“Lutani Mukasambizengi Ŵanthu Amitundu Yosi Kuti Aje Akusambira”

1, 2. Kumbi tingajifumba mafumbu nanga chifukwa cha vo Yesu wangukamba pa Mateyu 24:14?

KAYA ŵanthu akoliyana nasi pamwenga atitisusa, mbamanavi ukongwa wo angakana kuti Akaboni aku Yehova aziŵika ukongwa chifukwa cha ntchitu yawu yakupharazga. Akhumba mukukumanapu ndi ŵanthu mu uteŵeti wo akamba kuti akoliyana cha ndi vo tigomeza, kweni awonga ntchitu yo tichita. Nge mo tiziŵiya, Yesu wangukamba kuti uthenga wamampha wa Ufumu wazamupharazgika pacharu chosi. (Mat. 24:14) Kweni kumbi tiziŵa wuli kuti ntchitu yo tichita yifiska vo Yesu wangukamba? Kumbi nkhujikuza asani tingakamba kuti isi ndisi tichita ntchitu iyi?

² Matchalitchi nganandi ngakamba kuti ngapharazga uthenga wamampha. Kweni yingu ngachitisa waka mapempheru ngakutchalitchi pamwenga kupharazga pa TV ndi Intaneti kweniso kupempha ŵanthu kuti akambi vo vinguŵachitikiya. Matchalitchi nganyaki ngakamba kuti ngapharazga chifukwa ngatovya ŵanthu wo asuzika pamwenga kuzenga vipatala ndi sukulu. Kumbi ivi ndivu Yesu wangulamula akusambira ŵaki kuti achitengi?

3. Mwakukoliyana ndi Mateyu 28:19, 20, kumbi ndi vinthu vinayi nivi vo akusambira aku Yesu atenere kuchita?

³ Kumbi akusambira aku Yesu ajanga waka phe, kulindiza ŵanthu kuti ndiwu azengi kwaku yiwu? Awa. Yesu wati wayuka, wangukambiya akusambira ŵaki kuti: “Mwaviyo, lutani mukasambizengi ŵanthu amitundu yosi kuti aje akusambira ŵangu, mukaŵabatizengi . . . , Mukaŵasambizengi kuti asungengi vinthu vosi vo ndikukulamulani.” (Mat. 28:19, 20) Lemba ili lilongo kuti tikhumbika kuchita vinthu vinayi. Chakwamba, titenere ‘kuluta’ ku ŵanthu. Chachiŵi, tikhumbika kuŵawovya kuti aje akusambira. Chachitatu, titenere kuŵabatiza. Ndipu chakumaliya, tikhumbika kuŵasambiza. Munthu munyaki wangukamba kuti ntchitu iyi nja Mkhristu weyosi.​—Mat. 10:7; Luka 10:3.

4. Kumbi Yesu wakambanga ‘ulovi’ nuwu?

⁴ Kumbi Yesu wang’anamuwanga kuti wakusambira weyosi wapharazgengi pakuyija pamwenga akhumbika kupharazga mwakukoliyana? Pakuti munthu yumoza wangafiska cha kupharazgiya ŵanthu “amitundu yosi,” ntchitu iyi yikhumbika kuchitika ndi ŵanthu anandi mwakukoliyana. Yesu wangulongo so fundu iyi pa nyengu yo wadananga akusambira ŵaki kuti aje “alovi a ŵanthu.”(Ŵerengani Mateyu 4:18-22.) Ulovi wo wakambanga yapa ngwa munthu yimoza cha yo wagwirisiya ntchitu mutepa pakuŵeja ndipu walindiza kuti somba yikoŵe. Kweni wakambanga ulovi wa mukwawu wo uguzika ndi ŵanthu anandi mwakukoliyana.​—Luka 5:1-11.

5. Kumbi ndi mafumbu nanga ngo tikhumbika kumuka, ndipu ntchifukwa wuli?

⁵ Kuti tiziŵi wo apharazga uthenga wamampha mazuŵa nganu, titenere kumuka mafumbu nganayi yanga:

• Kumbi ndi uthenga nuwu wo titenere kupharazga?

