NKHANI YA PA PEJI LAKWAMBA
Kumbi Mosese Wenga Yani?
Kumbi muŵanaŵananji asani mwavwa zina lakuti Mosese? Kumbi muŵanaŵana za . . .
mwana yo anyina angumubisa mu chiteti mumsinji wa Nile?
mnyamata yo wangulereka ndi mwana munthukazi waku Farao ku Egipiti ndipuso yo wanguluwa cha kuti wenga wachiyisraele?
munthu yo wanguja ku charu cha Midiani nge muliska kwa vyaka 40?
munthu yo wangukambiskana ndi Yehovaa panthazi pa chivwati cho chakolenga motu?
munthu yo wanguchita chiganga kupempha fumu ya ku Egipiti kuti yifwatuwi Ayisraele mu ukapolu?
munthu yo wangulongozgeka ndi Chiuta kuti wakambi za Miliri 10 yo yinguwa m’charu cha Egipiti pa nyengu yo fumu yingunyoza Chiuta muneneska?
munthu yo wangulongozga Ayisraele kuti atuwi mu Egipiti?
munthu yo wangugwiriskikiya nchitu kupatuwa Nyanja Yiyera?
munthu yo wangupaska Ayisraele Marangu 10 ngakutuliya kwaku Chiuta?
VAKUCHITIKA vosi venivi ndipuso vinyaki vingumuchitikiya Mosese. Ndichu chifukwa chaki Akhristu, Ayuda ndipuso Asilamu atimutumbika ukongwa munthu wakugomezgeka mwenuyu!
Mwambula kukayikiya, Mosese wenga mchimi yo wanguchita ‘machitidu ngakulu ndi ngakofya.’ (Marangu 34:10-12) Wanguzomera kuti Chiuta wamugwiriskiyi nchitu. Kweni Mosese wenga munthu nge mo tiliri taŵanthu tosi. Nge mo so wenge Eliya, yo wanguwoneke limoza ndi Mosese mu chiwona panyengu yo Yesu wateŵetiyanga pacharu chapasi, Mosese nayu ‘wenga munthu nge isi.’ (Yakobe 5:17; Mateyu 17:1-9) Mosese wakumananga ndi masuzgu ngakuyanana ndi ngo nasi tikumana nangu, ndipu wamalananga nangu umampha.
Kumbi mungayanja kuti muziŵi mo wachitiyanga ndi vo wakumananga navu? Ŵanaŵaniyani mijalidu yamampha yitatu yo Mosese wangulongo ndipuso vo tingasambirapu pa chakuwoniyapu chaki.
a Bayibolo likamba kuti zina laku Chiuta ndi Yehova