Tigadabuwengi Maŵanaŵanu ngo Ngasuskana ndi Kuziŵa Chiuta!

1. Kumbi wakutumika Paulo wanguŵatcheŵeskanji Akhristu akusankhika?

WAKUTUMIKA PAULO wangutcheŵeska kuti, “Lekani.” Aleki kuchitanji? “Lekani kuwumbika ndi mugonezi wunu.” (Aro. 12:2) Mazu yanga, Paulo wakambiyanga Akhristu akusankhika a mu nyengu ya akutumika. Ntchifukwa wuli wangukamba mazu nganthazi viyo kwa Akhristu wo ŵenga akujipereka kwaku Chiuta kweniso akusankhika ndi mzimu wakupaturika?​—Aro. 1:7.

2-3. Kumbi Satana wachita wuli kuti watipatuski kwaku Yehova? Nanga tingachita wuli kuti tituzgemu vinthu vo ‘vikujinthika mwanthazi’ mu maŵanaŵanu ngidu?

² Paulo wafipanga mtima chifukwa Akhristu anyaki atenere kuti angwamba kwende maŵanaŵanu ngaheni nga charu chaku Satana. (Aefe. 4:17-19) Venivi vingachitikiya so weyosi waku isi. Satana ndiyu walamuliya charu ndipu wangagwiriskiya ntchitu nthowa zakupambanapambana kuti watipatuski kwaku Yehova. Mwakuyeruzgiyapu, asani te ndi mtima wakukhumba kutchuka, wangagwiriskiya ntchitu mtima wenuwu kuti watipatuski. Wangagwiriskiya so ntchitu midawuku, ŵanthu wo ticheza nawu ndipuso vinthu vo tisambira kunyumba ndi kusukulu kuti tiŵanaŵanengi nge mo iyu wakhumbiya.

³ Kumbi vingachitika kuti tituzgemu vinthu vo ‘vikujinthika mwanthazi’ mu maŵanaŵanu ngidu? (2 Akori. 10:4) Wonani vo Paulo wangumuka. Iyu wanguti: “Tigadabuwa maŵanaŵanu kweniso vinthu vapachanya vakususkana ndi kuziŵa Chiuta, ndipu titole ŵanaŵanu lelosi ku ukapolu kuti livwiyi Khristu.” (2 Akori. 10:5) Mazu yanga ngalongo kuti Yehova wangatiwovya kutuzgamu vinthu viheni mu maŵanaŵanu ngidu. Nge mo munkhwala ungatuzgiyamu poyizoni mu liŵavu, Mazu ngaku Chiuta ngangatiwovya kutuzgamu maŵanaŵanu nga ŵanthu mumtima widu.

‘SINTHANI MAŴANAŴANU NGINU’

4. Kumbi tanandi takhumbikanga kusinthanji tati tayamba kusambira uneneska?

⁴ Ŵanaŵaniyani vinthu vo mwakhumbikanga kusintha mwati mwayamba kusambira uneneska ndi kusankha kuteŵete Yehova. Tanandi takhumbikanga kuleka vinthu viheni vo tachitanga kuti titeŵetiyengi Yehova. (1 Akori. 6:9-11) Tiwonga ukongwa kuti Yehova wangutiwovya kuti tileki kuchita vinthu viheni!

5. Kumbi tikhumbika kuchita vinthu viŵi nivi vo vizumbulika pa Aroma 12:2?

⁵ Kweni kusintha kumala cha. Chinanga kuti tikuleka maubudi ngakulungakulu ngo tachitanga techendabatiziki, kweni tikhumbika mbwenu kuyesesa kukhwecha chechosi cho chingachitiska kuti tiwere so ku vinthu vo tachitanga kali. Kumbi tingachita wuli venivi? Paulo wanguti: “Lekani kuwumbika ndi mugonezi wunu, kweni sambukani mwakusintha maŵanaŵanu nginu.” (Aro. 12:2) Mwaviyo, pe vinthu viŵi vo tikhumbika kuchita. Chakwamba, tikhumbika ‘kuleka kuwumbika’ ndi charu. Chachiŵi, tikhumbika ‘kusambuka’ mwakusintha maŵanaŵanu ngidu.