• Kumbi titenere kuja ndi chilatu wuli pakugwira ntchitu iyi?

• Kumbi tikhumbika kugwirisiya ntchitu nthowa nizi?

• Kumbi titenere kupharazga mpaka pani ndipuso kwa nyengu yitali wuli?

Mafumbu yanga ngatiwovyengi kuziŵa wo apharazga uthenga wakutasa ŵanthu. Ngatiwovyengi so kuti tichitengi ntchitu iyi mwachitatata.​—1 Tim. 4:16.

KUMBI NDI UTHENGA NUWU WO TITENERE KUPHARAZGA?

6. Ntchifukwa wuli mugomezga kuti Akaboni aku Yehova apharazga uthenga wakwenere?

⁶ Ŵerengani Luka 4:43. Yesu wapharazganga “uthenga wamampha wa Ufumu” ndipu wakhumbanga kuti akusambira ŵaki nawu achitengi viyo. Kumbi mbayani wo apharazga uthenga wenuwu ku mitundu yosi? Kumuka nkhwakuphweka. Mbakaboni aku Yehova. Chinanga mbanthu akususa nawu azomereza venivi. Mwakuyeruzgiyapu, wasembi munyaki wangukambiya Kaboni munyaki kuti iyu wajapu mu vyaru vakupambanapambana. Wangumukambiya so kuti wangufumba Akaboni mu vyaru vosi vo wangujaku kuti amukambiyi uthenga wo apharazga. Kumbi yiwu angumumukanji? Wasembi uyu wangukamba kuti: “Wosi ŵenga avumbwa chifukwa angundimuka chinthu chimoza. Anguti: ‘Uthenga wamampha wa Ufumu.’” Akaboni yaŵa ŵenga “avumbwa” cha kweni akambanga mwakukoliyana nge mo Akhristu aunenesa atenere kuchitiya. (1 Ŵakor. 1:10) Yiwu akambanga mwakukoliyana ndi uthenga wo we mu Chigongwi cha Alinda Chakupharazga Ufumu Waku Yehova. Magazini iyi yisanirika mu vineneru 254. Ndipu magazini pafupifupi 59 miliyoni ngasindikizika, kung’anamuwa kuti ndiyu magazini yakuwanda ukongwa pacharu chosi.

7. Kumbi tiziŵa wuli kuti aliska a Matchalitchi ngachikhristu apharazga uthenga wa Ufumu cha?

⁷ Aliska a matchalitchi apharazga uthenga wa Ufumu cha. Ndipu asani akamba kuti apharazga uthenga wa Ufumu, anandi akamba kuti uja mu mtima mwa Mkhristu. (Luka 17:21) Yiwu atiŵawovya cha ŵanthu kuziŵa kuti Ufumu waku Chiuta ndi boma lakuchanya lo liwusika ndi Yesu Khristu. Atiŵawovya so cha kuziŵa kuti boma lenili ndilu lazamutuzapu masuzgu ngo ŵanthu akumana nangu. Kweniso atovya ŵanthu cha kuziŵa kuti pambula kuswera, boma ili lazamutuzapu vinthu viheni vosi pacharu chapasi. (Chiv. 19:11-21) M’malu mwaki, yiwu akumbukiya Yesu pa Khirisimasi ndi pa Isitala. Aziŵa cha vo Yesu wazamuchita asani waziyamba kuwusa charu chapasi. Chifukwa chakuti aziŵa cha uthenga wo akhumbika kupharazga, kumbi angaziŵa chilatu cho atenere kupharazgiya?

KUMBI TITENERE KUJA NDI CHILATU WULI PAKUGWIRA NTCHITU IYI?

