Mukondwengi ndi Nchitu Yinu
1. Kumbi nchinthu wuli cho chingatigongoweska pa uteŵeti widu?
1 Munthu wakupangika munthowa yakuti ‘wasaniyengi likondwa mu nchitu yaki.’ (Wak. 2:24) Kweni asani vileka kutiyende umampha mu uteŵeti, tigongowa ndipu ivi vichitiska kuti tileki kukondwa ndipuso kuwere vuli. Kumbi nchinthu wuli cho chingatiwovya kuti tilutirizgi kuwona vinthu mwakwenere?
2. Nchifukwa wuli titenere cha kulindizga kuti vinthu viyendengi nge mo isi tikhumbiya mu uteŵeti?
2 Mungalindizganga Kuti Vinthu Vichitikengi Nge mo Imwi Mukhumbiya Cha: Chinanga kuti ŵanthu wo anguvwisiya vo Yesu wasambizanga ŵenga amanavi, kweni iyu wakondwanga ndi uteŵeti waki. (Yoh. 17:4) Mu ntharika yaki ya wakumija mbewu, Yesu wangukambiya limu kuti ŵanthu anandi akanengi uthenga wa Ufumu wo uyanana ndi mbewu. (Mat. 13:3-8, 18-22) Kweni chinanga vingaŵa viyo, phamphu lidu liluta paŵaka cha.
3. Kumbi ‘tingapasa’ wuli vipasu, chinanga kuti mbanthu amanavi wo angavwisiya uthenga wo tipharazga?
3 Mo Tipasiya Vipasu Vinandi: Ntharika yaku Yesu, yilongo kuti ŵanthu wo azomera uthenga, ‘apasa’ vipasu. (Mat. 13:23) Asani mpunga wamanga ndi kulapuka, utuzga mapesi cha kweni utuzga sanja. Mwaviyo, vipasu vo Akhristu apasa mbakusambira asonu cha, kweni ndi mbewu zasonu za Ufumu zo timija mwa kupharazga. Kuchita viyo kutitiwovya kuti ‘tikondwengi’ kaya ŵanthu akani pamwenga cha. Titovya kutoweska zina laku Yehova. (Yes. 43:10-12; Mat. 6:9) Tikondwa chifukwa chakuti tigwira nchitu limoza ndi Chiuta. (1 Ŵakor. 3:9) Ndipu “chipasu cha milomu” chaviyo chikondweska Yehova.—Ŵah. 13:15, 16.
4. Kumbi nchinthu wuli cho chingachitika pa uteŵeti widu kwambula isi kuziŵa?
4 Nyengu zinyaki nchitu yidu yakupharazga yingaŵa ndi vakutuwapu vamampha vo isi tingatondeka kuviwona. Tiziŵa kuti ŵanthu anyaki wo anguvwa Yesu wachipharazga anguja akumulondo cha mpaka po iyu wangumaliziya uteŵeti waki wa pacharu chapasi. Mwakuyana ŵaka, nyengu zinyaki mbewu za Ufumu zo timija mu mitima ya ŵanthu zingame pa nyengu yeniyo cha, kweni yiwu akhoza kuzisambira uneneska nyengu yinyaki kunthazi kwambula isi kuziŵa. Te akusimikizga kuti uteŵeti widu utitiwovya kuti tije alikondwa. Mwaviyo, tiyeni tilutirizgi ‘kupasa [vipasu] vinandi’ ndi kusimikizgiya kuti te akulondo aku Yesu.—Yoh. 15:8.