Minda Yacha Ndipu Yikhumbika Kuvuna
1. Kumbi ndi nchitu wuli yakukhumbika yo yichitika sonu?
1 Wati wapharazga ku munthukazi wa ku Samariya, Yesu wangukambiya akusambira ŵaki kuti: “Yinuskani masu ghinu ndipu thoŵani minda yo, pakuti yacha kali ku chivuna.” (Yoha. 4:35, 36) Po nchitu yakuvuna mwauzimu yenga mkati, Yesu wanguwone limu mo yazamuchitikiya pacharu chosi. Iyu po we pa udindu waki kuchanya, Yesu walutirizga kugwira nawu nchitu yakuvuna. (Mate. 28:19, 20) Kumbi ndi vinthu wuli vo vilongo kuti nchitu iyi yiluta panthazi mwaliŵi ukongwa po ye pafupi kumala?
2. Kumbi mbukaboni wuli wo ulongo kuti nchitu yakuvuna ya pacharu chosi yiluta panthazi?
2 Nchitu Yakuvuna ya Pacharu Chosi: Mu chaka cha uteŵeti cha 2009, chiŵerengeru cha apharazgi pacharu chosi chapasi chingukwera ndi 3.2 peresenti. Mu vyaru vo nchitu iyi yikukanizgika chiŵerengeru chingukwera ndi 14 peresenti. Chiŵerengeru cha masambiru nga Bayibolo nga pa nyumba cha mwezi wewosi chingujumpha 7,619,000, ndipu chinguluska chiŵerengeru chapachanya cha apharazgi wosi, ndipuso chingujumpha pafupifupi 500,000 pa masambiru ngo nganguchitika chaka cha 2008. Chifukwa chakuti nchitu iyi yikuwa mwaliŵi ukongwa mu vigaŵa vinandi, tilonde makalata nganandi ngakupempha amishonale wo akusambizika sukulu ya Giliyadi. Kupharazga mu vigaŵa vo alongolo chineneru chinyaki kutuŵa ndi vakutuwapu vamampha mu vyaru vinandi. Uwu mbukaboni wakuti Yehova watiyiyendesa mwaliŵi ukongwa nchitu yakuvuna mu mazuŵa nganu ngakumaliya. (Yesa. 60:22) Kumbi mutiyiwona wuli “minda” yo mupharazgaku?
3. Kumbi Akaboni anyaki akambanji pa nchitu yakuvuna ya m’chigaŵa chawu?
3 Nchitu Yakuvuna ya M’chigaŵa Chinu: Ŵanthu anyaki angakamba kuti,“chigaŵa changu chibala vipasu cha.” Mbuneneska nadi kuti vigaŵa vinyaki viwoneka kuti vibala vipasu cha kuviyeruzgiya ndi vinyaki ndipuso asani tingaviyeruzgiya ndi po venge kali. Akaboni anyaki afika pakukamba kuti nchitu yakuvuna m’chigaŵa chawu yamala ndipu sonu aja ndi nchitu yimanavi yakukunkha. Kumbi ivi vauneneska nadi?
4. Kumbi titenere kuyiwona wuli nchitu yakuvuna, ndipu chifukwa wuli?
4 Kuyamba pakwamba mpaka pakumaliya, nyengu yakuvuna ndiyu nyengu yakugwira nchitu mwaphamphu. Wonani kukhumbika ukongwa kwa nchitu iyi mu mazu ngaku Yesu ngakuti: “Chivuna nchikuru, kweni ŵanchitu mbamanavi. Ninizikiyani viyo Mweneko wa chivuna cho alinga watume ŵanchitu ku chivuna chake.” (Mate. 9:37, 38) Yehova ndiyu Mweneku wa nchitu yakuvuna ndipu waziŵa nyengu ndipuso ko nchitu yo yichitikiya. (Yoha. 6:44; 1 Ŵako. 3:6-8) Kumbi isi nchitu yidu njakuti wuli? Bayibolo limuka kuti: “Umije mbeu yako ndi mlenjilenji, ndipo ndi mazulo ureke kuko janja lako, pakuti uziŵa cha zo zandanenge, izi pamwenga ziya pamwenga vinu zose ziŵi zikaŵanga zamampha kwakukozgana.” (Waku. 11:4-6) Hinya, asani nchitu yakuvuna yafikapu, ndi nyengu yakuti manja ngidu ngapumuwi cha.