8. Kumbi chilatu chiheni chakupharazgiya ndi nichi?

⁸ Kumbi titenere kuja ndi chilatu wuli asani tigwira ntchitu yakupharazga? Titenere kupharazga kuti tisaniyi ndalama cha pamwenga kuzenga vinyumba vikuluvikulu. Yesu wangukambiya akusambira ŵaki kuti: “Mukupaskika kwawezi, paskani kwawezi.” (Mat. 10:8) Mazu ngaku Chiuta ngakuchitiya malonda cha. (2 Ŵakor. 2:17) Wo apharazga uthenga akhumbika kusaniliyapu phindu cha pa ntchitu yo achita. (Ŵerengani Machitidu 20:33-35.) Chinanga kuti ngatiwuziŵa ulongozgi uwu, matchalitchi nganandi ngalimbana ndi kusonkhesa ndalama pamwenga kuchita bizinesi kuti ngasaniyi ndalama zakulipiliya aliska ndi ŵanthu anyaki a ntchitu. Aliska anandi avisopa mbakukhupuka ukongwa.​—Chiv. 17:4, 5.

9. Kumbi Akaboni aku Yehova alongo wuli kuti apharazga ndi chilatu chamampha?

⁹ Kumbi mbiri ya Akaboni aku Yehova njakuti wuli pa nkhani ya mpasku? Ntchitu yawu yitendeseka ndi ndalama zo ŵanthu apereka mwakukhumba ŵija. (2 Ŵakor. 9:7) Mu Nyumba ya Ufumu atendesa mbali ya mpasku cha. Chaka chamala pe, Akaboni aku Yehova angumaliya maola pafupifupi 2 biliyoni pa ntchitu yakupharazga uthenga wamampha. Kweniso achitisanga masambiru nga Bayibolu ngakujumpha 9 miliyoni mwezi wewosi. Chakuziziswa ntchakuti yiwu alipirika cha pakuchita ntchitu iyi kweni agwirisiya ntchitu ndalama zawu. Pakukamba za ntchitu yo Akaboni aku Yehova achita, munthu munyaki wangukamba kuti: “Mtima wawu utuŵa pakupharazga ndi kusambiza. . . . Yiwu alivi aliska wo atiŵalipira. Ivi vitovya kuti aleki kunanga ndalama zinandi.” Sonu kumbi chilatu cho tigwiriya ntchitu iyi ntchakuti wuli? Tigwira ntchitu iyi mwakukhumba tija chifukwa chakuti titanja Yehova ndi ŵanthu. Mtima wakujipereka uwu ufiska vo vikukambika pa Sumu 110:3. (Ŵerengani.)

KUMBI TITENERE KUGWIRISIYA NTCHITU NTHOWA NIZI?

10. Kumbi Yesu ndi akusambira ŵaki agwirisiyanga ntchitu nthowa nizi pakupharazga?

¹⁰ Kumbi Yesu ndi akusambira ŵaki agwirisiyanga ntchitu nthowa nizi pakupharazga uthenga wamampha? Yiwu alutanga kwekosi ko angasaniya ŵanthu nge kumusika ndi munthowa. Ayendanga nyumba ndi nyumba kupenja ŵanthu akwenere. (Mat. 10:11; Luka 8:1; Mac. 5:42; 20:20) Nthowa iyi yaŵawovyanga kuti apharazgiyengi weyosi.

11, 12. Kumbi vo Matchalitchi ngachita vipambana wuli ndi vo Akaboni aku Yehova achita pa nkhani yakupharazga uthenga wamampha?

¹¹ Kumbi Matchalitchi ngachita wuli pa nkhani iyi? Ŵanthu aleke aliska ŵawu wo alipirika kuti ndiwu apharazgengi. Kweni m’malu mwakuja alovi a ŵanthu, Aliska alimbana ukongwa ndi kusunga “somba” zo abaya kali. Mbunenesa kuti nyengu zinyaki aliska anyaki achiska mbereri zawu kuti zipharazgengi. Mwakuyeruziyapu, kukwamba kwa chaka cha 2001, Papa Yohane Paulo Wachiŵi wangulemba kuti: “Kwa vyaka vinandi, ndapempha mwakuwerezawereza kuti tiyambepu so kupharazga. Sonu napu ndiwerezapu . . . Titenere kwamba so kuja ndi mtima wo Paulo wenga nawu yo wangukamba kuti: ‘Soka ini asani ndileka kupharazga uthenga wamampha.’” Papa wangukamba so kuti ntchitu iyi yitenere kuchitika ndi ŵanthu amanavi cha kweni ndi ŵanthu wosi aku Chiuta. Kweni kumbi mbalinga wo anguchita vo Papa wangukamba?

