Mungatondekanga Cha
1. Kumbi nchinthu wuli cho chikhumbika chiganga, ndipu nchifukwa wuli?
1 Kumbi mukutondekapu kupharazga ku sukulu chifukwa chakopa kusekeka? Asani mwe ndi soni, mukhumbika kuja ndi chiganga kuti muyambi kukambiskana ndi ŵanthu. Kumbi nchinthu wuli cho chingakuwovyani?
2. Kumbi nchifukwa wuli mukhumbika kuchita vinthu mwazeru asani mupharazga ku sukulu?
2 Muchitengi Vinthu Mwazeru: Chinanga kuti mungaja ndi mwaŵi wakupharazga ku sukulu, kumbukani kuti mungakambiskana cha ndi munthu weyosi yo mungakumana nayu nge po muchitiya asani mupharazga nyumba ndi nyumba. Mutenere kuchita vinthu mwazeru kuti muziŵi nyengu yo mungaŵereŵete. (Waku. 3:1, 7) Mukhoza kusaniya mwaŵi wakwamba kukambiskana ndi anyinu pa nkhani yinyaki yo musambira pamwenga pa nchitu yo asambizi akupaskani kuti mulembi. Nyengu zinyaki ŵana a sukulu anyinu akhoza kukufumbani chifukwa cho muleke kuchitaku vinthu vinyaki. Akhristu anyaki atiŵakambiya limu asambizi ŵawu asani ayamba waka sukulu kuti mbakaboni aku Yehova ndipu atiŵapaskaku so mabuku ngo ngakonkhoska vo tigomezga. Anyaki aŵika mabuku pamwenga magazini pa desiki pawu kuti ŵana a sukulu anyawu aŵafumbengi mafumbu.
3. Kumbi munganozgeke wuli kuti mukapharazgi ku sukulu?
3 Munozgekiyengi: Asani munozgeke, muŵengevi mantha. (1 Pet. 3:15) Mwaviyo, yesani kuŵanaŵaniya mafumbu ngo angafumba ndi kuwona mo mungamukiya. (Ntha. 15:28) Asani mungafiska, pakuluta ku sukulu mupingengi Bayibolo ndipuso mabuku ngamanavi nge Kukambitsirana, mabuku nga Mayankho a Zimene Achinyamata Amafunsa, ndipuso mabuku ngakukonkhoska va chilengedu, kuti mukangagwiriskiyengi nchitu. Pemphani apapi ŵinu kuti pa nyengu ya kusopa kwa pabanja, asazgiyengepu vigaŵa vakuyesere mo mungamukiya mafumbu.
4. Kumbi nchifukwa wuli mutenere kulutirizga kupharazga ku sukulu?
4 Jani ndi Maŵanaŵanu Ngakwenere: Lekani kuŵanaŵana kuti nyengu zosi ŵana a sukulu anyinu akusekeningi asani mutiŵakambiya uneneska. Anyaki akhoza kukukhumbirani chifukwa cha chiganga chinu ndipu akhoza kukuvwisiyani. Kweni asani palivi yo wakhumba kuvwisiya mungagongowanga cha. Yehova wakondwengi ukongwa kuti munguyesesa. (Ŵahe. 13:15, 16) Lutirizgani kumupempha kuti wakuwovyeni kuti ‘mulutirizgi kulongoro ndi chiganga chosi.’ (Machi. 4:29; 2 Timo. 1:7, 8) Aŵanaŵaniyani waka likondwa lo mungaŵa nalu asani munthu munyaki wavwisiya. Pavuli paki munthu uyu wakhoza kuja muteŵeti waku Yehova!