Kumbi Ndiyani Yo Wachitiska Masuzgu?

Asani ndi Chiuta cha yo wachitiska masuzgu, nanga ntchifukwa wuli pacharu ukavu umala cha, pachitika ngozi zachilengedu, ŵanthu asoŵa chakurya, anandi atufwa ndi nkhondu, kweniso pe matenda ngakulungakulu? Bayibolu lo ndi Mazu Ngaku Chiuta, likonkhoska vifukwa vitatu vikuluvikulu vo vichitiska kuti ŵanthu asuzgikengi:

1. Kujiyanja, Mbunu Kweniso Kutinkhana. “Munthu wapweteka munthu munyaki pakumulamuliya.” (Wakutaula 8:9) Kanandi, ŵanthu asuzgika chifukwa cha vinthu vambula urunji vo ŵanthu ambula kufikapu, akujiyanja kweniso ankhaza atiŵachitiya.

2. Nyengu Ndipuso Vinthu Vamabuchibuchi. Nyengu zinandi ŵanthu asuzika chifukwa chakuti “nyengu ndipuso vinthu vamabuchibuchi viwiya weyosi.” (Wakutaula 9:11) Ivi ving’anamuwa kuti ŵanthu angakumana ndi masuzgu chifukwa chakuti asanirika pamalu ngaheni kweniso pa nyengu yiheni, ngozi, kuleka kuphwere ndipuso chifukwa chakuti anangisa vinthu vinyaki.

3. Muheni Ndiyu Walamuliya Charu Chosi. Bayibolu likonkhoska mwakuvwika umampha chifukwa chikulu cho chichitiska kuti ŵanthu asuzgikengi. Ilu likamba kuti: “Charu chosi che mu nthazi ya muheni yo.” (1 Yohane 5:19) “Muheni yo,” ndi Satana Dyaboli. Satana ndi mungelu wanthazi yo pakwamba wenga mungelu waku Chiuta kweni “wakumapu cha mu uneneska.” (Yohane 8:44) Angelu anyaki angukoliyana ndi Satana ndipu angugarukiya Chiuta kuti afiski makhumbiru ngawu ngakujiyanja. Chifukwa cha venivi yiwu akujisambusa kuja viŵanda. (Chiyambo 6:1-5) Kwambiya pa nyengu yo Satana ndi angelu ŵaki angugarukiya, yiwu ŵe ndi nthazi kweniso achitiska kuti vinthu vankhaza vichitikengi pacharu. Vinthu vankhaza venivi vichitika ukongwa mu nyengu yidu yinu. Mazuŵa nganu, Satana we ndi ukali ukulu ndipu “walandizga charu chosi chapasi” vo vichitiska kuti ‘pacharu chapasi pachitikengi masuzgu.’ (Chivumbuzi 12:9, 12) Kukamba uneneska, Satana ngwakulamuliya wankhaza ukongwa. Iyu wakondwa ukongwa asani wawona ŵanthu asuzgika. Mwaviyo, ndi Chiuta cha yo wachitiska kuti ŵanthu asuzgikengi kweni ndi Satana.

ŴANAŴANIYANI FUNDU IYI: Ndi munthu wankhaza pe kweniso yo wachita vinthu viheni yo wangachitiska kuti ŵanthu ambula kunanga asuzgikengi. Mwakupambana ndi munthu waviyo, Bayibolu likamba kuti: “Chiuta ntchanju.” (1 Yohane 4:8) Mwakukoliyana ndi jalidu la chanju lo Chiuta we nalu, “Chiuta wauneneska wangachita cha uheni, Wanthazizosi wanganangisa cha!”​—Jobu 34:10.

Kweni mungajifumba kuti, ‘Kumbi Chiuta Wanthazizosi wazomerezengi Satana kulamuliya mwankhaza mpaka zuŵanji?’ Nge mo tawone, Chiuta wativitinkha ukongwa vinthu viheni kweniso watuvwa kuŵaŵa mumtima asani wawona ŵanthu asuzgika. Ndipuso, Mazu ngaki ngatitichiska kuti: ‘Tiponyengi paku iyu vosi vo vititifipiska mtima, chifukwa iyu watitiphwere.’ (1 Peturo 5:7) Chiuta watitiyanja ndipu iyu we ndi nthazi zakumalisiya masuzgu ngosi kweniso vinthu vambula urunji. Nkhani yakulondopu yikonkhoskengi venivi.a