Kumbi Muziŵa?

Kumbi amalonda wo agulisanga viŵetu munyumba yakusopiyamu ku Yerusalemu ŵenga akwenere kuŵadana kuti “ankhungu”?

MATEYU wangulemba kuti, “Yesu wangusere munyumba yakusopiyamu, wangudikisa wo agulanga ndi kugulisa vinthu munyumba yakusopiyamu ndipu wangugudubuwa mathebulu nga akusintha ndalama kweniso mipandu ya akugulisa nkhunda. Iyu wanguŵakambiya kuti: ‘Malemba ngatiti, “Nyumba yangu yazamudanika kuti nyumba yakupempheriyamu,” kweni yimwi mwayisambuska mphanji ya ankhungu.’”—Mat. 21:12, 13.

Mbiri yakali ya Ayuda yilongo kuti ŵanthu wo agulisanga malonda munyumba yakusopiyamu abiyanga makasitomala ngawu mwakuŵatchaja mitengu yikulu. Mwakuyeruzgiyapu, buku la Mishnah (Keritot 1:7) likonkhosa kuti mu nyengu ya akutumika njiŵa ziŵi azigulisanga madinari 25. Munthu wakhumbikanga kugwira ntchitu kwa mazuŵa 25 kuti wasaniyi ndalama zenizi. Munyengu yakali, ŵanthu wo ŵenga akavu azomerezekanga kupereka njiŵa pamwenga nkhunda kuti apereki sembi. Kweni mitengu ya viyuni ivi nayu yenga yakudula ukongwa. (Ŵal. 1:14; 5:7; 12:6-8) Chifukwa chakukwiya ndi vo vachitikanga, musambizi munyaki zina laki Simeon ben Gamaliel wangusisa mitengu ya vinthu. Mitengu yati yasika, munthu wakhumbikanga kugwira ntchitu kwa maola ngatatu pe kuti waguli njiŵa ziŵi.

Mwakukoliyana ndi vo vakonkhoseka pachanya yapa, Yesu waneneskanga po wangukamba kuti ŵanthu wo agulisanga malonda munyumba yakusopiyamu ŵenga “ankhungu.”