Vo Akuŵerenga Afumba

Ntchifukwa wuli vo Mateyu ndi Luka akulemba vakukwaskana ndi Yesu weche mwana vipambana?

Vo Mateyu wakulemba vakukwaskana ndi kuwa kwaku Yesu kweniso weche mwana, vipambana ndi vo Luka wakulemba chifukwa Mateyu wakonkhosa ukongwa zaku Yosefe ndipu Luka wakonkhosa ukongwa zaku Mariya.

Nkhani yaku Mateyu yikonkhosa vo Yosefe wanguchita wati wavwa waka kuti Mariya we ndi nthumbu, vo mungelu wangumukambiya mu malotu kweniso mo wanguchitiya kulongo kuti wakoliyana navu. (Mat. 1:19-25) Mateyu wakulemba vo mungelu wangukambiya Yosefe mu malotu kuti wathaŵiyi ku Egipiti kweniso ulendu waki wakuluta ku Egipiti ndi banja laki. Wakulemba so vo mungelu wangumukambiya kuti wawere ku Yisraele, ulendu waki wakuwere ku Yisraele kweniso kuti wangusankha kuchija ndi banja laki ku Nazarete. (Mat. 2:13, 14, 19-23) Mu machaputala ngakwamba nga buku la Mateyu, zina laku Yosefe lisanirikamu maulendu 8 penipo laku Mariya lisanilikamu kanayi.

Nkhani yaku Luka yikonkhosa kuti mungelu Gabriele wanguza kwaku Mariya. Yikonkhosa so kuti Mariya wanguluta kwaku Elizabeti kweniso vo Mariya wangukamba pakuthamika Yehova. (Luka 1:26-56) Yikamba so vo Simeoni wangukambiya Mariya kuti Yesu wazamusuzgika kunthazi. Chinanga mpha nyengu yo Mariya ndi Yosefe anguluta ku nyumba yakusopiyamu, po Yesu wenga ndi vyaka 12, Luka wakulemba vo Mariya wangukamba m’malu mwa vo Yosefe wangukamba. Luka wakulemba so kuti Mariya wangukwaskika ukongwa ndi vinthu ivi. (Luka 2:19, 34, 35, 48, 51) Mu machaputala ngaŵi ngakwambiriya nga buku la Luka, zina laku Mariya lisanirikamu maulendu 12 penipo laku Yosefe lisanirikamu katatu. Mwaviyo, Mateyu wakonkhosa ukongwa zaku Yosefe penipo Luka wakonkhosa ukongwa zaku Mariya.

Mateyu ndi Luka akulemba so mwakupambana mukoka waku Yesu. Nkhani yo Mateyu wakulemba yikonkhosa mukoka waku Yosefe ndipu yilongo kuti Yesu wenga wakwenere kuhara Ufumu waku Davidi pakuti wenga mwana waku Yosefe. Chifukwa wuli? Chifukwa Yosefe wenga mphapu ya Fumu Davidi kuziya mwa mwana waki Solomoni. (Mat. 1:6, 16) Kweni Luka wakonkhosa mukoka waku Mariya ndipu walongo kuti ‘mwakuliŵavu,’Yesu wenga wakwenere kuhara Ufumu waku Davidi. (Ŵar. 1:3) Chifukwa wuli? Chifukwa chakuti Mariya wenga mphapu yaku Davidi kuziya mwa mwana waki Natane. (Luka 3:31) Nanga ntchifukwa wuli pakukonkhosa mukoka Luka wakulemba cha kuti Mariya wenga mwana waku Heli? Ntchifukwa chakuti kanandi akonkhosanga mukoka wa anthurumi. Mwaviyo, pakukamba kuti Yosefe wenga mwana waku Heli, Luka wang’anamuwanga kuti wenga mukosanu waku Heli.—Luka 3:23.

Mukoka waku Yesu wo Mateyu ndi Luka angulemba, ulongo kuti iyu wenga nadi Mesiya yo Yehova wangulayizga. Fundu yakuti Yesu wenga mphapu yaku Davidi yaziŵikanga umampha ndipu Afarisi ndi Alembi nawu asuskanga cha. Mazuŵa nganu, vo Mateyu ndi Luka akulemba vakukwaskana ndi mukoka waku Yesu vititiwovya kugomezga kuti vosi vo Chiuta wakulayizga vazamufiskika.