Ateŵeti Aphamphu Akhumbika Kulunguruka Mwarombu
1. Kumbi nchinthu wuli cho chinguwovya Yesu kuti waleki kutimbanyizika pa nchitu yaki yakuzirwa?
1 Zuŵa linyaki ndi mazulu Yesu wanguchizga ŵanthu ndi kutuzga mizimu yiheni. Akusambira ŵaki ŵati amusaniya ndi mlenji, ‘angumukambiya kuti, ‘ŵanthu wosi atikupenjani,’ yiwu amuchiskanga kuti walutirizgi kuchita nchitu zaki zakuziziswa. Kweni Yesu wanguzomereza cha kuti watimbanyiziki pa nchitu yaki yakuzirwa yakupharazga uthenga wamampha. Iyu wangumuka kuti: “Tiyeni tiye kumizi yakuthoŵezgana, mwakuti kweniko nako nditauleko, pakuti chenichi ndicho ndikuziya.” Kumbi nchinthu wuli cho chinguwovya Yesu kuti walutirizgi kuŵika maŵanaŵanu ngaki pa nchitu yaki? Iyu wanguyuka mlenjilenji kuchiromba ndipuso kuchilunguruka. (Marko 1:32-39) Kumbi kulunguruka mwarombu kungatiwovya wuli nasi kuti tije apharazgi aphamphu?
2. Kumbi ndi vinthu wuli vo tingalunguruka kuti vitiwovyi kulutirizga kuja ateŵeti aphamphu?
2 Tilungurukengi pa Vinthu Wuli? Yesu wanguwona kuti ‘ŵanthu asuzgikanga ndipu ŵenga akuparanyika nge mbereri zambula mliska.’ (Mate. 9:36) Mwakuyanana waka, nasi tikhoza kuwona mo ŵanthu anandi akhumbiya uthenga wamampha. Titenere kuŵanaŵaniya za umana wa nyengu yo yaja. (1 Ŵako. 7:29) Tingalunguruka pa nchitu ndi mijalidu yaku Yehova, mwaŵi widu wakuja Akaboni aku Yehova ndipuso chuma cha mtengu wapatali cho tasambira mu Mazu ngaku Chiuta, cho ŵanthu a m’chigaŵa chidu ŵechendachiziŵi.—Sumu 77:11-13; Yesa. 43:10-12; Mate. 13:52.
3. Kumbi tingalunguruka nyengu wuli?
3 Tilungurukengi Nyengu Wuli? Nge mo Yesu wanguchitiya, anyaki ayuka ndi mlenjilenji panyengu yo kuŵavi chiwawa. Anyaki atanja kulunguruka ndi mazulu ŵechendaluti kuchigona. (Chiya. 24:63) Chinanga wuli titangwamika ndi vakuchitika, tikhoza kuyisaniya mbwenu nyengu yakulungurukiya. Anyaki achita ivi panyengu yo ŵe paulendu. Anyaki alunguruka ndi msana panyengu yakupumuliya kuti aleki kutimbanyizika. Anandi awona kuti kulunguruka ŵechendasere mu uteŵeti, chinanga kungaŵa kwa kanyengu kamanavi kutiŵawovya kuti apharazgi mwaphamphu ndipuso mwachiganga.
4. Kumbi nchifukwa wuli titenere kulunguruka?
4 Kulunguruka mwarombu kungachitisa kuti khumbu lidu lakuteŵete Yehova likuwi ukongwa, kuti tiwonengi vinthu vauzimu kuja vakukhumbika ukongwa ndipuso kutichitisengi kuti tilutirizgi kupharazga. Kulunguruka kunguwovya Yesu, Mteŵeti Mura waku Chiuta, isi nasi kungatiwovya.