaŵa chaku Satana, ndipu wanguŵaponya pacharu chapasi. (Chivumbuzi 12:9-12) Mwakuyanana ndi vinthu viŵi vakwamba vo Yesu wanguzumbuwa mu pempheru laki lakuwoniyapu, chinthu chachitatu ichi nachu ntchakukhumbika ukongwa ndipu chititiwovya kuŵika maŵanaŵanu ngidu pa khumbu lidu cha, kweni laku Chiuta. Chilengedu chosi chisaniya vinthu vamampha chifukwa cha khumbu laku Chiuta ndilu nyengu zosi lichitiska kuti. Ndichu chifukwa chaki Yesu nayu, chinanga kuti wenga wakufikapu, wangukambiya Awisi kuti: “Mwakukhumba kwangu cha, kweni khumbu linu lichitiki.”—Luka 22:42.

“Mutipaski chakurya chidu cha msanawale.”

Pavuli paki, Yesu wangulongo kuti nkhunanga cha kupempha vinthu vo tikhumba. Chiuta wakana cha kumupempha vinthu vo tikhumbika zuŵa ndi zuŵa. Ndipu kuchita venivi kutitikumbusa kuti Yehova ndiyu “wapaska ŵanthu wosi umoyu, mvuchi ndi vinthu vosi.” (Machitidu 17:25) Bayibolu lilongo kuti iyu ndi mpapi wachanju yo wakondwa kupaska ŵana ŵaki vo akhumba. Kweni mwakuyanana ndi mpapi wazeru, iyu wangamupaska cha munthu vinthu vo vingamuwovya cha.

“Mutigowoke vo tinangisa.”

Kumbi mutimunangiya nadi Chiuta? Kumbi wakhumbika kuti wakugowokiyeni nadi? Ŵanthu anandi mazuŵa nganu avwisa cha kuti ubudi ntchinthu wuli ndipu awona kuti kuchita ubudi kulivi suzgu. Kweni Bayibolu lisambiza kuti ubudi ndiwu musisi wa masuzgu ngidu pakuti ndiwu uchitiska so kuti taŵanthu tifwengi. Tikubalika mu ubudi ndipuso tibuda kaŵikaŵi. Mwaviyo kuti tizije ndi umoyu wamuyaya kunthazi vithemba kuti Chiuta watigowoke. (Aroma 3:23; 5:12; 6:23) Tichiskika chifukwa cha fundu ya mu Bayibolu yakuti: “Yimwi Yehova, ndimwi wamampha ndipuso wakunozgeka kugowoka.”—Salimo 86:5.

“Titaskeni ku muheni yo.”

Kumbi muziŵa kuti mukhumbika kuvikilirika ndi Chiuta? Anandi akana kuti Satana yo waziŵika kuti “muheni yo” waliku nadi. Kweni vo Yesu wangusambiza vilongo kuti Satana waliku nadi, ndipu nyengu yinyaki wangumukamba kuti iyu ndiyu “walamuliya charu ichi.” (Yohane 12:31; 16:11) Satana wachilandizga ukongwa charu ichi mwakugwiriskiya ntchitu nthazi zaki, ndipu wakhumbisiska so kukulandizgani kuti muleki kuja pa ubwezi ndi Awusemwi a Yehova. (1 Peturo 5:8) Kweni Yehova ngwanthazi ukongwa kuphara Satana ndipu ngwakunozgeka kuvikiliya ŵanthu wo atimuyanja.

Pe vinthu vinandi vo munthu wangapemphere, ndipu mu nkhani iyi takambiskanapu waka vinthu vimanavi vakukhumbika ukongwa kutuliya mu pempheru lakuwoniyapu laku Yesu. Kumbukani vo lemba la 1 Yohane 5:14 lititikambiya vakukwaskana ndi Chiuta, lemba ili lititi: “Chechosi cho tingapempha mwakukoliyana ndi khumbu laki watitivwa.” Sonu mungaŵanaŵananga cha kuti masuzgu nginu ngamana ukongwa ndipu Chiuta wangavwa cha asani mungapemphera.—1 Peturo 5:7.

Kweni nanga wuli pa nkhani ya nyengu ndi malu ngo tingapemphere? Kumbi pe nyengu yapade ndipuso malu ngapade ngo tikhumbika kupempheriyapu?