“Uteŵeti Widu Uziŵika ndi Jalidu la Kuzizipizga”
1. Kumbi Yehova walongo wuli kuzizipizga pakuchita vinthu ndi ŵanthu?
1 Kuzizipizga ndi jalidu lo Chiuta walongo ku mtundu wa ŵanthu. (Chitu. 34:6; Sumu 106:41-45; 2 Pet. 3:9) Chakuwoniyapu chikulu cha kuzizipizga kwaki kwa chanju ndi nchitu yakupharazga Ufumu ya pacharu chosi chapasi. Yehova waja wachizizipizga ndi vakuchita va ŵanthu kwa vyaka pafupifupi 2,000 kweni weche kulutirizga mbwenu kudana ŵanthu a mtima wamampha kuti aje nayu paubwezi. (Yoha. 6:44) Kumbi uteŵeti widu ungalongo wuli kuzizipizga kwaku Yehova?
2. Kumbi tingalongo wuli kuzizipizga asani tipharazga mu chigaŵa chidu?
2 Uteŵeti wa Nyumba ndi Nyumba: Titole kuzizipizga kwaku Yehova mwa kupharazga ‘kwambula kulekezga’ ku madera ngo kwe ŵanthu wo wechendalongo linweka lakukhumba kusambira. (Machi. 5:42) Tizizipizga, mwakukunthiyapu ŵanthu wo akhumba cha kuvwisiya, akunyoza ndipuso wo asuska uteŵeti widu. (Marko 13:12, 13) Tilongo so kuzizipizga mwa kuyesesa kulutirizga kudiliya mbewu za uneneska chinanga kuti kungaŵa kwakusuzga kusaniya ŵanthu wo ŵe ndi linweka panyumba zawu.
3. Nchifukwa wuli tikhumbika kuzizipizga asani tiweriyaku ku wakusambira ndipuso pakupangisa masambiru nga Bayibolo?
3 Masambiru nga Bayibolo: Asani tikhumba kuti mbewu yo tapanda yikuwi titenere kuzizipizga. Tingayiphwere mbewu yo, kweni tingayichichizga cha kuti yikuwi. (Yako. 5:7) Mwakuyanana waka, kukuwa kwauzimu kuchitika pamanapamana. (Marko 4:28) Kungaŵa kwakusuzga kwaku wo tisambira nawu kuti aleki visambizu vaboza pamwenga midawuku yambula kukoliyanaku ndi malemba, ya chisopa chaboza cho ŵengamu. Titenere cha kuŵachichizga akusambira ŵidu kuti asinthi mwaliŵiliŵi. Tikhumbika kuzizipizga ndipuso kuti pajumphi nyengu kuti mzimu utuŵa waku Chiuta ugwiri nchitu mu mtima wa munthu yo tisambira nayu.—1 Ŵako. 3:6, 7.
4. Kumbi kuzizipizga kungatiwovya wuli kuti tipharazgi mwakuko mtima kwa abali ŵidu wo mbakaboni cha?
4 Abali Ŵidu wo Mbakaboni cha: Chinanga kuti tikhumbisiska kuti abali ŵidu wo mbakaboni cha asambiri uneneska, titenere kulongo kuzizipizga mwakulindizga nyengu yamampha yakukambiskana nawu za chigomezgu chidu ndipuso titenere kuphwere kuti tileki kuŵakonkhoske vinthu vinandi nyengu yimoza. (Waku. 3:1, 7) Asani tichita viyo, tichitisa ŵanthu kuti aziŵi jalidu lidu ndipuso vititiwovya kuŵakonkhoske chivwanu chidu mwakuzika ndipuso mwaulemu ukuru. (1 Pet. 3:1, 15) Asani tizizipizga mu uteŵeti, uteŵeti widu uŵengi wakuko mtima ndipuso ukondwesengi Ada ŵidu akuchanya.