“Kumbi Chiuta Wenga Pani?”

ASANI KWACHITIKA NGOZI, KUMBI MUKUJIFUMBAPU KUTI, ‘KUMBI CHIUTA WENGA PANI?’ PAMWENGA MWATI MWAKUMANA NDI SUZGU YINYAKI, KUMBI MUNGUJIFUMBAPU ASANI CHIUTA WATIKUŴANAŴANIYANI?

Panyaki namwi mutuvwa nge mo Sheila yo waja ku United States wavwiyanga. Iyu wangukuliya mubanja lo lapempheranga ukongwa. Kweni wanguti: “Kwambiya pa unamana wangu, ndaziŵanga kuti Chiuta waliku chifukwa ndiyu wakutilenga. Kweni ndenga nayu pa ubwezi cha. Ndagomezganga kuti Chiuta wawona vo ndichita kweni wandiwoniyanga patali ukongwa. Ndikuŵanaŵanapu cha kuti Chiuta watinditinkha kweni ndagomezganga cha kuti watindiyanja.” Ntchifukwa wuli Sheila waŵanaŵananga kuti Chiuta watimuyanja cha? Iyu wanguti: “Banja lidu lingukumana ndi masuzgu ngakundondolosana ŵaka ndipu vawonekanga nge kuti Chiuta watitiwovya cha.”

Nge Sheila, mutenere kuti namwi mugomezga kuti Chiuta Wanthazizosi waliku nadi. Kweni panyaki mukayikiya asani iyu watikuŵanaŵaniyani. Jobu yo wenga munthu murunji ndipuso yo wagomezganga kuti Mulengi ngwanthazi kweniso ngwazeru, nayu wakayikiyanga. (Jobu 2:3; 9:4) Jobu wati wakumana ndi masuzgu ngakundondozana ŵaka ngo ngawonekanga nge kuti ngamalengi cha, wangufumba Chiuta kuti: “Ntchifukwa wuli mubisa chisku chinu ndi kundiwona nge murwani winu?”​—Jobu 13:24.

Kumbi Bayibolu likambanji? Kumbi Chiuta ndiyu wachitiska masuzgu ngo tikumana nangu? Kumbi pe ukaboni wewosi wo ulongo kuti Chiuta waŵanaŵaniya ŵanthu wosi kweniso munthu weyosi pakuyija? Kumbi weyosi pakuyija wangaziŵa wuli kuti Chiuta wawona vo vititichitikiya, wavwisa masuzgu ngo tikumana nangu, watitilenge lisungu pamwenga watitiwovya asani takumana ndi masuzgu?

Nkhani zakulondopu, zikonkhoskengi vo tingasambira kutuliya ku chilengedu vo vilongo kuti Chiuta watitiŵanaŵaniya. (Aroma 1:20) Pavuli paki, tiwonengi vo Bayibolu likonkhoska kuti Chiuta watitiŵanaŵaniya. Asani mulutirizgengi ‘kumuziŵa’ umampha Chiuta kuziya mu vinthu vo wakulenga kweniso mu Mazu ngaki, mukayikiyengi cha kuti “iyu watikuphweriyani.”​—1 Yohane 2:3; 1 Peturo 5:7.