Asani Kwachitika Masoka Ngachilengedu

“Pakwamba taŵanaŵananga kuti vinthu vijengi umampha cha. Vinthu vosi vo tenga navu vingunangika ndi vimaba vo vinguphulika kweniso kusapaliya kwa maji.”—Andrew, wa ku Sierra Leone.

“Chimphepu cha hurricane chati chamala tinguwere kunyumba kwidu. Tingusaniya kuti pengavi kamampha. Yapa tingusoŵa chakuchita. Mwana wangu munthukazi wangugwada ndipu wanguliya.”—David, wa ku Virgin Islands.

ASANI namwi mukutaskikapu kwati kwachitika masoka ngachilengedu, mutenere kuti muvwisa umampha masuzgu ngo ŵanthu wo akutaskikapu akumana nangu. Yiwu aguŵa, atondeka kuzomereza vo vachitika, atimbanyizgika maŵanaŵanu, afipa mtima kweniso asoŵa tulu. Anandi mwa ŵanthu ŵenaŵa aŵavi nthazi zakuti achitengi vo vingaŵawovya kuti vinthu viyambi so kuŵayende umampha pa umoyu wawu.

Asani namwi vinthu vinu vikunangikiya limu chifukwa cha masoka ngachilengedu, panyaki muwona kuti mungafiska so cha kukunthiyapu. Mungayamba kuŵanaŵana kuti umoyu winu ngwambula phindu. Kweni Bayibolu likonkhoska kuti umoyu winu ngwaphindu ndipuso kuti mungaja ndi vifukwa vakuvwika vakugomezge kuti kunthazi vinthu vazamuja umampha.

KUZIŴA UNENESKA WA M’BAYIBOLU KUTITIWOVYA KUZIŴA KUTI UMOYU NGWAPHINDU

Lemba la Wakutaula 7:8 likamba kuti: “Umaliru wa chinthu utuŵa wamampha kuphara kwamba kwaki.” Asani mwayamba kunozga vinthu vo vanangika chifukwa cha masoka ngachilengedu, mungayamba kukayikiya. Kweni asani muzikira pakunozga vinthu venivi kweniso kuŵikiyapu mtima, vinthu vingayamba so kwenda umampha.

Bayibolu likukambiya limu kuti yizengi nyengu yo “chiwawa chakuliya pamwenga kutenje chifukwa cha masuzgu, vazamuvwika so cha.” (Yesaya 65:19) Venivi vazamuchitika nadi asani charu chazija paradayisu mu Ufumu waku Chiuta. (Sumu 37:11, 29) Masoka ngachilengedu ngazamuja mbiri yakali. Ndipu vinthu vosi vo vititipweteka mtima ndipuso kusuzgika maŵanaŵanu kwa nyengu yitali, vazamutuwapu kwamuyaya. Ve viyo chifukwa Chiuta Wanthazizosi walayizga kuti: “Vinthu vakali vazamukumbukika so cha, kweniso vazamusere so mumtima cha.”—Yesaya 65:17.

Aŵanaŵaniyani waka: Mlengi wanozga kuti “mulindizgengi vinthu vamampha kunthazi.” Vinthu venivi mbumoyu wachimangu mu Ufumu waki, wo wazamulamuliya mwaurunji. (Yeremiya 29:11) Kumbi kuziŵa fundu ya uneneska yeniyi, kungakuwovyani kuti muwonengi kuti umoyu winu ngwaphindu? Hinya! Sally yo tamuzumbuwa mu nkhani yakwamba wangukamba kuti: “Kujikumbusa vinthu vakukondwesa vo Ufumu waku Chiuta wazakutichitiya kunthazi, kutovya kuti ulekengi kuŵanaŵaniya vinthu viheni vo vikuchitika kuvuli. M’malu mwaki, ukunthiyapu waka.”

Titikupemphani kuti musambiri vinandi vo Ufumu waku Chiuta wazamuchitiya ŵanthu kunthazi. Kuchita venivi kungakuwovyani kuziŵa kuti chinanga kuti mungasuzgika ndi masoka ngachilengedu, kweni umoyu winu ngwaphindu sonu, po mulindizga nyengu yo masoka ngenanga ngazamumaliya limu kunthazi. Pasonu panu, Bayibolu lipereka waka ulongozgi wo ungakuwovyani kuti mukunthiyengepu masuzgu ngo mungakumana nangu asani kwachitika masoka ngachilengedu. Wonani vakuyeruzgiyapu vimanavi waka.

Mavesi nga m’Bayibolu ngo Ngangawovya

Mugonengi Mwakukwana.

“Kupumuwa kamanavi nkhwamampha kuluska kugwira ntchitu mwaphamphu ndipuso kutchimbiza mphepu.”—Wakutaula 4:6.

Akuchita kafukufuku akamba kuti asani munthu wakumana ndi masuzgu ngakulu, wakhumbika kugona mwakukwana. ‘Kweni asani watondeka kuchita viyo, masuzgu ngasazgikiyaku ndipuso wangayamba kusuzgika ukongwa maŵanaŵanu.’ Mwaviyo, mukhumbika kugona mwakukwana.

Mukambiyengeku anyinu mo muvwiya.

“Vinthu vo munthu wafipa navu mtima, vitimuweze vuli [pamwenga “vitimuguŵiska,” mazu ngamumphata], kweni mazu ngamampha ngatimuchiska.”—Nthanthi 12:25.

Mukambiyengeku munthu wa m’banja linu pamwenga mubwezi winu wapamtima mo muvwiya. Yiwu avwisiyengi masuzgu nginu, akuchiskeningi ndi mazu ngamampha kweniso akupaskeningi ulongozgi wakovya.a

Muŵanaŵaniyengi nyengu yo vinthu vazamuja umampha kunthazi.

“Mwakukoliyana ndi layizgu laki [Chiuta], tilindizga kuchanya kufya ndi charu chapasi chifya, ndipu mwenumu mwazamuja urunji.”—2 Peturo 3:13.

a Munthu yo wasuzgika maŵanaŵanu kwa nyengu yitali pamwenga wajaliya waka kufipa mtima wakhumbika kuchiwonana ndi dokotala.