Sambizani Mwakukopa
1. Kumbi kugwiriskiya nchitu Mazu Ngaku Chiuta mwakuko mtima mu uteŵeti kusazganjipu?
1 Ateŵeti akuko mtima nge wakutumika Paulo, aziŵa kuti “kugaŵiya kwakurunjika mazu gha uneneska,” kusazgapu vinandi kuruska kuzumbuwa waka mazu ngo nge m’Malemba. (2 Timo. 2:15) Pakugwiriskiya nchitu Mazu Ngaku Chiuta, kumbi tingasambiza wuli ‘mwakukopa’?—Mach. 28:23.
2. Kumbi tingawovya wuli ŵanthu kuti atumbikengi ukongwa Mazu Ngaku Chiuta?
2 Gwiriskiyani Nchitu Mazu Ngaku Chiuta: Chakwamba, gwiriskiyani nchitu Bayibolo munthowa yo yingawovya akuvwisiya ŵinu kuziŵa kuti Bayibolo le ndi zeru zakutuwa kwaku Chiuta. Chigomezgu chidu mu Mazu Ngaku Chiuta chingachitiska akuvwisiya ŵidu kuti avwisiyi mwakuphwere asani malemba ngaŵerengeka. (Ŵahe. 4:12) Tikhoza kukamba waka kuti: “Ndiwona kuti chingaŵa chazeru kuti tiwoni vo Chiuta wakamba pankhani iyi. Awonani vo Mazu ngaki ngakamba.” Yesesani kugwiriskiya nchitu Mazu Ngaku Chiuta mwa kuŵerenga mu Bayibolo.
3. Asani taŵerenga lemba, kumbi tingawovya wuli wakuvwisiya widu kuti waziŵi vo ling’anamuwa?
3 Chachiŵi, titenere kukonkhoska malemba ngo taŵerenga. Ŵanthu anandi asuzgika kuvwisa lemba asani laŵerengeka waka. Mwaviyo, titenere kukonkhoska kukolerana kwa lemba ndi nkhani yo tikambiskana. (Luka 24:26, 27) Titenere kukonkhoska fundu zikulu za lemba lo. Kufumba wakuvwisiya kungatiwovya kuziŵa asani wavwisa vo lemba lo likamba.—Ntha. 20:5; Machi. 8:30.
4. Kumbi ndi nthowa yakumaliya niyi yo yingatiwovya kuti tisambizengi mwakukopa?
4 Kambiranani Malemba: Chachitatu, yesesani kumuchontha. Wovyani mweneku wa nyumba kuwona mo lemba litimukwasiya. Kukambirana Malemba kungachitiska kuti munthu wasinthi maŵanaŵanu ngaki. (Machi. 17:2-4; 19:8) Mwakuyeruziyapu, pavuli pakuŵerenga lemba la Sumu 83:18, tingakambirana mo kuziŵa zina la munthu kuliri kwakukhumbika kuti tiyambi kuyanjana nayu. Pavuli paki, mukhoza kumufumba kuti, “Kumbi muwona kuti kuziŵa zina laku Chiuta kungachitiska kuti marombu nginu ngaŵi ngakuzirwa ukongwa?” Kukonkhoska lemba mwakukolerana ndi umoyu wa mweneku wa nyumba mwanthowa iyi, kumuwovyengi kuti waziŵi mo ligwiriya nchitu. Kusambiza Mazu Ngaku Chiuta mwakukopa, kuchitiska ŵanthu a mitima yamampha kuti ayambi kusopa Yehova Chiuta wauneneska ndipuso wamoyu.—Yere. 10:10.