¹² Kumbi mbiri ya Akaboni aku Yehova njakuti wuli pa nkhani iyi? Ndiwu pe apharazga kuti Yesu wakwamba kuwusa mu 1914. Nge mo Yesu wangukambiya, yiwu aŵikapu mtima ukongwa pa ntchitu yakupharazga. (Marko 13:10) Buku lakuti Pillars of Faith​—American Congregations and Their Partners likamba kuti: “Akaboni aku Yehova aŵika ukongwa mtima pa ntchitu yakupharazga kuluska vinthu vinyaki.” Pakukamba za vo Kaboni munyaki wangukamba, buku ili likamba so kuti: “Asani avwa kuti anyaki alivi chakurya, achita phukwa ndipuso atama, atesesa kuŵawovya, . . . kweni aluwa cha kuti ntchitu yawu yikulu nkhupharazga uthenga wakuti charu che pafupi kumala kweniso kukhumbika kwa kutaskika.” Akaboni aku Yehova alutiriza kupharazga uthenga wenuwu ndipu agwirisiya ntchitu nthowa zo Yesu ndi akusambira ŵaki agwirisiyanga ntchitu.

KUMBI TITENERE KUPHARAZGA MPAKA PANI NDIPUSO KWA NYENGU YITALI WULI?

13. Kumbi titenere kupharazga mpaka pani?

¹³ Yesu wangukamba kuti uthenga wamampha ukhumbika kupharazgika “pacharu chosi chapasi.” (Mat. 24:14) Titenere kusambiza “ŵanthu amitundu yosi” kuti aje akusambira. (Mat. 28:19, 20) Ivi ving’anamuwa kuti tikhumbika kupharazga pacharu chosi.

14, 15. Kumbi ndi vinthu wuli vo vilongo kuti Akaboni aku Yehova afiska uchimi waku Yesu wakupharazga pacharu chosi? (Wonani vithuzi vo ve papeji 8.)

¹⁴ Sonu tiyeni tikambisani fundu zimanavi kuti tivwisi mo Akaboni aku Yehova afiskiya uchimi waku Yesu wakupharazga pacharu chosi. Ku United States kwe aliska pafupifupi 600,000 a matchalitchi ngakupambanapambana. Kweni mu charu ichi mwe Akaboni aku Yehova pafupifupi 1,200,000. Pacharu chosi chapasi, Tchalitchi cha Katolika che ndi asembi akujumpha 400,000. Sonu yanisani manambala yanga ndi chiŵerengeru cha Akaboni wo apharazga uthenga wa m’Bayibolu. Pacharu chosi chapasi, Akaboni aku Yehova pafupifupi 8 miliyoni apharazgiya ŵanthu mu vyaru 240. Yiwu achita ntchitu yikulu ukongwa! Ntchitu iyi yitovya kuti Yehova watumbikiki.​—Sumu 34:1; 51:15.

¹⁵ Isi Akaboni aku Yehova tikhumbisisa kuti tipharazgiyi ŵanthu anandi uthenga wamampha charu chechendamali. Ndichu chifukwa chaki, tipambana ndi matchalitchi nganyaki pa nkhani yakufwatuliya ndi kusindikiza mabuku. Tagaŵiya mamiliyoni nganandi nga mabuku, magazini, timapepala takudaniya ŵanthu ku unganu wachigaŵa ndi ku Chikumbusu ndipuso timapepala tinyaki kwawezi. Tifwatuliya mabuku mu vineneru vakujumpha 700. Mabayibolu ngakujumpha 200 miliyoni nga Baibulo la Dziko Latsopano la Malemba Opatulika ngasindikizika mu vineneru vakujumpha 130. Chaka chamala pe tingusindikiza mabuku 4.5 biliyoni. Pa Webusayiti yidu pasanirika vineneru vakujumpha 750. Ntchisopa nichi chinyaki cho chingachita ntchitu izi?

