Yezgani Achimi—Zefaniya
1. Kumbi vinthu venga wuli Zefaniya wachiyamba nchitu ya uchimi ndipu nchifukwa wuli iyu nchakuwoniyapu chamampha kwaku isi mazuŵa nganu?
1 Mukatikati mwa vyaka va m’ma 600 B.C.E., ŵanthu wo ajanga ku Yuda asopanga Bala pakweru. Karonga muheni Amoni wati wabayika ŵaka mwana waki Josiya, yo wenga munamana wangwamba kuwusa. (2 Mik. 33:21–34:1) Pa nyengu yeniyi, Yehova wangutuma Zefaniya kuti wapharazgi uthenga wacheruzgu. Chinanga kuti Zefaniya watuliyanga ku banja lachifumu la Ayuda, iyu wanguyuyuwa cha uthenga wacheruzgu wakutuliya kwaku Yehova wakukwaskana ndi muwusu wa Ayuda. (Zef. 1:1; 3:1-4) Mwakuyanana ŵaka, nasi titenere kuja ndi chiganga nge Zefaniya ndipu tingazomerezganga cha kuti abali ŵidu atitondekeski kusopa Yehova. (Mat. 10:34-37) Kumbi Zefaniya wangupharazga uthenga wuli ndipu nchinthu wuli chinguchitika?
2. Kumbi titenere kuchitanji kuti Yehova wazitibisi pa zuŵa la ukali waki?
2 Penjani Yehova: Ndi Yehova pe yo wangataska ŵanthu pa zuŵa laukali waki. Ndichu chifukwa chaki Zefaniya wanguchiska ŵanthu a ku Yuda kuti apenji Yehova, apenji urunji ndipuso kuti apenji kuzika nyengu yecheŵaka. (Zef. 2:2, 3) Venivi viyanana ŵaka ndi mazuŵa nganu. Nge Zefaniya, tichiska ŵanthu kuti apenjengi Yehova kweni nasi titenere kuchitapu kanthu kuti tileki ‘kuwere vuli kutuwaku kwa Ambuya.’ (Zef. 1:6) Tipenja Yehova asani tisambira mwakuphwere Mazu ngaki ndipuso asani tiromba kuti watilongozgi. Tipenja urunji asani tija ndi mijalidu yamampha. Tipenja kuzika asani tija ndi mtima wakuvwiya ndipuso asani tilondo ndi mtima wosi ulongozgi wakutuliya ku gulu laku Yehova.
3. Nchifukwa wuli titenere kuŵa ndi maŵanaŵanu ngamampha mu uteŵeti?
3 Anyaki Anguchitapu Kanthu: Uthenga wacheruzgu wo Zefaniya wapharazganga unguchitiska kuti anyaki ku Yuda achitepu kanthu, ukongwa Josiya yo wangwamba kupenja Yehova weche munamana. Pavuli paki, Josiya wangwamba kutuzgamu angoza m’charu cho. (2 Mik. 34:2-5) Mazuŵa nganu, chinanga kuti mbewu zinyaki za Ufumu ziwiya mumphepeti mwa nthowa, pajalawi, paminga kweni zinyaki zituwa panyata yamampha ndipu zibala vipasu. (Mat. 13:18-23) Te ndi chigomezgu kuti Yehova walutirizgengi kutumbika phamphu lidu asani timija mwaphamphu mbewu za Ufumu.—Sumu 126:6.
4. Nchifukwa wuli titenere ‘kulindizga’ Yehova?
4 Ŵanthu anyaki a ku Yuda aŵanaŵananga kuti Yehova wachitengepu kanthu cha. Chinanga kuti venga viyo, Yehova wangusimikizgiya ŵanthu wosi kuti zuŵa laki likulu lenga pafupi. (Zef. 1:12, 14) Ŵanthu wo atingi athaŵiyengi kwaku iyu ndiwu pe atingi apozomokengi. (Zef. 3:12, 17) Mwaviyo, po ‘tilindizga’ Yehova, tiyeni titeŵetiyengi Chiuta widu wanthazi mwalikondwa limoza ndi Akhristu anyidu!—Zef. 3:8, 9.