Yezgani Achimi—Mika
1. Kumbi Mika watenere kuti wajifumbanga fumbu nili, kweni nchifukwa wuli uthenga wo wapharazganga unguwa paŵaka cha?
1 ‘Kumbi mgonezu uheni uwu utuwengepu zuŵanji?’ Mchimi Mika watenere kuti wajifumbanga fumbu lenili wachipharazga uthenga wacheruzgu waku Yehova wakukwaskana ndi ufumu wa Yisraele kweniso wa Yuda. Chinanga kuti venga viyo, uthenga wo wapharazganga unguwa paŵaka cha. Mu 740 B.C.E., Mika weche wamoyu, vo Yehova wangukamba vakukwaskana ndi msumba wa Samaria vingufiskika. (Mika 1:6, 7) Pavuli paki, mu 607 B.C.E., msumba wa Yerusalemu ungubwangandulika. (Mika 3:12) Kumbi tingamuyezga wuli Mika tichikhazga cheruzgu chaku Yehova mazuŵa nganu?
2. Tingalongo wuli kuzizipizga tichilindizga zuŵa laku Yehova, nanga nchifukwa wuli?
2 Tizizipizgengi: Mika wachilindizga kuti Chiuta wanangi charu, wangukamba kuti: “Kweni ini, ndilereskengi kwa Ambuya, ndilindizgengi Chiuta yo ndi mtaski wangu.” (Mika 7:7) Iyu wanguja ŵaka cheti cha, kweni wagwiranga nchitu mwaphamphu nge mchimi waku Yehova. Nasi tichilindizga zuŵa laku Yehova, titenere kutangwamika ndi “mendedu ngakhovu ndi mauwopa [“nchitu zakulongo kuti te akujipereka kwaku,” NW] Chiuta.” (2 Pet. 3:11, 12) Yehova wazizipizga chifukwa wapaska ŵanthu nyengu yakuti alapi. (2 Pet. 3:9) Ndichu chifukwa chaki tivwiya ulongozgi wakuti tiyezgengi kukunthiyapu kwa achimi.—Yak. 5:10.
3. Nchifukwa wuli tikhumbika kupempha Yehova kuti watipaski mzimu waki?
3 Tithembengi Yehova: Chinanga kuti Mika wangupaskika nchitu yakusuzga, iyu wathembanga Yehova kuti wamupaski nthazi. (Mika 3:8) Yehova waziŵa kuti pakutija tingafiska cha uteŵeti wo wakutipaska, lekani Mazu ngaki ngatitichiska kuti timupemphengi kuti watipaski nthazi. Ŵanthu wo alopwa watiŵapaska nthazi kuti afiski kumuteŵete. (Sumu 84:5, 7; Yes. 40:28-31) Kumbi namwi Yehova wakukupaskanipu nthazi mwati mwalopwa? Kumbi nyengu zosi muromba kwaku Yehova kuti wakupaskeni nthazi yaki ya mzimu utuŵa?—Luka 11:13.
4. Kumbi vo Mika wachitanga vingatiwovya wuli mazuŵa nganu?
4 Mika wawonanga kuti kuchita khumbu laku Chiuta chenga chinthu chakukhumbika ukongwa pa umoyu waki. Iyu wangwesesa kuja wakugomezgeka chinanga kuti wajanga ndi ŵanthu a mijalidu yiheni. Mwakuyana ŵaka, nasi chigomezgu chidu chiteseka zuŵa lelosi. Mwaviyo, tiyeni tilutirizgi kwenda “m’zina la Ambuya Chiuta widu muyaya ndi muyaya.”—Mika 4:5.