5. Nchifukwa wuli tikhumbika kulutirizga kupharazga mwaphamphu m’chigaŵa cho chiwoneke limu kuti chibala vipasu cha?
5 Lutirizgani Kugwira Nchitu Yakuvuna: Chinanga kuti tapharazga mwakuwerezawereza m’chigaŵa chidu ndipu chilongo kuti chibala vipasu cha, tikhumbika kulutirizga mbwenu kugwira nchitu iyi mwaphamphu ndipuso mwaliŵi. (2 Timo. 4:2) Kusintha kwa vinthu m’charu ichi, kuchitisa ŵanthu kuti ayambi kusintha maŵanaŵanu ngawu ndi kwamba kuŵanaŵana ukongwa va kunthazi. Po achinyamata akuwa, yiwu atijivwa kuti akhumbika kuvikililika ndipuso kuja ndi chimangu cha mu mtima. Kulimbikiya kwidu, kungachitisa kuti ŵanthu anyaki ayambi kuzomera uneneska. Ŵanthu wo kali akananga pavuli paki angayamba kuvwisiya. Titenere so kutcheŵesa chinanga ndi wo kali akaniyanga dala uthenga widu.—Ezek. 2:4, 5; 3:19.
6. Kumbi nchinthu wuli cho chingatiwovya kuti tilutirizgi kuja aphamphu asani chigaŵa chidu nchakusuzga?
6 Kumbi nchinthu wuli cho chingatiwovya kuti tilutirizgi kupharazga mwaphamphu asani chigaŵa chidu cho tipharazgaku chibala vipasu cha? Kusazgiyapu pa upharazgi wa nyumba ndi nyumba, panyaki tingagwiriskiya so nchitu nthowa zinyaki nge, kupharazga m’malu nga malonda ndipuso upharazgi wa pa telefoni. Pamwenga tingasintha upharazgi widu kuti tiŵafiki pa mtima ŵanthu. Tingasintha ndondomeku yidu ya upharazgi kuti tiserengi mu upharazgi ndi msana pamwenga nyengu yinyaki yo ŵanthu angasanirika pa nyumba. Panyaki tingayesa so kusambira chineneru chinyaki ndi chilatu chakuti tifikiyi ŵanthu anandi ndi uthenga wamampha. Tingakuzga so uteŵeti widu mwakuchita upayiniya wa nyengu zosi, pamwenga tingaluta ku chigaŵa cho kulivi apharazgi anandi. Asani te ndi maŵanaŵanu ngamampha pa nchitu yakuvuna, tiyesesengi ukongwa kuchita vosi vo tingafiska pa nchitu iyi.
7. Kumbi tigwirengi nchitu yakupharazga mpaka zukwanji?
7 Alimi ŵe ndi nyengu yimanavi yakuvuniya mbewu zawu, mwaviyo, alivi nyengu yakupumuliya ndipu avuka cha mpaka po nchitu yosi yamaliya. Nchitu yakuvuna mwauzimu yikhumba so phamphu langati lenili. Kumbi titenere kulutirizga kugwira nchitu yeniyi mpaka zukwanji? Tilutirizgengi kugwira nchitu iyi nyengu yosi ya “umari wa mgonezi” uwu mpaka pa “umari.” (Mate. 24:14; 28:20) Nge Mteŵeti wakwamba waku Yehova, Yesu, isi nasi tikhumbika kufiska nchitu yo tapaskika. (Yoha. 4:34; 17:4) Mwaviyo, tiyeni tilutirizgi kuchita uteŵeti widu mwaphamphu, mwalikondwa ndipuso ndi maŵanaŵanu ngamampha mpaka pakumaliya. (Mate. 24:13) Nchitu yakuvuna yechendamali.
[Fundu yo yakonkhoskeka papeji 2]
Kuyamba pakwamba mpaka pakumaliya, nyengu yakuvuna ndiyu nyengu yakugwira nchitu mwaphamphu