‘Mungawopanga cha’
1. Kumbi ndi masuzgu wuli ngakukozgana ndi ngaku Yeremiya ngo tingakumana nangu mazuŵa nganu?
1 Yeremiya wati watumika nge mchimi, iyu wawonanga kuti wangafiska cha. Kweni Yehova wangumusimikizgiya kuti, ‘ungawopanga cha,’ ndipu wangumuchiska mwachanju kuti wafiski nchitu yaki. (Yere. 1:6-10) Mazuŵa nganu, soni ndi kujikayikiya kungachitisa kuti tileki kuchita vinandi mu uteŵeti. Kuwopa mo ŵanthu angamukiya ndipuso mo angatiwone kungatichitisa kuti nyengu zinyaki tiwele vuli. Kumbi tingamaliska wuli mantha ngenanga, nanga ndi vitumbiku wuli vo tingasaniya?
2. Kumbi kunozgeke kungatiwovya wuli kuti timalisi mantha mu uteŵeti?
2 Nozgekiyani Kweche Nyengu: Kunozgeke umampha kungatiwovya ukongwa kuti timalisi mantha. Mwakuyeruzgiyapu, asani tingaŵanozgeke limu ŵanthu wo akana kuŵapharazgiya, kungaŵa kwambula kusuzga kuŵamuka nkhani zo atanja kususa. (Ntha. 15:28) Kumbi mungagwiriskiya nchitu nyengu ya Kusopa kwa Pabanja kunozgeke mo mungachitiya ndi masuzgu ngakupambanapambana ngo mungakumana nangu ku sukulu ndipuso mu uteŵeti?—1 Pet. 3:15.
3. Kumbi kugomezga Yehova kutitiwovya wuli kuti timalisi mantha?
3 Gomezgani Yehova: Kugomezga Chiuta, ndiwu munkhwala wakumaliskiya mantha. Yehova watitisimikizgiya kuti watiwovyengi. (Yesa. 41:10-13) Chenichi ndichu chivikiliru chikulu cho tenachu. Ndipuso Yesu watitisimikizgiya kuti chinanga masuzgu ngangatisaniya mwamabuchibuchi, mzimu utuŵa waku Chiuta utiwovyengi kupharazga mu nthowa yamampha. (Marko 13:11) Mwaviyo, mupemphengi pafupipafupi kuti Yehova wakupaseni mzimu waki utuŵa.—Luka 11:13.
4. Kumbi ndi vitumbiku wuli vo tisaniya asani tilutirizga uteŵeti kwambula kuphwere kanthu za masuzgu?
4 Vitumbiku: Asani tilutirizga uteŵeti mwambula kuphwere kanthu za masuzgu, vitiwovyengi kuti tizipundi mayeseru ngo tikumanengi nangu kunthazi. Tija achiganga, lo ndi jalidu lo lija ndi ŵanthu wo apasika mzimu utuŵa. (Machi. 4:31) Ndipuso asani Yehova watiwovya kuti timalisi mantha, tija ndi chivwanu kweniso chigomezgu chakukho, mu janja laki la utaski. (Yesa. 33:2) Tituŵa so ndi likondwa ndipuso kugutiskika chifukwa chakuziŵa kuti tikondwesa Awuskefwi akuchanya. (1 Pet. 4:13, 14) Mwaviyo, tingawopanga cha kupharazga uthenga wa Ufumu mwa chiganga ndi chigomezgu chosi kuti Yehova watiwovyengi nyengu zosi.