Kumbi Ndichita Vinandi mu Uteŵeti?
1. Kumbi ndi vinthu wuli vo vingachitiska kuti Mkhristu wayambi kudandaula?
1 Kumbi mukujifumbapu fumbu lenili? Panyaki muchita nawu viŵi cha uteŵeti nge po mwachitiyanga kali, chifukwa cha ukoti, matenda pamwenga chifukwa cha unandi wa maudindu ngakuphwere banja, vo vitikuchitiskani kuti mudandaulengi. Muzichi munyaki wa ŵana ŵatatu wangulemba kuti, nyengu zinyaki watijimba mlandu chifukwa chakuti nyengu ndi nthazi zo wagwiriskiya nchitu pakuphwere banja laki vitimuchitiska kuti wachitengi vinthu vimana mu uteŵeti. Kumbi nchinthu wuli cho chingatiwovya kuti tiwonengi vinthu mu nthowa yakwenere?
2. Kumbi Yehova wakhumbanji kwaku isi?
2 Vo Yehova Wakhumba kwaku Isi: Mwambula kukayikiya, tosi tikhumba kuti tichitengi vinandi mu uteŵeti. Kweni pe mphambanu yikulu pakati pa vo tikhumba kuti tichiti ndi vo tingachitadi. Mtima wakukhumba kuti tichiti vinandi mu uteŵeti ulongo kuti tizerezge dala cha. Titenere kukumbukiya kuti Yehova waziŵa umampha vo tingafiska ndipuso iyu wakhumba cha kuti timuchitiyengi vinthu vo tingatondeka kufiska. (Sumu 103:13, 14) Kumbi iyu wakhumba kuti timuchitiyengenji? Iyu wakhumba kuti timuteŵetiyengi ndi umoyu widu wosi, kumupaska vamampha vidu vosi.—Ŵako. 3:23.
3. Kumbi tingasanda wuli pamphu lidu pa nkhani ya uteŵeti?
3 Kumbi nchinthu wuli cho chingatiwovya kuti tiwoni vo tingafiska kuchita? Tingapempha Yehova kuti watiwovyi kuwona mo vinthu viliri paumoyu widu. (Sumu 26:2) Tingawovyeka so ndi bwezi la Chikhristu lakugomezgeka ndi lakukhwima mwauzimu lo lititiziŵa umampha ndipuso lo litopa cha kutikambiya asani tikhumbika kusintha. (Ntha. 27:9) Kumbukiyani so kuti vinthu visintha paumoyu widu, mwaviyo nchakovya kusandanga umoyu widu nyengu ndi nyengu.—Ŵaefe. 5:10.
4. Kumbi titenere kuziwona wuli fundu za m’Bayibolo zo zititikumbusa pankhani ya uteŵeti?
4 Mo Titenere Kuwone vo Tikumbuskika pa Nkhani ya Uteŵeti: Pamaphala ngakuchimbiya, akuchemere adaniliza mazu ngakuchiska ŵanthu wo achimbiya. Chilatu chawu nchakukhumba kuŵagongowesa cha kweni kuŵawovya kuti afiski chilatu chaku wo achimbiya. Mwakuyana waka, fundu zakuchiska za m’Bayibolo ndipuso vikumbusu vo tipaskika kuziya mu maunganu ndipuso mabuku ngidu kuti ‘tipharazgi mazu mwaliŵiliŵi’ vilipu kuti vitiyanduliski ndipuso ving’anamuwa kuti phamphu lidu ndakupereŵere cha. (2 Timo. 4:2) Tingaŵa ndi chigomezgu chakuti Yehova wakumbukengi ‘chanju ndi nchitu zidu’ malinga asani tiyesesa kuchita vamampha.—Ŵahe. 6:10.