“Ŵaliskani Ukweru Winu”

1. Kumbi nchinthu wuli chapade cho tingagaŵiya anyidu?

¹ Ukweru wakutowa wo uwoneka asani kutucha mpaka kufika pa nyengu yo lumwi liserere, utumbika Yehova Chiuta. Kweni ukweru wo Yesu wangupempha akusambira ŵaki kuti aje nawu wenga unyaki, wenga ‘ukweru wa umoyu.’ (Yoha. 8:12) Kuja ndi ukweru wauzimu wenuwu ndi mwaŵi wapade wakutuliya kwaku Yehova, wo usazgapu maudindu ngakulungakulu. Yesu wangukamba kuti: “Ŵaliskani ukweru winu paurongo pa ŵanthu,” kuti nawu awovyeki. (Mate. 5:16) Mazuŵa nganu po charu che mu mdima ukulu wauzimu, titenere kugaŵiyaku anyidu ukweru wenuwu ndipu ŵanthu anandi atiwukhumba ukongwa kuluska kali. Kumbi tingachita wuli kuti tiŵaliski ukweru widu nge mo Khristu wanguchitiya?

2. Kumbi Yesu wangulongo wuli kuti kugaŵiya ŵanthu ukweru wauzimu nkhwakukhumbika ukongwa?

² Kuziya mu Nchitu Yakupharazga: Yesu wangugwiriskiya nchitu nyengu yaki, nthazi ndipuso vinthu vinyaki kuti ŵanthu alonde ukweru wa uneneska mu nyumba zawu, m’mapiri ndi m’malu ngakupambanapambana ngo asanirikanga. Iyu waziŵanga kuti kuzirwa kwa ukweru wauzimu wo waperekanga kwenga kwambula kumala. (Yoha. 12:46) Kuti wakwanisi kufikiya ŵanthu anandi, Yesu wangunozgekereska akusambira ŵaki kuti aje “ukweru wa charu.” (Mate. 5:14) Yiwu aŵaliskanga ukweru wawu mwakuchitiya ŵanthu vinthu vamampha ndi kugaŵana nawu uneneska wa vinthu vauzimu.

3. Kumbi tingalongo wuli kuti tiwonga ukweru wa uneneska mwakutuliya pasi pa mtima?

³ Ŵanthu aku Chiuta awona kuti nkhwakuzirwa ukongwa ‘kulutirizga kwenda nge ŵana akungweruka,’ ndipu apharazga kwekosi ko kungasanirika ŵanthu. (Ŵaefe. 5:⁠8) Kuŵerenga Bayibolo pamwenga mabuku ngidu nganyaki ngachikhristu panyengu yakupumuwa ku nchitu pamwenga kusukulu, kungachitiska kuti tiyambi kukambiskana ndi ŵanthu nkhani za m’Malemba. Mwakugwiriskiya nchitu nthowa yeniyi, musungwana munyaki wangwambisa sambiru la Bayibolo ndipu wangugaŵiya mabuku kwa anyaki 12 a mukilasi.

4. Kumbi jalidu lidu lamampha liwovya wuli kuti ‘ukweru widu uŵali?’

⁴ Mwakuchita Nchitu Zamampha: Jalidu lidu la zuŵa ndi zuŵa ndilu lingawovya kuti tiŵaliski ukweru widu. (Ŵaefe. 5:⁠9) Jalidu la Akhristu liwoneke ukongwa ku nchitu, kusukulu ndi m’malu ngakupambanapambana ndipu lititipaska mwaŵi wakukamba ndi ŵanthu za uneneska wa m’Bayibolo. (1 Pet. 2:12) Mwakuyeruzgiyapu, jalidu lamampha la mwana munyaki munthurumi wa vyaka 5 linguchitiska kuti musambizi ŵaki wadani apapi a mwana yo. Musambizi yo wangukamba kuti, “Ndechendawonepu mwana wajalidu lamampha nge uyu!” Ivi vilongo nadi kuti uteŵeti widu ndipuso jalidu lidu lamampha vikopa ŵanthu kuti awoni “kungweruka kwa umoyu” ndipu vipangisa so kuti Chiuta watumbikiki.