Yezgani Achimi—Yoele
1. Kumbi tingalongo wuli kujiyuyuwa nge Yoele asani tipharazga?
1 Kumbi mchimi Yoele wenga yani? Bayibolo likamba ŵaka kuti iyu wenga “mwana waku Petuele.” (Yoele 1:1) Mchimi wakujiyuyuwa mwenuyu wanguŵika mtima pakupharazga uthenga waku Yehova m’malu mwakuŵika mtima pa udindu waki nge mthenga. Mwakuyanana ŵaka, tiyesesa kuti ŵanthu athamikengi Yehova ndipuso Bayibolo mu uteŵeti m’malu mwakuti titchukengi ndisi. (1 Ŵakor. 9:16; 2 Ŵakor. 3:5) Tichiskika so ukongwa ndi uthenga wo tipharazga. Kumbi uchimi waku Yoele utitichiska kweniso kutipaska chilindizga munthowa wuli mazuŵa nganu?
2. Kumbi kuŵandika kwa zuŵa laku Yehova kutitichiska kuchita vinthu wuli?
2 ‘Zuŵa Laku Yehova Laŵandika.’ (Yoele 1:15): Chinanga kuti mazu yanga ngakulembeka vyaka masauzandi nganandi ngajumpha, isi te mnyengu yo ngafiskikengi kakumaliya. Kunangika kwa vinthu m’charu, kutinkhika ndipuso ŵanthu ambula linweka wo tikumana nawu mu uteŵeti, mbukaboni wakuti te m’mazuŵa ngakumaliya nga mgonezi uheni uwu. (2 Tim. 3:1-5; 2 Pet. 3:3, 4) Kuŵanaŵaniya za kuŵandika kwa zuŵa laku Yehova, kutiwovyengi kuŵika uteŵeti panthazi mu umoyu widu.—2 Pet. 3:11, 12.
3. Nchifukwa wuli uteŵeti ngwakukhumbika ukongwa po chisuzgu chikulu che pafupi?
3 ‘Yehova Nchakutaskikiyamu cha Ŵanthu Ŵaki.’ (Yoele 3:16): Kusukunyika kwa charu ko kukambika mu vesi ili, kutenere kuti kwazamuchitika panyengu yo Yehova wazamupereke cheruzgu pa chisuzgu chikulu. Tichiskika ukongwa kuziŵa kuti Yehova wazamutaska ateŵeti waki akugomezgeka panyengu yo. (Chiv. 7:9, 14) Asani tiyesesa kupharazga ndipuso tiwona mo Yehova watitiwovye ndi kutichiska, tikunthiyapu kweniso chivwanu chidu chija chakukho. Venivi vazakutiwovya pa chisuzgu chikulu.
4. Nchifukwa wuli titenere kusekere po tilindizga mwa chigomezgu?
4 Chinanga kuti anyaki awona uthenga waku Yoele nge kuti ngwachipasuku kweni utovya ateŵeti aku Chiuta kuti aje ndi chilindizga kuti azamutaskika. (Yoele 2:32) Mwaviyo, tiyeni tilindizgengi ndi chigomezgu kweniso tipharazgengi mwaphamphu uthenga wa Ufumu waku Chiuta po tilondo mazu nga pa Yoele 2:23 ngakuti: “Sekeriyani mwa Ambuya Chiuta winu.”