16. Kumbi tiziŵa wuli kuti Akaboni aku Yehova ŵe ndi mzimu waku Chiuta?

¹⁶ Kumbi ntchitu yakupharazga yitenere kugwirika kwa nyengu yitali wuli? Yesu wangukamba kuti ntchitu iyi yilutiriyengi mpaka mu nyengu zakumaliya ndipu “pavuli paki umaliru uzengi.” (Mat. 24:14) Kumbi ndi mpingu nuwu wo ulutirizga kupharazga uthenga wamampha mu nyengu zinu zakumaliya? Anyaki wo tikumana nawu mu upharazgi angakamba kuti: “Isi te ndi mzimu wakupaturika kweni imwi mugwira ntchitu yakupharazga.” Kweni kumbi kukunthiyapu ko tichita pa ntchitu yakupharazga, mbukaboni cha wakuti te ndi mzimu waku Chiuta? (Mac. 1:8; 1 Pet. 4:14) Matchalitchi nganyaki ngatesa kuchita ntchitu yo Akaboni aku Yehova achita kweni ngatondeka. Anyaki atamba kugwira ntchitu yakupharaza kwa nyengu yimanavi mbwenu aleka. Ndipu anyaki atesa kupharazga ku nyumba ndi nyumba. Kweni kumbi apharazga uthenga wuli? Kumuka kwa fumbu ili kulongore limu kuti yiwu achita ntchitu yo Khristu wanguyiyambisa cha.

KUMBI MBAYANI WO APHARAZGA UTHENGA WAMAMPHA MAZUŴA NGANU?

17, 18. (a) Ntchifukwa wuli tisimikiza kuti Akaboni aku Yehova ndiwu apharazga uthenga wamampha wa Ufumu mazuŵa nganu? (b) Kumbi ndiyani yo watitipasa nthazi kuti tilutirizi kuchita ntchitu iyi?

¹⁷ Sonu mbayani wo apharazga uthenga wa Ufumu mazuŵa nganu? Tingakamba kwambula kukayika kuti: “Mbakaboni aku Yehova!” Ntchifukwa wuli tisimikiza? Chifukwa tipharazga uthenga wakwenere wo mbuthenga wamampha wa Ufumu. Kweniso tigwirisiya ntchitu nthowa yakwenere, chifukwa isi ndisi tiluta ku ŵanthu. Ntchitu yidu yichitika ndi chilatu chamampha. Tipharazga chifukwa chakukhumba kusaniriyapu phindu cha kweni chifukwa cha chanju. Ntchitu yidu yichitika pacharu chosi. Tipharazgiya ŵanthu amitundu yosi ndi vineneru vosi. Ndipu tilutirizengi kugwira ntchitu iyi mpaka po umaliru uziyengi.

¹⁸ Tizizwa nadi ndi ntchitu yo ŵanthu aku Chiuta achita mazuŵa nganu ngakumaliya. Kweni kumbi ivi vichitika ndi nthazi yakuyani? Wakutumika Paulo wangumuka fumbu ili mu kalata yo wangulembe Akhristu a ku Filipi. Iyu wangukamba kuti: “Chiuta ndiyu watikuchiskani chifukwa cha khumbu laki lamampha. Iyu watikupasani khumbu kweniso nthazi kuti muchiti vosi vo wakhumba.” (Ŵaf. 2:13) Mwaviyo, tipempha Ada ŵidu akuchanya kuti alutirizi kutichiska kuti tifiski uteŵeti widu.​—2 Tim. 4:5.