“Ntchitu Njikulu”

KU YERUSALEMU kuchitikengi nkhumanu yakukhumbika ukongwa. Fumu Davidi yadana alongozgi, zinduna ndi ŵanthu anthazi. Yiwu akondwa ukongwa chifukwa cha chipharazgu chapade cho avwa. Yehova watuma Solomoni mwana waku Davidi kuti wazengi chinyumba chikulu cho chijengi chakusopiyamu Chiuta wauneneska. Yehova wakukambiya Davidi za pulani ya mo chinyumba chenichi chingazengeke ndipu Davidi wapereka pulani yo ku mwana waki Solomoni. Pa nyengu iyi, Davidi fumu ya Ayisraele ndipu wakota. Iyu wakamba kuti: “Ntchitu njikulu; chifukwa ndi nyumba yakusopiyamu munthu cha kweni njakusopiyamu Yehova Chiuta.”—1 Mik. 28:1, 2, 6, 11, 12; 29:1.

Pavuli paki, Davidi watiŵafumba kuti: “Sonu ndiyani yo wanozgeka musanawale kupereka mphasu kwaku Yehova?” (1 Mik. 29:5) Asani mwengapu, mwatingi muchitengi wuli? Kumbi mwatingi mujiperekengi kuti muwovyi ntchitu yikulu yeniyi? Ayisraele anguchitapu kanthu mwaliŵi. Yiwu “angukondwa chifukwa angupereka mphasu . . . pakuti angupereka mphasu kwaku Yehova ndi mtima wosi.”—1 Mik. 29:9.

Pati pajumpha vyaka vinandi, Yehova wangunozga nthowa yinyaki yakovya ukongwa kuluska nyumba yakusopiyamu. Iyu wangujalikiska nthowa yakuti ŵanthu amusopengi mwakuzomerezeka kuziya mu sembi yaku Yesu. (Ŵah. 9:11, 12) Kumbi Yehova watiŵawovya wuli ŵanthu mazuŵa nganu kuti ayanjani so ndi iyu? Watiŵawovya kuziya mu ntchitu yakusambiza ŵanthu Bayibolu. (Mat. 28:19, 20) Chifukwa cha ntchinthu yeniyi, ŵanthu mamiliyoni nganandi asambira Bayibolu ndipu ŵanthu masawuzandi abatizika kweniso mipingu yinandi yasonu yijalikisika.

Mwaviyo, chifukwa cha kukuwa kwa chiŵerengeru cha ŵanthu mugulu laku Yehova, pakhumbikengi kusindikiza mabuku nganandi, kuzenga ndi kunozga so Nyumba za Ufumu kweniso kusaniya malu ngakuchitiyaku maunganu ngakulungakulu. Kumbi imwi muzomereza kuti ntchitu yidu yakupharazga uthenga wamampha njikulu ndipuso njakuyandulisa?—Mat. 24:14.

Chifukwa cha kwanja Chiuta, ŵanthu kweniso chifukwa chakuti ntchitu yakupharazga Ufumu yikhumbika kugwirika mwaliŵi, vichitisa kuti ŵanthu aku Chiuta ‘aperekengi mphasu kwaku Yehova’ mwakukhumba kwawu. Tikondwa ukongwa ‘kutumbika Yehova ndi vinthu [vidu] vakuzirwa.’ Tikondwa so asani tiwona mo vinthu venivi vigwirisikiya ntchitu umampha kweniso mwazeru pa ntchitu yakuluska ntchitu yeyosi yo yachitika mu mbiri yosi ya ŵanthu!—Nthanthi 3:9.

Mo Anyaki Atovye Pa Ntchitu Ya Pacharu Chosi

Ŵanthu anandi mazuŵa nganu ‘asunga vinthu vinyaki pade’ pamwenga ndalama kuti akaponyi mukabokosi ko kasanirika mu Nyumba ya Ufumu ko kakulembeka kuti, “Nchitu ya Pacharu Chosi.” (1 Ŵakor. 16:2) Mwezi wewosi, mipingu yitumiza ndalama zenizi ku ofesi ya Akaboni aku Yehova ya mucharu cho. Ndalama zenizi zingatumizika so kuziya ku wupu wakuzomerezeka wo Akaboni aku Yehova agwirisiya ntchitu. Asani mukhumba kuziŵa wupu wo agwirisiya ntchitu, fumbani ku ofesi yawu. Adiresi ya ofesi ya nthambi yisanirika pa www.jw.org. Vinthu vo mungapereka ndi ivi:

NDALAMA NDI VINTHU VINYAKI

Mungatumiza ndalama kuziya ku banki. Mungatumiza so ndalama ku maofesi nga nthambi nganyaki kuziya pa jw.org pamwenga webusayiti yinyaki yo akusankha.
Mungapereka ndalama, vibangili, ndeŵereŵi pamwenga vinthu vinyaki vamampha. Pakutumiza vinthu ivi mutenere kulemba kalata yakulongo kuti mwapereka nge mphasu.

KUBWEREKESA NDALAMA

Izi ndi ndalama zo munthu wabwerekesa ofesi ya nthambi ndipu yitimuwezge asani watizikhumba.
Pakupereka ndalama izi mutenere kulemba kalata yakulongo kuti mwabwerekesa ŵaka.

NTHOWA ZINYAKI

Kusazgiyapu pakupereka ndalama ndi vinthu vinyaki vamampha, pe so nthowa zinyaki zo mungagwirisiya ntchitu kuti mupereki vinthu vinyaki vo vingawovya pa ntchitu ya Ufumu yo yichitika pacharu chosi. Mutenere kufumba dankha ku ofesi ya nthambi kuti muziŵi nthowa zo ŵanthu agwirisiya ntchitu mucharu cho muja. Mukhumbika so kufufuza msonkhu wo mungapereka pa nthowa yo mwasankha kuti mugwirisiyengi ntchitu. Mungapereka vinthu ivi:

Inshulansi: Mungasankha kupereka ndalama zinu za inshulansi pamwenga za peshoni ku ofesi ya nthambi.

Maakaunti nga ku Banki: Mungapereka ndalama zo ze ku akaunti yinu ya kubanki pamwenga mungasankha kuti ofesi ya nthambi yizilonde ndalama zo asani mwafwa. Kweni pakuchita ivi mutenere kulondo marangu nga banki.

Masheya: Asani mwe ndi masheya kukampani, mungasankha kupereke limu ndalama zamasheya nginu ku ofesi ya nthambi pamwenga mungalemba kuti yizilonde asani mwafwa.

Malu Pamwenga Nyumba: Mungasankha kupereka nyumba pamwenga malu ku ofesi ya nthambi. Mungasankha so kuti nyumba yinu yiziperekeki ku ofesi ya nthambi asani mwafwa.

Chuma cho Munthu yo Wafwa Wasiya: Mungalemba wilu yakuzomerezeka ndi boma kuti chuma chinu chiziperekeki ku ofesi ya nthambi asani mwafwa.

Kuti muziŵi mo mungapereke mphasu, julani po palembeka kuti: “Perekani Ndalama Mwakukhumba Kwinu Kuti Muwovyi pa Ntchitu Yidu.” Kamutu yaka ke pamphata pa peji lakwamba la webusayiti yidu ya jw.org pamwenga fumbani ofesi ya nthambi ya mucharu chinu.