Kumbi Mungamuwovya Wuli Munthu yo ndi Kaboni cha yo Wakutolana ndi Mkhristu Munyinu?
1 Kumbi mumpingu winu mwe apharazgi anyaki wo arumu pamwenga awolu ŵawu mbakaboni cha? Asani alipu, nchambula kukayikisa kuti apharazgi ŵenaŵa akhumbira ukongwa kuti mphanyi asopiyanga nawu limoza wo akutolana nawu. Ndipu ndiwu pe cha aŵanaŵana viyo. Mpingu wosi nawu we ndi maŵanaŵanu ngakukozgana ndi ngaku Chiuta ngakuti ‘ŵanthu a mitundu yosi azitaskiki ndi kuziŵa uneneska.’ (1 Timo. 2:4) Kumbi tingachita wuli kuti tiwovyi munthu yo ndi Kaboni cha yo wakutolana ndi Mkhristu munyidu?
2 Chakwamba titenere kusanda ukongwa maŵanaŵanu nga munthu yo ndi Kaboni cha. Nyengu zinyaki ŵanthu anandi wo aleka kuziŵa uneneska atanja banja lawu ndi kuyesesa kuja mpapi wamampha. Kweni angaŵa ndi chigomezgu chikulu cha kuchisopa chawu, cho chipambana ndi chidu. Panyaki chingaŵa chifukwa chakuti atiŵaziŵa umampha cha Akaboni aku Yehova, pamwenga ŵanthu anyaki akuŵakambiya vinthu vaboza kuti atanjana yiwuyiwu pe. Anyaki akwiya chifukwa cha nyengu yo murumu pamwenga muwolu wawu wagwiriskiya nchitu pakuchisopa, yo kali wayigwiriskiyanga nchitu pakucheza ndi banja laki. Kuchita vinthu mwazeru kutiwovyengi kuti timulongo chanju ndi kumupaska ulemu munthu yo ndi Kaboni cha ndipuso kuti tileki kuchita mantha ukongwa asani iyu walipu.—Ntha. 16:20-23
3 Mulongoni Chanju: Nthowa yamampha yakumuwovye kuti nayu waziŵi uneneska nkhuyamba kukambiskana nayu nkhani ya m’Bayibolo cha, kweni chakwamba nkhuziya mu vakuchita vidu. (1 Pet. 3:1, 2) Chinthu chakukhumbika ukongwa pankhani iyi ndichu kumulongo chanju. Azichi mu mpingu angamulongo chanju muwolu wa mubali yo ndi Kaboni cha ndipuso abali nawu angachita so viyo ndi murumu wa muzichi yo ndi Kaboni cha. Kumbi mungachita wuli venivi?
4 Asani mwechendakumanepu ndi munthu yo, panyaki mungachita ivi mwakukambiskana dankha ndi Mkhristu yo wakutolana ndi munthu yo. Mungakwiyanga cha asani pakwamba, munthu yo ndi Kaboni cha wakumukani mwambula ulemu. Jalidu lidu laubwezi ndipuso lachanju lingamuchitisa kuti wayambi kwanja Akaboni aku Yehova. (Ŵaro. 12:20) Akhristu anyaki adanapu munthu yo ndi Kaboni cha pamoza ndi banja laki kuti akaryiyi pamoza chakurya chamazulu ndi chilatu chakuti aziŵani umampha ndipuso kutuzgapu lilengu lakuti atanjana yiwuyiwu pe. Yiwu akambiskana nayu nkhani zo iyu watanja, m’malu mwakumuchichizga kuti akambiskanengi nayu nkhani zauzimu. Pavuli paki, asani munthu yo wayamba kufwatuka, kuja kwambula kusuzga kukambiskana nayu nkhani zauzimu. Panyaki wangazomera kuluta ku maunganu nga mpingu kuti wakawoni vo muwolu waki wasambira chifukwa chakuti waziŵana kali ndi ŵanthu anyaki a mumpingu. Chinanga kuti walivi linweka la kuziŵa uneneska, muwongeni mbwenu chifukwa cha chovyu cho wapereka ku muwolu pamwenga murumu waki.
5 Ŵara ndiwu atenere kuyesesa ukongwa kuwovya munthu yo ndi Kaboni cha yo wakutolana ndi Mkhristu munyidu ndipu atenere kuyesesa so kusaniya mipata yakumupharazgiya. Munthu yo ndi Kaboni cha, yo wakananga kuvwisiya uthenga wa m’Bayibolo, wangayamba kuvwisiya mazu ngakuchiska nga m’Malemba panyengu yo we ku chipatala pamwenga asani wakumana ndi masuzgu ngakulu paumoyu waki. Asani banja la munthu yo wakutolana ndi Kaboni cha lakumana ndi suzgu, nge nyifwa ya munthu wa m’banja lawu, ŵara atenere kumupempha munthu yo kuti nayu waŵepu asani apembuzga banja lo.
6 Ŵanaŵaniyani za mo Mkhristu munyidu wangakondwe asani murumu pamwenga muwolu waki wangaziŵa uneneska. Chakuchitika chakukondwesa chenichi chingakondwesa so ukongwa Yehova, angelu ndipuso mpingu wosi. (Luka 15:7, 10) Kweni, asani munthu yo walongo linweka cha, tikhoza kuja ndi likondwa pakuziŵa kuti kuyesesa kwidu kukondwesa Yehova, ‘yo wakhumba cha kuti weyosi wanangiki kweni kuti wosi alapi.’—2 Pet. 3:9.
[Mafumbu]
1. Nchifukwa wuli tingakamba kuti Akhristu wo akutolana ndi munthu yo ndi Kaboni cha, ndiwu pe cha akhumbira kuti awovyi yo akutolana nayu kuti waziŵi uneneska?
2. Kumbi kuchita vinthu mwazeru kungatiwovya wuli kuti tiwovyi munthu yo ndi Kaboni cha, yo wakutolana ndi Mkhristu munyidu?
3. Kumbi ndi nthowa niyi yamampha ukongwa yo tingawovye munthu yo ndi Kaboni cha?
4. Kumbi tingamulongo wuli chanju munthu yo ndi Kaboni cha yo wakutolana ndi Mkhristu munyidu?
5. Kumbi ŵara angamuwovya wuli muwolu pamwenga murumu wa Mkhristu yo ndi Kaboni cha?
6. Kumbi nchifukwa wuli titenere kuyesesa kuwovya munthu yo ndi Kaboni cha yo wakutolana ndi Mkhristu munyidu?
[Fundu yo yakonkhoskeka papeji 6]
Nthowa yamampha yakumuwovye kuti nayu waziŵi uneneska nkhuyamba kukambiskana nayu nkhani ya m’Bayibolo cha, kweni chakwamba nkhuziya mu vakuchita vidu