Mosese Wenga Munthu Wakujiyuyuwa

KUMBI KUJIYUYUWA KUNG’ANAMUWANJI?

Kujiyuyuwa kung’anamuwa kuleka kujikuzga pamwenga kunyada. Munthu wakujiyuyuwa wadelera anyaki cha. Munthu weyosi wambula kufikapu yo ngwakujiyuyuwa watenere so kuja wakujisiska, kung’anamuwa kuti watenere kuziŵa vo wangatondeka kuchita.

KUMBI MOSESE WANGULONGO WULI KUTI WENGA MUNTHU WAKUJIYUYUWA?

Mosese wanguzomerezga cha kuti udindu waki umuchitiski kuja wakunyada. Kanandi asani munthu wapaskika udindu chinanga kuti ungaja umana, kujiyuyuwa kwaki pamwenga kunyada kuswera cha kuwoneke. Wakulemba mabuku munyaki wa mu vyaka va m’ma 1800, Robert G. Ingersoll wangukamba kuti: “Ŵanthu anandi akhoza kukunthiyapu masuzgu. Kweni kuti muziŵi umampha jalidu la munthu, mumupaski udindu.” Pankhani iyi, Mosese wakulongo chakuwoniyapu chamampha ukongwa cha kujiyuyuwa. Kumbi wangulongo wuli venivi?

Mosese wangupaskika udindu ukulu, chifukwa Yehova wangumutuma kuti walongozgi Ayisraele. Kweni udindu wenuwu ungumuchitiska kuja wakunyada cha. Mwakuyeruzgiyapu, ŵanaŵaniyani mo wanguyeruzgiya umampha nkhani yakusuzga yakukwaskana ndi chihara. (Maŵerengedu 27:1-11) Nkhani iyi, yenga yakusuzga ukongwa chifukwa cheruzgu chaki chatingi chiziwovyengi so pankhani zinyaki kunthazi.

Kumbi Mosese watingi wachitengi wuli? Kumbi watingi wajiwonengi kuti ngwakwenere kuyeruzga nkhani yo chifukwa chakuti iyu ndiyu walongozganga Ayisraele? Kumbi watingi wathembengi zeru zaki, vinthu vinandi vo waziŵanga, pamwenga chifukwa chakuti waziŵanga zeru zinandi zaku Yehova?

Munthu wakujikuzga ndiyu watingi wachitengi venivi. Kweni Mosese wanguchita viyo cha. Bayibolo lititikambiya kuti: “Mosese wangupereka mlandu wawu paurongo pa Ambuya.” (Maŵerengedu 27:5) Yapa, mukhoza kuwona kuti Mosese wajithembanga cha kweni wagomezganga Yehova chinanga kuti wangulongozga mtundu wa Ayisraele kwa vyaka 40. Tawona kuti Mosese wenga wakujiyuyuwa nadi.

Mosese wawonanga kuti ndiyu pe cha yo watenere kuja pa udindu. Wangukondwa ukongwa po Yehova wanguzomerezga kuti Ayisraele anyaki achitengeku nchitu za uchimi. (Maŵerengedu 11:24-29) Apongozi ŵaki ŵati amupempha kuti wapaskeku anyaki maudindu nganyaki, Mosese wangujiyuyuwa ndipu wangugwiriskiya nchitu vo angumukambiya. (Chituwa 18:13-24) Panyengu yo wenga pafupi kufwa, chinanga kuti wenga weche ndi nthazi, Mosese wangupempha Yehova kuti wasankhi munyaki kuti walutirizgi udindu waki. Yehova wati wasankha Yoswa, Mosese wanguwovya mnyamata mwenuyu ndi mtima wosi, ndipu wanguchiska ŵanthu kuti amuvwiyengi nge mlongozgi wawu, kuti akasere mu Charu Chakulayizgika. (Maŵerengedu 27:15-18; Marangu 31:3-6; 34:7) Kukamba uneneska, Mosese wanguwona kuti wenga mwaŵi ukulu ukongwa kulongozga Ayisraele pa kusopa. Kweni wawonanga kuti udindu waki nchinthu chakukhumbika ukongwa cha kuluska ŵanthu anyaki.

KUMBI ISI TISAMBIRANJIPU?

Tikhumbika cha kuja akunyada chifukwa cha udindu wo tapaskika pamwenga malusu ngo te nangu. Ziŵani ivi: Kuti Yehova watigwiriskiyi nchitu, kujiyuyuwa ndiku kutenere kuja panthazi kuluska lusu lo tingaŵa nalu. (1 Samuele 15:17) Asani titijiyuyuwa nadi, tiyesesengi kugwiriskiya nchitu ulongozgi wazeru wa m’Bayibolo wakuti: “Gomekezga mu Ambuya ndi mtima waku wosi, ndipu reka kugomezga pa chinjeru chaku wamweni.”—Nthanthi 3:5, 6.

Jalidu laku Mosese lititisambiza so kuti titenere cha kuŵanaŵaniya ukongwa kuzirwa kwidu pamwenga udindu wo te nawu.

Kumbi tingayanduwa nadi asani tilondo jalidu laku Mosese lakujiyuyuwa? Hinya! Asani tiyesesa kuja ndi jalidu lakujiyuyuwa, tisuzgikengi cha kuja ndi ŵanthu akupambanapambana, ndipu atiyanjengi nadi. Chinthu chakukhumbika ukongwa nchakuti, Yehova Chiuta yo ndi mweneku wajalidu lakujiyuyuwa lenili, watiyanjengi ukongwa. (Sumu 18:35) “Chiuta wamikana ndi akujanja, kweni wapaska wezi ku akujiyuyuwa.” (1 Petro 5:5) Ichi nchifukwa chakwenere nadi chakuti tingamuyezge Mosese!