‘Muchitiyengi Lisungu Ŵanthu’
1. Kumbi nchinthu wuli cho ŵanthu akhumbika ukongwa mazuŵa nganu?
1 Sonu ndipu ŵanthu akhumbika kuŵawovya mwalisungu ukongwa kuruska kali. Kunangika kwa vinthu mu charu ichi kwachitiska kuti ŵanthu aŵevi likondwa, asuzgikengi maŵanaŵanu ndipuso asoŵengi pakuko. Ŵanthu mamiliyoni nganandi akhumbika kuwovyeka, ndipu isi nge Akhristu te akwenere kulongo kuti titiŵafipiya mtima. (Mate. 22:39; Ŵaga. 6:10) Kumbi tingalongo wuli kuti titiŵafipiya mtima?
2. Kumbi nthowa yamampha yo tingalongore lisungu ndi niyi?
2 Nchitu Yakulongo Lisungu: Chiuta yija ndiyu wangapembuzga ŵanthu mwakwenere. (2 Ŵako. 1:3, 4) Yehova watitichiska kuti tijengi ‘alisungu’ nge po iyu wachitiya ndipu watipaska nchitu yakukambiya ŵanthu uthenga wamampha wa Ufumu. (1 Pet. 3:8) Nthowa yamampha ukongwa yakupembuzgiya “ŵakusweka mtima” nkhuchita phamphu pa nchitu yakupharazga, chifukwa Ufumu waku Chiuta ndiwu wija wo ungawovya mtundu wa ŵanthu wo usuzgika. (Yesa. 61:1) Pambula kuswera yapa Yehova watuzgengepu vinthu viheni vosi ndi kujalikiska charu cha urunji chifukwa chakuti iyu wachitiya lisungu ŵanthu.—2 Pet. 3:13.
3. Kumbi tingachita wuli kuti tiwonengi ŵanthu nge mo Yesu waŵawoniyanga?
3 Muwonengi Ŵanthu Nge mo Yesu Waŵawoniyanga: Chinanga mphanyengu yo wapharazganga ku gulu la ŵanthu, Yesu wawonanga ŵanthu wo nge gulu waka cha. Iyu waŵanikanga kuti weyosi pakuyija wakhumbika chovyu kuti waje pa ubwezi wamampha ndi Chiuta. Yiwu ŵenga nge mbereri zambula muliska wakuzilongozga. Yesu wangukwaskika ndi vo wanguwona ndipu ivi vingumuchitiska kuti waŵasambizi mwakufwasa. (Marko 6:34) Kuwona ŵanthu nge mo Yesu waŵawoniyanga kutichiskengi kuti nasi tichitiyengi lisungu weyosi nge munthu pakuyija. Ivi vingawoneke m’mazu ndi chisku chidu. Chinthu chakwamba chijengi kupharazga ndipu tisinthengi vo tikhumba kukamba mwakuyana ndi vakusoŵa va munthu weyosi.—1 Ŵako. 9:19-23.
4. Kumbi nchifukwa wuli titenere kuchitiya lisungu ŵanthu?
4 Mzinda ukuru wa ŵanthu akutuliya mu mitundu yosi avwisiya uthenga wa Ufumu ndipu alongo kuti akondweskeka chifukwa cha vo titiŵachitiya. Asani tilutirizga kuchitiya lisungu ŵanthu, titumbikengi ndipuso kukondweska Yehova, Chiuta walisungu.—Ŵako. 3:12.