6. Kumbi mazu ngo Yesu wangukamba pa Mateyu 12:43-45 ngatitisambizanji?

⁶ Paulo wakambanga kusintha ŵaka mo munthu wawoneke kubwalu cha, kweni wakambanga kusintha ko kukwaska vigaŵa vosi va umoyu widu. (Wonani bokosi lakuti “Kumbi Mukusambuka Nadi Pamwenga Mupusikiziya Ŵaka?”) Tikhumbika kusintha maŵanaŵanu ngidu kung’anamuwa umunthu widu wamukati, mo tivwiya kweniso vo tikhumba. Mwaviyo, tosi tikhumbika kujifumba kuti, ‘Kumbi ndisintha pachanyapachanya ŵaka pamwenga ndisintha kuti ndije nadi Mkhristu chayiyu?’ Mazu ngo Yesu wangukamba pa Mateyu 12:43-45, ngalongo vo titenere kuchita. (Ŵerengani.) Mazu yanga ngatitisambiza fundu yakukhumbika ukongwa yakuti: Kuleka ŵaka maŵanaŵanu ngaheni nkhwakukwana cha. Asani taleka kuŵanaŵana vinthu viheni tikhumbika so kuŵanaŵana vinthu vamampha vo tisambira mu Mazu ngaku Chiuta.

‘JANI ŴAFYA MU NTHAZI YO YITENDESA MAŴANAŴANU NGINU’

7. Kumbi tingasintha wuli umunthu widu?

⁷ Kumbi vingachitika kusintha umunthu pamwenga kuti maŵanaŵanu ngidu? Hinya. Mazu ngaku Chiuta ngakamba kuti: “Mulutirizgi kuja ŵafya mu nthazi yo yitendesa maŵanaŵanu nginu, ndi kuvwala umunthu wufya wakulengeka mwakukoliyana ndi khumbu laku Chiuta mu urunji weneku kweniso kugomezgeka.” (Aefe. 4:23, 24) Mwaviyo, vingachitika kusintha umunthu widu, kweni ntchipusu cha kuchita viyo. Tikhumbika kuchita vinandi kuluska ŵaka kukhwecha vinthu viheni ndi makhumbiru ngaheni. Titenere kusintha ‘nthazi yo yitendesa maŵanaŵanu ngidu.’ Ivi ving’anamuwa kuti tikhumbika kusintha vo tikhumba, nkharu yidu ndipuso vifukwa vo tichitiya vinthu. Kuti tichiti viyo, titenere kufwiyapu nyengu zosi.

8-9. Kumbi vo wanguchita mubali munyaki vilongo wuli kuti tikhumbika kusintha umunthu widu wamukati?

⁸ Tiyeni tikambiskani chakuyeruzgiyapu cha mubali munyaki yo pakwamba wenga wandewu. Wati waleka ndewu ndi kumwa moŵa, wangubatizika. Vo wanguchita vinguwovya kuti ŵanthu a mu chigaŵa chaki athamiki Yehova. Kweni pati pajumpha nyengu yimanavi kutuliya po wangubatizikiya, wangukumana ndi chiyesu. Munthu munyaki yo wanguloŵe wanguza kunyumba kwaki ndi kumuyambiya dala. Pakwamba wangujiko. Kweni munthu uyu wati wanyoza Yehova, mubali wangukwiya ukongwa mwakuti wangutondeka kujiko ndipu wangumuthibuwa. Ntchifukwa wuli wanguchita viyo? Chinanga kuti kusambira Bayibolu kungumuwovya kujiko kuti waleki kuchita ndewu, kweni wenga wechendasinthi nthazi yakwendesa maŵanaŵanu ngaki, pamwenga kuti umunthu waki wamukati.

⁹ Kweni mubali uyu wangugongowa cha. (Nthanthi 24:16) Ŵara angumuwovya ndipu wangulutirizga kusintha. Pati pajumpha nyengu wanguja mura. Zuŵa linyaki we ku Nyumba ya Ufumu wangukumana ndi chiyesu cho wangukumana nachu pakwamba. Munthu munyaki yo wanguloŵe wakhumbanga kupuma mura munyaki. Kumbi mubali uyu wanguchita wuli? Wangukambiskana ndi munthu yo wanguloŵe mwakufwasa kweniso mwachanju ndipu wangumuwovya kuti wasisi mtima waki pasi. Pavuli paki wanguchimulinda kwawu. Ntchifukwa wuli wanguchita vinthu mwakupambana ndi pakwamba? Mubali uyu wangusintha nthazi yakwendesa maŵanaŵanu ngaki, pamwenga kuti umunthu waki wamukati. Iyu wangusintha kuja munthu wachimangu ndipuso wakujiyuyuwa. Venivi vinguwovya kuti Yehova wathamikiki!

