Yesani Kusambira Bayibolo ndi Ŵanthu wo Mutiŵagaŵiya Magazini Mwezi Wewosi

1. Nchifukwa wuli gulu laku Yehova laja lichichiska apharazgi kuti ajengi ndi ŵanthu wo atenere kuŵagaŵiya magazini mwezi wewosi?

¹ Ŵanthu anandi akhumba cha kusambira nasi Bayibolo, kweni atanja ukongwa kuŵerenga magazini ngidu. Ndichu chifukwa chaki gulu laku Yehova laja lichichiska apharazgi kuti ajengi ndi ŵanthu wo atenere kuŵagaŵiya magazini mwezi wewosi. Asani ŵanthu aŵerenga magazini ngidu nyengu zosi, akhoza kukhumba kusambira Mazu Ngaku Chiuta. (1 Pet. 2:2) Mukuluta kwa nyengu, fundu yinyaki yo angaŵerenga yikhoza kuŵachontha ndipu akhoza kuzomera kusambira Bayibolo.

2. Kumbi tingawovya wuli ŵanthu wo titiŵapaska magazini mwezi wewosi kuti aje ndi linweka?

² ‘Mudiriyengi’ Mbewu za Uneneska: Mukambiskanengi ndi ŵanthu wo mutiŵagaŵiya magazini ndipu muyesesengi kuziŵana nawu, m’malu mwakuŵasiriya ŵaka magazini ndi kutuwapu. Ivi vikuwovyeningi kuziŵa vo vitiŵachitikiya pa umoyu wawu, vo atanja ndi vo agomezga, alinga kuti mukambiskanengi nawu mwazeru. (Nthanthi 16:23) Munozgekengi dankha mwechendaluti. Asani mwafika, mukonkhoskengi fundu yinyaki ya m’magazini ndi lemba limoza mwakudumuwa, ndipu kuchita ivi nkhudiriya mbewu za uneneska mumtima wa munthu. (1 Ŵakor. 3:6) Mulembengi zuŵa lo mungukiyaku, buku lo mungusiya, nkhani kweniso malemba ngo mungukambiskana.

3. Kumbi tingaweriyaku kalinga ku ŵanthu wo titiŵagaŵiya magazini mwezi wewosi?

³ Kumbi Mungaweriyaku Kalinga? Mukengi kamoza pamwezi kuti mukaŵapaskengi magazini ngasonu. Kweni mukhoza kuŵayende maulendu nganandi asani mwawona mo vinthu viliri kweniso linweka lawu. Mwakuyeruzgiyapu, asani pajumpha sabata yimoza pamwenga ngaŵi kutuliya po munguchipereke magazini, mungaweriyaku ndi kukamba kuti, “Ndakhumbanga ŵaka kukulongoni nkhani yinyaki m’magazini ngo ndingukupaskani.” Kuchita venivi kumuwovyengi kuti waje ndi mtima wakukhumba kuŵerenga nkhani yeniyo. Asani wakuyiŵerenga kali, mukhoza kumufumba vo wasambira m’nkhani yo ndi kukambiskana nayu mwakudumuwa. Asani munthu yo watanja ukongwa kuŵerenga mabuku ngidu, mukhoza kuweriyaku kuchimupaska kapepala, kabuku pamwenga buku lo tigaŵiya mwezi weniwo.

4. Nchinthu wuli cho chingatiwovya kuziŵa kuti wo titiŵagaŵiya magazini mwezi wewosi angayanja kusambira Bayibolo?

⁴ M’malu mwakulindizga kuti munthu yo mutimupaska magazini wakupempheni kuti musambirengi nayu, imwi ndimwi mutenere kumupempha. Chinanga kuti wakukanapu kali kusambira Bayibolo, mukhoza kumulongo nkhani ya mutu wakuti “Vo Bayibolo Limuka” yo yisanirika mu Chigongwi cha Alinda, kuti muziŵi asani wangayanja kukambiskana nayu. Nyengu zinyaki mukhoza kwamba kusambira nayu mwakudumuwa kwambula kuja pasi. Kweni asani mwatondeka kwambisa sambiru la Bayibolo, mungalutirizga kumupaska magazini kuti walutirizgi kuja ndi linweka.