Kumbi Yehova Wawonanji Mwaku Isi?

1. Kumbi ndi mijalidu niyi yo Yehova wakondwa kuti wasaniyengi asani wasanda mitima ya ŵanthu?

¹ Bayibolo lititikambiya vo Yehova wawona kuti vakuzirwa mwa ateŵeti ŵaki. Iyu wakondweseka ndi mijalidu yidu yamampha ndipuso vo tiyesesa kuchita. Fumu Davidi yingukambiya mwana waki Solomoni kuti: “Yehova wapenjapenja mitima yosi, ndipu waziŵa lunguluku le losi.” (1 Miko. 28:⁠9) Chiuta wakondwa ukongwa asani wasaniya mtima wo utanja chimangu, uneneska ndi urunji pa nyengu yo wasanda mitima ya ŵanthu mu charu ichi cha chiwawa, ndipuso chakuzaza ndi kutinkhana. Kumbi nchinthu cho wuli chichitika asani Chiuta wasaniya mtima wo utimuyanja, wo ukukhumbisiska kusambira vakukwaskana ndi iyu ndi kukambiyaku anyaki vo munthu yo wasambira? Yehova watitikambiya kuti wakondwa ndi ŵanthu wo akambiyaku anyawu vakukwaskana ndi iyu. Ndipu we ndi “buku lachikumbusku” la ŵanthu ‘wo atopa Yehova, ndi kuŵanaŵaniya pa zina laki.’ (Mala. 3:16) Mijalidu iyi njakuzirwa ukongwa kwaku iyu.

2. Kumbi ndi nchitu zinyaki nizi zo isi tichita zo Yehova wawona kuti zakuzirwa ukongwa?

² Kumbi ndi nchitu zamampha nizi zo Yehova wawona kuti zakuzirwa ukongwa? Iyu wakondwa asani tiyesesa kulondo Mwana waki, Yesu Khristu. (1 Pet. 2:21) Chiuta wawona kuti nchitu yakupharazga uthenga wamampha wa Ufumu waki ndiyu yakuzirwa ukongwa. Pa Ŵaroma 10:15 tiŵerenga kuti: “Nkhutowa naku marundi nga ŵakugozga vamampha.” [‘Ngakutowa ukongwa malundi nga ŵanthu wo apharazga uthenga wamampha wa vinthu vamampha,’ NW ]. Kanandi tiŵanaŵanapu cha kuti malundi ngidu ngangaja “ngakutowa.” Kweni yapa ngamiya phamphu lo ateŵeti aku Yehova ŵe nalu pakupharazga uthenga wamampha. Chiuta wawona kuti phamphu laviyo, ndakutowa ndipuso ndakuzirwa.​—⁠Mate. 24:14; 28:​19, 20.

3. Nchifukwa wuli tingasimikizga kuti Yehova wawona kukunthiyapu kwidu kuti nkhwakuzirwa ukongwa asani takumana ndi masuzgu?

³ Yehova wawona so kuti kukunthiyapu kwidu nkhwakuzirwa. (Mate. 24:13) Cho mutenere kukumbuka nchakuti Satana wakhumba cha kuti muje pa ubwezi ndi Yehova. Ziŵani kuti asani mugomezgeka kwaku Yehova zuŵa lelosi, mutimuwovya kuti wamuki Satana yo watimunyoza. (Ntha. 27:11) Nyengu zinyaki kukunthiyapu nkhwakusuzga ukongwa. Matenda, kusoŵa kwa ndalama, kusuzgika maŵanaŵanu, ndipuso masuzgu nganyaki, vingaja viyesu va zuŵa ndi zuŵa. Tingaguŵa so asani vinthu vo talindizganga vatondeka kuchitika. (Ntha. 13:12) Yehova wakondwa ukongwa asani tikunthiyapu masuzgu yanga. Ndichu chifukwa chaki Fumu Davidi yingupempha Yehova kuti wasungi masozi ngaki mu “supa,” ndi kufumba so mwachigomezgu kuti: “Asi nge mu buku linu?” (Sumu 56:⁠8) Yehova wasunga ndipuso waluwa cha masozi ngidu ndi masuzgu ngosi ngo tikunthiyapu pa nyengu yo tiyesesa kugomezgeka kwaku iyu. Nangu so ngakuzirwa pamasu paku Yehova.

4. Kumbi ndi vinthu viheni nivi vo Yehova waleka kuŵaŵanaŵaniya ateŵeti ŵaki akugomezgeka?

⁴ Mtima widu wo utijimba mlandu ungatichitiska kuti tijiwonengi nge kuti te ambula kukhumbika pamasu paku Chiuta. Nyengu zosi tikhoza kuŵanaŵana kuti: ‘Pe anyaki wo achita umampha ukongwa kuruska ini. Yehova watenere kuti wakondwa nani cha asani watindiyeruzgiya ndi yiwu!’ Yehova watitiyeruzgiya ndi ŵanthu anyaki cha, ngwakumira mtima cha ndipuso waŵanaŵana vinthu vankhaza cha. (Ŵaga. 6:⁠4) Wachita vinthu mwazeru ukongwa asani wasanda mitima yidu, ndipu wasankhamu vinthu vamampha pe, chinanga vingaja vimana.