“Mujisungi mu Chanju Chaku Chiuta”
1. Kumbi chilatu cha buku la “Mujisungi mu Chanju Chaku Chiuta” nchakuti wuli?
1 Sabata yakwambiya September 16, 2013, tazamuyamba kusambira buku la “Mujisungi mu Chanju Chaku Chiuta,” pa Sambiru la Bayibolo la Mpingu. Kalata yakutuwa ku Wupu Wakulongozga yo ye papeji 3 yakuluta kwaku weyosi yo watanja Yehova yimaliza ndi mazu ngakuti: “Te ndi chigomezgu chosi kuti buku ili likuwovyeningi kuti mulutirizgi kugwiriskiya nchitu fundu zawuneneska mu umoyu winu ndipu kuchita viyo kukuwovyeningi kuti mujisungi ‘mu chanju chaku Chiuta, ndi kulereze umoyu wamuyaya.’—Yuda 21.”
2. Kumbi buku ili litiwovyengi pa nkhani nizi?
2 Vo Tazamusambira: Kumbi fundu za m’Bayibolo zingatiwovya wuli pa nkhani zakukwaskana ndi ŵanthu wo titenere kucheza nawu, vakukondweska, kutumbika wo awusa, nkharu yidu, nthengwa, vakukamba vidu kweniso midawuku? Njuŵi yidu yiwumbikengi kuti yichitengi vinthu mwakukoliyana ndi fundu za urunji zo zisanirika m’Mazu Ngaku Chiuta. (Sumu 19:7, 8) Asani tivwisa umampha mo Yehova waŵanaŵaniya, tijengi ndi mtima wakukhumba kumukondweska ndipu venivi vitiwovyengi kuti timuvwiyengi pa chechosi cho tingachita pa umoyu widu.—Nthanthi 27:11; 1 Yoh. 5:3.
3. Nchifukwa wuli tikhumbika kuziyesesanga kumuka pa sambiru la sabata yeyosi?
3 Muziyesesengi Kumukapu: Pakunozgeke sambiru ili, muzijengi ndi chilatu chakukhumba kuthamika Chiuta pakati pa ŵanthu ŵaki. (Ŵah. 13:15) Mpingu wosi wazamusambiriya limoza buku ili. Sabata yeyosi tazamusambiranga ndimi zimanavi ŵaka ndipu ivi vazakutiwovya kuti tizikonkhoskengi mwambula mantha vo tasambira. Tizinozgekiyengi umampha fundu zakumuka ndipu zingazijanga zitalizitali cha kuti zizichiskengi anyidu ku chanju ndi nchitu zamampha. Ivi vazamuwovya kuti sambiru lizijengi lakunozga ukongwa. (Ŵah. 10:24) Likondwa lidu lazamukuwa so ukongwa asani weyosi waku isi wazamukonkhoskanga chivwanu chaki mwakumukapu.
4. Nchifukwa wuli titenere kusunga marangu ngaku Yehova?
4 Pa usiku waki wakumaliya panu pacharu, Yesu wangukamba kuti kusunga marangu ngaku Yehova kutovya kuti munthu walutirizgi kuja m’chanju chaku Chiuta. (Yoh. 15:10) Buku la “Chanju Chaku Chiuta,” litiwovyengi kugwiriskiya nchitu fundu za m’Bayibolo pa umoyu widu ndipuso ‘kujisunga m’chanju chaku Chiuta.’—Yuda 21.