10. Kumbi titenere kuchitanji kuti tisinthi umunthu widu wamukati?

¹⁰ Kusintha kuchitika kwija cha ndipu kungato nyengu. Munthu wangakhumbika ‘kuyesesa ndi mtima wosi’ kwa vyaka vinandi. (2 Petu. 1:5) Kuja “mu uneneska” kwa nyengu yitali ndiku kungachitiska kuti munthu wasinthi cha. Tikhumbika kuchitapu kanthu kuti tisinthi umunthu widu wamukati. Pe vinthu vinyaki vo vingatiwovya kuti tisinthi. Tiyeni tikambiskanepu vinyaki mwa vinthu venivi.

VO TINGACHITA KUTI TISINTHI UMUNTHU WIDU

11. Kumbi titenere kuchitanji kuti Yehova watiwovyi kusintha umunthu widu?

¹¹ Chinthu chakwamba chakukhumbika ukongwa ndi pempheru. Tikhumbika kupemphera nge mo wanguchitiya yo wakulembaku buku la Sumu. Iyu wangupemphera kuti: “Lengani mtima wakutowa mwaku ini, yimwi Chiuta, ndipu mukati mwangu ŵikanimu mzimu wufya, mzimu wakukho.” (Sumu 51:10) Titenere kuziŵa kuti tikhumbika kusintha umunthu widu ndipu tipemphengi Yehova kuti watiwovyi. Ntchifukwa wuli tisimikiza kuti Yehova watiwovyengi kusintha? Tichiskika ndi vo Yehova wangukambiya Ayisirayeli ambula kuvwiya mu nyengu yaku Ezekiele. Iyu wangukamba kuti: “Ndazakuŵapaska mtima umoza, ndipu ndazamuŵika mzimu wufya mwaku yiwu. Ndazamutuzgamu mtima wa mwa mumaliŵavu ngawu ndipu ndazakuŵapaska mtima wa munofu, [kung’anamuwa mtima wakuvwiya fundu zaku Chiuta].” (Ezeki. 11:19) Yehova wenga wakukhumbisiska kuwovya Ayisirayeli kuti asinthi, ndipu wakhumbisiska so kutiwovya mazuŵa nganu.

12-13. (a) Mwakukoliyana ndi Sumu 119:59, kumbi tikhumbika kulungurukanji? (b) Kumbi titenere kujifumba mafumbu nanga?

¹² Chinthu chinyaki cho tikhumbika kuchita nkhulunguruka. Asani tiŵerenga Mazu ngaku Chiuta zuŵa lelosi, tikhumbika kulunguruka vo taŵerenga kuti tiwoni asani pe vinthu vinyaki viheni vo tiŵanaŵana. (Ŵerengani Sumu 119:59; Ahe. 4:12; Yako. 1:25) Titenere kujisanda kuti tiziŵi asani tayamba kuŵa ndi maŵanaŵanu nga charu. Tikhumbika kuziŵa asani te ndi suzgu ndipu tiyesesengi kulimaliska.

¹³ Mwakuyeruzgiyapu, mungajifumba kuti: ‘Kumbi nde ndi bina pamwenga sanji chinanga yingaŵa yimanavi mumtima mwangu?’ (1 Petu. 2:1) ‘Kumbi nditijikuzga chifukwa cha ko ndituliya, masambiru pamwenga chuma?’ (Nthanthi 16:5) ‘Kumbi ndiwona kuti ŵanthu a mtundu unyaki pamwenga akavu mbakusika?’ (Yako. 2:2-4) ‘Kumbi nditoreka mtima ndi vinthu viheni va mucharu?’ (1 Yoha. 2:15-17) ‘Kumbi nditanja vakusangaluska vo vilongo ŵanthu agonana ndipuso apumana?’ (Sumu 97:10; 101:3; Amosi 5:15) Kwamuka kwa mafumbu yanga kungakuwovyani kuti muziŵi vo mukhumbika kusintha. Asani tingathereska maŵanaŵanu ngo ‘ngakujinthika mwanthazi’ mumtima widu, tikondwesengi Awusefwi akuchanya.​—Sumu 19:14.

