Asani yo Mukutorana Nayu Ngwambula Kugomezgeka

“Mulumu wangu wati wandikambiya kuti nthengwa yamala chifukwa wasaniya kamwali kafya, ndakhumbanga waka kuti ndifwi. Ndawonanga kuti wandichitiya vinthu vambula urunji, ukongwa asani ndikumbuka vinthu vo ndamuchitiyanga kulongo kuti nditimuyanja.”—Maria, wa ku Spain.

“Muwolu wangu wati wandithaŵa mwamabuchibuchi, ndingujivwa nge kuti chiŵalu chinyaki chafwa muliŵavu langu. Vosi vo taŵanaŵananga, kulindizga kweniso vo takhumbanga kuchita vingumaliya penipo. Kali ndaŵanaŵananga kuti ndafwatuka ku maŵanaŵanu ngaheni, kweni yapa, ndingwamba so kusuzgika.”—Bill, wa ku Spain.

NTCHAKUPWETEKA ukongwa asani munyaki m’banja ngwambula kugomezgeka. Mbuneneska kuti anyaki atimugowoke munyawu yo walapa ndipu atamba so kuchita vinthu limoza.a Kweni kwali angalutirizga kuja m’banja pamwenga cha, munthu yo muwolu waki pamwenga mulumu waki ngwambula kugomezgeka, vitimupweteka ukongwa mumtima. Kumbi ntchinthu wuli cho chingawovya ŵanthu ŵenaŵa kukunthiyapu?

MAVESI NGA M’BAYIBOLU NGO NGANGAWOVYA

Chinanga kuti angasuzgika ukongwa mumtima, anandi mwa ŵanthu wo munyawu ngwambula kugomezgeka achiskika ndi fundu za m’Malemba. Yiwu asambira kuti Chiuta watuvwa kuliya kwawu ndipu nayu wasuzgika mumtima.—Malaki 2:13-16.

“Pa nyengu yo masuzgu ngangu ngenga nganandi, yimwi mungundipembuzga ndi kundikondwesa.”—Sumu 94:19.

Bill wangukamba so kuti: “Ndati ndaŵerenga vesi lenili, venga nge kuti Yehova watindipembuzga mwachanju, nge mo ada alisungu achitiya.”

“Munthu wakugomezgeka mutimuchitiya vinthu mwakugomezgeka.”—Sumu 18:25.

Carmen yo mulumu waki wenga wambula kugomezgeka kwa myezi yinandi, wangukamba kuti: “Mulumu wangu wenga wambula kugomezgeka. Kweni ndathembanga kuti Yehova waŵengi wakugomezgeka kwaku ini. Iyu wangandiguŵiska cha.”

“Mungafipanga mtima ndi chinthu chechosi cha, kweni pa chinthu chechosi, mwa pempheru ndi kuŵeyere . . . vo mupempha viziŵiki kwaku Chiuta; ndipu chimangu chaku Chiuta cho chiluska kuziŵa vinthu kosi, chivikiliyengi mitima yinu.”—Afilipi 4:6, 7.

Sasha wangukamba kuti: “Ndinguŵerenga mavesi yanga kananandi waka. Ndipu chifukwa chakuti ndapempheranga kaŵikaŵi, Chiuta wangundipaska chimangu pa umoyu wangu.”

Ŵanthu wosi wo akonkhoskeka pachanya, nyengu zinyaki akhumbanga kuwere vuli. Kweni yiwu athembanga Yehova Chiuta ndipu angusaniya nthazi kutuliya mu Mazu ngaki. Bill wangukamba kuti: Chivwanu changu chingundiwovya kuja ndi umoyu wamampha pa nyengu yo vawonekanga kuti ndilivi pakuko. Chinanga kuti nyengu yinyaki ndingwenda ‘mudambu la mduzi ukulu,’ kweni Chiuta wenga nani.”—Sumu 23:4.

a Kuti muziŵi asani mukhumbika kumugowoke munyinu pamwenga cha, wonani nkhani yo ye m’magazini ya Jani Masu! ya Chicheŵa ya May 8, 1999, pamutu wakuti “Pamene Mwamuna Kapena Mkazi Akhala Wosakhulupirika.”

Vinthu vo Vawovyapu Ŵanthu Anyaki

Muŵanaŵaniyengi malemba ngo ngangakupembuzgani.

Bill wangukamba kuti: “Ndinguŵerenga buku la Jobu ndipuso la Sumu ndipu ndingugwala mzeri kusi kwa mavesi ngo ndawonanga kuti ngangandiwovya pa suzgu langu. Ndinguziŵa kuti ŵanthu wo angulemba Bayibolu, nawu asuzgikanga maŵanaŵanu kweniso akumananga ndi masuzgu ngakuyanana ndi ngo nani ndingukumana nangu.”

Muvwisiyengi sumu zakuchiska.

Carmen wangukamba kuti: “Asani nditondeka kugona ndi usiku, ndavwisiyanga sumu. Ivi vandiwovyanga ukongwa.” Daniel nayu wangukamba kuti: “Ndingusambira kumba gitala ndipu sumu zo ndambanga zandiwovyanga kuti ndije ndi chimangu mumtima.”

Mukambiyengeku anyinu mo muvwiya.

Daniel wangukamba kuti: “Ndayanjanga cha kukambiyaku anyangu mo ndivwiya. Kweni ndenga ndi anyangu amamphade, ndipu zuŵa lelosi ndachezanga nawu. Mwaviyo, ndinguŵalembe kalata kweniso ndinguŵakonkhoske mo ndavwiyanga. Ndipu venivi vingundiwovya ukongwa.” Sasha nayu wangukamba kuti: “Ŵanthu a m’banja langu angundiwovya ukongwa. Ama andiwovyanga nyengu zosi. Yiwu andivwisiyanga asani ndikhumba kukambiskana nawu. Ada nawu awonesesanga kuti ndijivwengi kuti atindiyanja kweniso kuti ndija mwakuvikilirika. Venivi vingundiwovya kuti ndichitengi vinthu nge mo ndachitiyanga kali.”

Mupempherengi nyengu zosi.

Carmen wangukamba kuti: “Ndapempheranga nyengu zosi. Ndawonanga kuti Chiuta we nani pafupi, watindivwisiya kweniso watindiwovya. Pa nyengu yakusuzga yeniyi ndingundere kufupi ndi Chiuta.”