Yezgani Achimi—Yona
1. Kumbi Yona wenga ndi mijalidu yamampha niyi?
1 Kumbi nchinthu wuli cho chituza m’maŵanaŵanu nginu asani mwakumbuka mchimi Yona? Anyaki angaŵanaŵana kuti wenga wamantha pamwenga wakumira mtima. Kweni iyu wangulongore limu kuti wenga wakujiyuyuwa, wachiganga, kweniso wa mtima wakujipereka. Kumbi tingayezga wuli mijalidu yamampha ukongwa yo Yona wenga nayu?—Yak. 5:10.
2. Kumbi tingamuyezga wuli Yona pa nkhani yakujiyuyuwa?
2 Kujiyuyuwa: Pakwamba, Yona wangukana kuluta ko Yehova wangumutuma ndipu wanguthaŵiya kunyaki. Iyu wanguchita ivi chifukwa Asiriya wo ajanga mu msumba wa Nineve ŵenga ŵanthu akwanja viwawa ndipu mpaka Nineve wadanikanga kuti “msumba wa ndopa.” (Nah. 3:1-3) Yehova wangumuchenya Yona chifukwa cha vo wanguchita ndipu wangujiyuyuwa chifukwa Yehova wati wamutuma kachiŵi wanguzomera. (Nthanthi 24:32; Yona 3:1-3) Iyu wanguchita khumbu laku Yehova chinanga kuti pakwamba wangukana. (Mat. 21:28-31) Kumbi titesesa kupharazga uthenga wamampha chinanga kuti tingachenyeka pamwenga asani chigaŵa chidu chakupharazgaku nchakusuzga?
3. Kumbi mphavigaŵa nivi va uteŵeti vo imwi mukhumbika kuja achiganga kweniso akujipereka?
3 Chiganga ndi Kujipereka: Yona wati wawamu kuti vo wachita vibayisengi akwendeska ngaraŵa, wangujipereka kuti wafwi ndiyu. (Yona 1: 3, 4, 12) Pavuli paki wati waluta kuchifiska nchitu yo wangutumika ku Nineve, wangwenda mpaka pakati pa msumba ndi chilatu chakuti wasaniyi malu ngamampha ngo wangapharazgiyapu cheruzgu chaku Yehova. Munthu wamantha wangachita cha venivi, kweni mchimi waku Chiuta wachiganga ndiyu. (Yona 3:3, 4) Nanga isi titenere kuchita wuli mazuŵa nganu? Chiganga cho Chiuta wapereka nchakukhumbika ukongwa kuti tiŵapharazgiyi mwachiganga ŵanthu wo atitisuska. (Mac. 4:29, 31) Tikhumbika so kuja akujipereka kuti tigwiriskiyi nchitu nyengu ndi chuma chidu mu uteŵeti.—Mac. 20:24.
4. Nchifukwa wuli tikhumbika kusaniya nyengu yakuŵanaŵaniya mijalidu yamampha ya achimi aku Yehova?
4 Nyengu zosi muchiŵerenga nkhani ya mchimi waku Yehova weyosi, muyanduwengi asani muwona nge vo vachitikiyanga mchimi yo, vichitikiya imwi. Mujifumbengi kuti: ‘Kumbi asani ndenga ini, ndatingi ndichitengi wuli? Kumbi ndingayezga wuli mijalidu yaki yamampha pa umoyu wangu?’ (Ŵah. 6:11, 12) Munthazi umu, nkhani zinyaki za mu Uteŵeti Widu wa Ufumu, zikonkhoskengi fundu zinyaki zo tingasambira kwa achimi aku Yehova anyaki akugomezgeka.