14. Ntchifukwa wuli kusankha mabwezi ngamampha nkhwakukhumbika ukongwa?

¹⁴ Tikhumbika so kusankha mabwezi ngamampha. Kwali tiziŵa pamwenga cha, taŵanthu tiswera cha kutore vo anyidu achita. (Nthanthi 13:20) Ŵanthu wo tigwira nawu ntchitu pamwenga wo tisambira nawu sukulu angatiwovya cha kuti tije ndi maŵanaŵanu ngo ngakondwesa Chiuta. Kweni tingasaniya mabwezi ngamampha pa maunganu ngidu. Ku maunganu ngenanga, ndiku ‘tichiskiyana ku chanju ndi ku ntchitu zamampha.’​—Ahe. 10:24, 25.

‘MUJALIKISKIKI MU CHIVWANU’

15-16. Kumbi Satana wachitanji kuti wasinthi maŵanaŵanu ngidu?

¹⁵ Kweni tingaluwanga cha kuti Satana wachita vosi vo wangafiska kuti wasinthi maŵanaŵanu ngidu. Iyu wagwiriskiya ntchitu visambizu vaboza kuti watimbanyizgi maŵanaŵanu ngidu kuti tikayikiyengi vo tisambira mu Mazu ngaku Chiuta.

¹⁶ Satana weche kufumba fumbu lo wangufumba Heva mu munda wa Edeni. Iyu wangumufumba kuti: “Kumbi mbuneneska kuti Chiuta wakukamba kuti . . . ?” (Chiya. 3:1) Mucharu cho chiwusika ndi Satana, kanandi tituvwa mafumbu nga nge yanga: ‘Kumbi mbuneneska kuti Chiuta wakana kutorana kwa anthulumi pamwenga anthukazi pe? Kumbi mbuneneska kuti Chiuta wakana kukondwere Khirisimasi ndipuso zuŵa lakuwiya? Kumbi mbuneneska kuti Chiuta wakhumba kuti mukanengi kuŵikika ndopa? Kumbi mbuneneska kuti Chiuta wachanju wakana kuti muchezengi ndi mubali winu asani wasezgeka?’

17. Kumbi titenere kuchitanji asani munthu watifumba fumbu lo lingachitiska kuti tiyambi kukayikiya vo tigomezga? Kumbi vo tingachita vingatiwovya wuli mwakukoliyana ndi Akolose 2:6, 7?

¹⁷ Tikhumbika kukhorwa ndi vo tigomezga. Asani munthu watifumba fumbu lo lingachitiska kuti tikayikiyi vo tigomezga, titenere kusaniya kwamuka kwaki. Chifukwa asani tingaleka kuchita viyo, tingayamba kukayikiya. Ivi vingatimbanyizga maŵanaŵanu ngidu ndipu chivwanu chidu chinganangika. Kumbi ntchinthu wuli cho titenere kuchita? Mazu ngaku Chiuta ngatitikambiya kuti tikhumbika kusintha maŵanaŵanu ngidu kuti tiziŵi “khumbu laku Chiuta lamampha, lakuzomerezeka kweniso lakufikapu.” (Aro. 12:2) Tingasimikiza kuti vo tisambira mu Bayibolu vauneneska asani tisambira pakutija nyengu zosi. Ndipu asani tichitengi viyo tikhorwengi kuti fundu za mu Bayibolu zauneneska. Nge chimiti cho che ndi misisi yo yasere ukongwa pasi, nasi timengi misisi ndi ‘kujalikiskika mu chivwanu.’​—Ŵerengani Akolose 2:6, 7.

18. Kumbi ndi vinthu wuli vo vingatiwovya kuti tituzgemu maŵanaŵanu ngaheni mumtima widu?

¹⁸ Kujalikiskika mu chivwanu ndi udindu wa munthu weyosi pakuyija. Mwaviyo, mutenere kulutirizga kuja mufya mu nthazi yo yitendesa maŵanaŵanu nginu. Mupempherengi nyengu zosi kuti mzimu waku Yehova ukuwovyeni. Mulungurukengi. Nyengu zosi mujisandengi kuti muziŵi asani mwe ndi maŵanaŵanu nganyaki ngambula kwenere. Musankhengi mabwezi ngamampha. Muchezengi ndi ŵanthu wo angakuwovyani kuti musinthi maŵanaŵanu nginu. Asani muchitengi viyo, mutuzgengemu maŵanaŵanu ngaheni nga charu mumtima winu ndipuso ‘mugadabuwengi maŵanaŵanu kweniso vinthu vapachanya vakususkana ndi kuziŵa Chiuta.’​—2 Akori. 10:5.